Read MAASAI REVISED PROTESTANT Ile Efeso 5 Bible Online

Ile Efeso 5 - MAASAI REVISED PROTESTANT bible

Ile Efeso 5

¹Ore te nkaraki ina, entanyaanyukie ate Enkai anaa nkera kutiti naanyorri.

²Naa enchomie enyorrata, anaa enatonyorra iyiook Kristo neishooyo kewan te nkaraki iyiook, neaku enkishooroto o lasar orropil oishooki Enkai.

³Kake ore eloloito o loirerioni pooki aashu ng'uarrat torrok, emincho ake eipoti tiatua intae, amu ina naishiaakino tiatua isinyat.

⁴Emintoki aata Iloirerioni, aashu lderrat loo mbaa nemeeta enkanyit, aashu le modai, lemeishiaakino; kake enkishooroto e nashe entoponai.

⁵Entayiolo ena nasipa nchere meetae hoo olololoito aashu oloo loirerioni, aashu oloo ng'uarrat torrok (nkitanyaanyukot taa eomon olotiu neijia), otum hoo enjung'ore tiatua enkitoria e Kristo o ene Nkai.

⁶Emincho hoo elej intae oltung'ani too rorei le pesho, amu te nkaraki oshi kuna baa pee edoiki engoro e Nkai nena kera nemening'isho.

⁷Ore te nkaraki ina emisiritore ninche,

⁸amu irara apa intae enaimin, kake irara taata ewang'an tiatua Olaitoriani; enchom anaa nkera e wang'an,

⁹(amu ore ilng'anayio le wang'an naa ninche etumieki nena pooki sidain neitoriori nesipa),

¹⁰naa entetem aajo mateng'ena te nena naaitiship Olaitoriani.

¹¹Emiata eniporokiki nkiaasin e naimin nemeeta lng'anayio, kake ore eninkoko intae, entayu meibalata.

¹²Amu enkurruna doi ninye te neimakini nena naas lelo too nkisudorot;

¹³kake ore embae pooki nabolokini ewang'an naa keliooyu, amu ewang'an pooki toki nalioo.

¹⁴Ina pee eji, “Inyo oloirura, tudumunye, tung'uai ilootuata, naa eikincho Kristo ewang'an.”

¹⁵Eng'ura entabaraki eninkunariri te lototo, mme anaa iltung'ana oomoda kake anaa lng'eni.

¹⁶Entaasishore enkata, amu torrok inkolong'i.

¹⁷Ore naa, emiaaku ilmoda, entoning'u eyieunoto o Laitoriani.

¹⁸Emimera te naisho oo sabibu amu emutata e nkishon ina; kake enchoo Enkiyang'et eiput intae.

¹⁹Entaranyisho to lkerempe le Nkai o sinkolioitin o rrepeta e nkiyang'et, iranyishosho aaisis Olaitoriani too ltauja linyi pooki.

²⁰Ore anaake o too mbaa pooki enchooi enashe te nkarna o Laitoriani lang Yesu Kristo aaisho Enkai Papa.

²¹Entoning'oto maate te nkaraki naa Kristo iyanyititi.

²²Nakituaak, entoning ilpayiani linyi anaa enining'ining'i Olaitoriani,

²³amu olpayian elukunya e nkitok anaa paa Kristo elukunya e sirit, ilo sesen lenye, naa ninye Olaitajeunoni lenye.

²⁴Ore anaa enaning esirit Kristo, enchoo etiu sii ninche inkituaak neijia aaning ilpayiani lenye to mbaa pooki.

²⁵Lo payiani, entonyor inkituaak inyi, anaa enatonyorra Kristo esirit neishooyo kewan te nkaraki ninye,

²⁶pee etum aitisinya ninye, eidipa aisuja te nkitukuoto e nkare o te nebo ilo rorei,

²⁷pee etum aitaiki kewan ina sirit te sikar nemeeta entibili aashu emuguta aashu eeta ae ake toki nayia neijia, pee etum esirit ataa sinyati nemeeta eleyiata.

²⁸Neijia sii etiu ilpayiani, keishiaakino nenyor inkituaak enye anaa iseseni lenye maate. Ore olonyor enkitok enye, kewan enyor.

²⁹Amu meetae aekata oltung'ani oiba osesen lenye makewan, kake keitoti neramat ninye, anaa enaramat Kristo esirit,

³⁰amu kira iyiook irubat o sesen lenye!

³¹Ore te nkaraki ena “Kelo olee aing'uaa menye o ng'otonye neibung'are enkitok enye, neaku pokira are nabo.”

³²Enkisudoroto kitok ena, naa Kristo elimu o kanisa.

³³Ore etiu neijia, nchoo ake pooki ng'ae linyi enyorru enkitok enye anaa enanyor kewan, naa nchoo enkitok eyanyit olpayian lenye.