Read MAASAI REVISED PROTESTANT Ile Efeso 6 Bible Online

Ile Efeso 6 - MAASAI REVISED PROTESTANT bible

Ile Efeso 6

¹Nakera, eyanyita intoiwuo inyi tiatua Olaitoriani, amu aisidai ina.

²“Iyanyita papaai lino o yieyio lino.” (Ena kitanapata naituruk neeta enkisiligata),

³“Pee eitobirari mbaa inyi nibikibiki inkolong'i kumok te nkop.”

⁴Ore intae intoiwuo, emintagor inkera inyi, kake entubulu ninche te nkitamioto o te utaroto o te nkiteng'enare o Laitoriani.

⁵Lo rrindiki, entoning intae lelo oora ilaitoriak linyi te nkop te nkuretisho o lokirikiri, to ltau obo, anaa eninkoko Kristo;

⁶neme eji pee edoli intae, anaa ilooitiship iltung'ana, kake anaa ilaisiaayiak le Kristo, iasiasa eyieunoto e Nkai eing'uaa atua ltauja.

⁷Nisiaaishosho te yieunoto sidai anaa eninkoko to Laitoriani neme anaa too ltung'ana,

⁸iyiololo aajo ore esupat ake pooki naas oloas, neyooki ake atum ina nataasa eing'uaa Olaitoriani, aa osinka aashu ololakuno.

⁹Lo aitoriak, nena ake entaasa sii intae isinkan linyi, naa embooi olbuaa, iyiololo aajo ketii keper Olaitoriani lenye naa olinyi sii intae, nemeeta ninye olkep.

¹⁰Ore enabayie, entagol tiatua Olaitoriani o te ngolon e nkidimata enye.

¹¹Enchopo iruparen pooki e Nkai, pee indimidimi aaitasho aairisha ilosekin pooki le Sheitani.

¹²Amu mikiarare iyiook osesen o sarge, kake ilaitoriak kiarare, nikiarare engolon oo mpukunot kumok, nikiarare ilaitoriak le nkop lena aimin e taata, nikiarare ilororani loo nkiyang'eta torrok too wuejitin e oloing'ang'e.

¹³Ore te nkaraki ina, enchopo iruparen pooki e Nkai, pee indimidimi intae aairishisho teina olong torrono paa ore indipa aataas pooki, nintasheshe.

¹⁴Entashoito naa iterretena mpolosi inyi te sipata, ninchopo elong'o e supatisho too lgooitie linyi,

¹⁵ninchopokito nkejek inyi inamuka oo Lomon Supati le seriani.

¹⁶Ore enaaisul te nena pooki embung'a elong'o e nkirukoto naa ninye naidimie intae entushurie nena baa pooki e ilo torrono naayupuyup.

¹⁷Naa enchopo enkopiyia e njeunoto nimbung'ubung'u olalem le Nkiyang'et laa ninye ororei le Nkai.

¹⁸Entoomon inkatitin pooki te Nkiyang'et te nkomono pooki o eomonokinoto. Ore teina, entashololoto te ncheikinoto iomonokiki isinyat pooki,

¹⁹o nanu sii, pee aaisho Enkai enajo paa tenabol enkutuk, nairo te mpijan alikioo mbaa naaisudoro e kulo Omon Supati,

²⁰laa te nkaraki ninche pee ara olbalusui oena too lpisia; pee atum atolikioi te mpijan, anaa enaishiaakino nairo.

²¹ Ore taata pee iyiolouu sii intae enaikununo o enaasita, Tikikos olalashe lang onyorri naa olaisiaayiani oisiligayu tiatua Olaitoriani olotu ainosaki intae imbaa pooki.

²²Nanu oirriwua ninye enitii te nkaraki ena pee iyiolouu enaikununo, netum ninye aitagolo iltauja linyi.

²³Menoto ilalashera eseriani o enyorrata te nebo enkirukoto naing'uaa Enkai Papa o Laitoriani Yesu Kristo.

²⁴Metobiko empiris te nebo lelo pooki oonyor Olaitoriani lang Yesu Kristo te nyorrata nemeye.