Read MAASAI REVISED PROTESTANT Ilfilipi 2 Bible Online

Ilfilipi 2 - MAASAI REVISED PROTESTANT bible

Ilfilipi 2

¹Metaa tenaa keetae enkitagoloto tiatua Kristo, te netii enkilejilejata e nyorrata, te netii enchula tiatua Enkiyang'et te netii enkaripo o lng'ur.

²Entabai naa eng'ida ai, aaku ile ndamunoto nabo o nyorrata nabo niaatata oltau obo nidamumu nabo.

³Emiaas ae bae te nkesha aashu te nkitokoos, kake te nkitadounoto e kewan meetae olemeitulusoo olikae aitalang kewan.

⁴Nchoo pooki te intae meaku mbaa enyena ake eing'or kake nchoo sii eing'or inoo lkulikae.

⁵Enoto ena damunoto tiatua intae maate niaatata sii tiatua Kristo Yesu,

⁶aa ore hoo neeta empukunoto e Nkai, neitu ninye eiken ina narisiore Enkai anaa ae toki naaji najo apidilakino,

⁷kake eitoroka ninye kewan neitanyaanyukie kewan osinka, neini anaa iltung'ana.

⁸Ore ake pee edoli eeta empukunoto e tung'ani neitadou kewan, nening'isho o metabaiki keeya, o metabaiki ina keeya te nchumata osalaba.

⁹Ore te nkaraki ena neitaa ninye Enkai kitok oleng, neisho ninye enkarna nalang inkarn pooki,

¹⁰neaku ore te nkarna e Yesu naa kegil pooki ng'ae kung, te keper o te nkop o ti abori enkop,

¹¹neibalunye pooki ng'ejep inchere Yesu Kristo ninye Olaitoriani, te nkitoo e Enkai Papa.

¹²Ore naa ilanyor laainei, anaa enitoning'ishote oshi ake neijia sii enkuna ake o taata mme tenatii ake kake eisulaki oleng matii, entabai enjeunoto inyi te nkuretisho o te nkikirikirata.

¹³Amu Enkai naasisho tiatua intae, te pokira are, te yieunoto o te asata inyi te nkaraki yieuna enye sidai.

¹⁴Entaas mbaa pooki metii enking'unyung'uny anaa nkikilikuanat,

¹⁵pee metumi ake eleyiata napiki intae niaakuku nkera e Nkai nemeeta eleyiata tiatua ena kishon torrono niwang'ung'u aaku ewang'an te na kop;

¹⁶imbung'itata aakurraki ororei le mpuaan pee aa ore te nkolong e Kristo nawuasare intae nchere eitu akuet pesho aashu aisiaaisho pesho.

¹⁷Tenaa naaji ninye kaabukokini shumata olasar le enkirukoto inyi naa kang'ida nashipa nanu te nebo intae pooki.

¹⁸Ore teina, entishipata sii intae ning'idada te nebo nanu.

¹⁹Aisilig tiatua Olaitoriani Yesu ajo kairriu Timoteo meeu enitii asieku, pee aaitiship ilomon linyi.

²⁰Maata likae laaijo ninye oing'or negolie mbaa inyi oleng.

²¹Mbaa enye ake eing'or ilkulikae, pooki neme nena e Yesu Kristo.

²²Kake iyiololo intae tipat e Timoteo, nchere ore anaa enkerai o menye, netaasishe te nebo nanu tiatua ororei supat.

²³Kaisilig naa ajo kairriu asioki tenayiolou mbaa aainei eneikunari;

²⁴naisilig tiatua Olaitoriani nchere kalotu sii nanu makewan asieku.

²⁵Atoduaa ajo keishiaakino nairriwaki intae Epafroditas olalashe lai, naa olaisiaayiani te nebo nanu, osikari te nebo nanu, naa olkipaaret linyi naa olaisiaayiani too nkolati aainei.

²⁶Amu eyieuta oshi neduaare intae pooki, nenoto osina oleng amu itoning'o aajo kesipa etamuoyia.

²⁷Etamuoyia o metinyikaki keeya kake eing'urrie Enkai neme ninye ake kake o nanu sii, pee matum ake osina aponiki likae sina.

²⁸Nanu oyieu neirriu ninye, ajo pee ing'idayuyu te nintokiki aadol ninye, nemaitoki sii nanu aata osina.

²⁹Entang'amu naa tiatua Olaitoriani te nchipai pooki niyanyititi iltung'ana ootiu inji.

³⁰Amu eyieu eye te nkaraki esiaai e Kristo, etipika enkishui enye batisho pee eitabaya enkisiaayiare inyi.