Read MAASAI REVISED PROTESTANT Ilfilipi 3 Bible Online

Ilfilipi 3 - MAASAI REVISED PROTESTANT bible

Ilfilipi 3

¹Ore enabayie, ilalashera laainei, enting'idata tiatua Olaitoriani. Tenasiraki intae aigil kuna nemaaitanaur, amu keitagol intae.

²Entodol ate te lelo diein, entodol ate te lelo aasak loo ntorrok, entodol ate te lelo oodung osesen.

³Amu iyiook emuratare nasipa, ilooserem Enkai te nkiyang'et, nikiwuasare Kristo Yesu, nimiking'idare osesen.

⁴Ore hoo duoo naata sii nanu makewan esipata pee ang'idare osesen, tenetii likae tung'ani ojo keeta esipata pee eng'idare osesen, nanu oisul.

⁵Te nkolong e isiet aatumurataki, nara ololorere loo Siraeli, lo losho le Benchamen, Olhebraniai, ore tialo nkitanapat nara Olfarisayoi,

⁶ore te nyuaata nara olaisilisiloni le sirit, ore te supatisho ti abori nkitanapat, nemaata eleyiata.

⁷Kake ore dupoto pooki apa naata, naikena aitaa pesho te nkaraki Kristo.

⁸Aikenayie ntokitin pooki aitaa pesho te nkaraki nemeeta enalang eyiolounoto e Kristo Yesu Olaitoriani lai. Ore te nkaraki ninye, naiturrayie ntokitin pooki naikenaa ajo etiu anaa nkik, pee atum Kristo.

⁹Naliooyu nanu tiatua ninye, maata esupatisho ai makewan naing'uaa nkitanapat, kake ina naing'uaa enkirukoto tiatua Kristo, ina supatisho naing'uaa Enkai nang'amuni te nkirukoto,

¹⁰pee ayiolou nanu ninye o engolon e mpiunoto enye, nang'arie olosilisili lenye, atiu anaa ninye tiatua keeya,

¹¹paa teneidimayu natum empiunoto aing'uaa ilootuata.

¹²Mme taa kaidipa anoto ena neme kaidipa ataa bayaroti, kake kanyokita aitaa enaai amu Kristo Yesu laaitaa olenye.

¹³Ilalashera, mme taa kaikena kewan ajo kaidipa aitaa enaai; kake ena nabo aas, aishoo maatorikinoto inaatii siadi, naekenya alo dukuya abaiki idia naipirakinore,

¹⁴nanyok aisarrisar pee abaiki idia rishata o enkishooroto o enkipototo e Nkai e shumata tiatua Kristo Yesu.

¹⁵Enchoo lelo lang ootubulutua te nkirukoto aabaya metadamu ena, naa te nepaashari intae indamunot ti ae toki, naa keibalakinye sii ninche intae Enkai.

¹⁶Emaibung'a ake intae te sipata ina nikindipa aatang'amu.

¹⁷Ilalashera, embung'ata entaa lasujak laainei, ning'oring'oro lelo ootiu neijia te nkishon enye amu iatata enkitanyaanyukoto te iyiook.

¹⁸Amu ore anaa enaidipa atoliki ntae, naa kaliki sii taata intae, ebaiki too lkiyio, kebik ilkumok anaa ilmang'ati lo salaba le Kristo.

¹⁹Ore enkiting'oto enye naa mutata, ore enkai enye naa inkoishuaa enye. Neng'idare enkurruna enye naa ntokitin e nkop eenikino indamunot enye.

²⁰Kake kira iyiook ile keper, naa ine eing'uaa Olaitajeunoni likiaanyita, Olaitoriani lang Yesu Kristo,

²¹laa ninye oyooki aibelekeny ele sesen lang oshal metotiwuo anaa ilo sesen lenye le nkitoo teina golon naidimie ninye metipika ebaiki ntokitin pooki abori enkitoria enye makewan.