Read MAASAI REVISED PROTESTANT 1 Ilsesalonike 3 Bible Online

1 Ilsesalonike 3 - MAASAI REVISED PROTESTANT bible

1 Ilsesalonike 3

¹Ore etaa meekure kindim aating'iria, nikinyorraa metung'uari iyiook oopeny te Atene.

²Nikirriutua iyiook Timoteo, olalashe lang naa osinka le Nkai tiatua Lomon Supati le Kristo pee elotu ashet intae tiatua enkirukoto inyi neilejilej sii intae;

³pee metii hoo obo linyi orinyo siadi te kulo sinaitin, amu iyiololo intae maate inchere erubata ang ina.

⁴Amu ore apa kitii te nebo intae, kitolikitio intae eado kop inchere keyookini aaisilisil iyiook; anaa enayewuo ake atiu, anaa eniyiololo intae.

⁵Ore te nkaraki ina neitu aitoki aidim ating'iria, nairriu Timoteo enitii ayiolou enkirukoto inyi, amu aturia ajo ebaiki netetema intae Sheitani neaku esiaai ang ene pesho.

⁶Kake ore taata eewuo Timoteo enikitii eing'uaa enitii intae, neinosaki iyiook ilomon sidain le nkirukoto o enyorrata inyi, nelimu inchere idamumu oshiaake iyiook too sidain niyieuu oleng nidolidolo iyiook anaa enikiyieu sii iyiook nikidol intae.

⁷Ore te nkaraki ena ilalashera, o nkanashera eilejilejaki yiook tialo emion o sinaitin lang pooki te nkaraki enkirukoto inyi.

⁸Amu ore taata naa aikinchu iyiook, tinintasheshe intae nimiwuatiwuatata tiatua Olaitoriani.

⁹Amu kebaa enashe nikindim aaishoo Enkai te nkaraki intae, te ng'ida pooki nikiaata te nkaraki intae te dukuya e Nkai.

¹⁰Kiomon aaitirrish kewarie o dama pee kitum aatodol intae pee kintoki aaduaa, pee kitum aaishoo intae ina nang'or tiatua enkirukoto inyi.

¹¹Kiomon naa taata metooroki iyiook Enkai ang naa Papa makewan o Laitoriani lang Yesu Kristo enkoitoi pee kipuonu enitii intae;

¹²metoponai Olaitoriani enyorrata te rishata inyi intae maate o too ltung'ana pooki anaa enikitiu iyiook te intae,

¹³pee etum ninye aitagolo iltauja linyi meeta entiyoto te sinyatisho te dukuya e Enkai ang naa Papa lang te lotunoto o Laitoriani lang Yesu te nebo isinyat lenyena pooki.