Read MAASAI REVISED PROTESTANT 1 Ilsesalonike 5 Bible Online

1 Ilsesalonike 5 - MAASAI REVISED PROTESTANT bible

1 Ilsesalonike 5

¹Kake ore too naaipirta inkatitin o rishat ilalashera o nkanashera nemeeta tipat pee eigerokini intae ae bae.

²Amu iyiololo intae maate oleng inchere kelotu enkolong o Laitoriani anaa olapurroni te nkewarie.

³Ore ejo olorere, “Keetae eseriani nemeetae batisho,” ore nabo kata nelotu erruorroto shumata ninche anaa emion nainepu enkitok nairoshiwuo nemeeta eneilanyaki.

⁴Kake mitii intae atua enaimin ilalashera metaa keluam intae ina olong anaa olapurroni.

⁵Amu kira iyiook pooki inkera e wang'an o nkera e ndama, metaa mikira ile nkewarie aashu ile naimin.

⁶Ore te nkaraki ina, emikirura naa anaa enairura kulikae, kake matashololoto nikinteng'enuo.

⁷Amu ore kuldo ooirura naa kewarie eirura ore kuldo oomera naa kewarie emera.

⁸Kake ore amu kira ile ndama emaiteng'enuoto nikinchop elong'o oo lgooitie aa enkirukoto o enyorrata, ore enkopiyia ang naa osiligi le njeunoto.

⁹Amu mme engoro enye eyieu Enkai nikinting'oki kake pee kitum enjeunoto naimu Olaitoriani lang Yesu Kristo,

¹⁰otua te nkaraki iyiook paa te naa aikinchu aashu kituata nikinchu te nebo ninye.

¹¹Neaku entagoloto oishuaa o likae o likae naa enteshetata olikae o likae anaa ina niaasitata.

¹²Kake kisai intae, ilalashera o nkanashera, enchoo enkanyit lelo ooasisho tiatua intae, anaa ilairukok outaa ntae tiatua Olaitoriani neikok intae.

¹³Enchoo ninche enkanyit sapuk nalus o enyorrata te nkaraki esiaai enye. Enchoo ejing eseriani atua intae maate.

¹⁴Nikisai intae ilalashera, enkoo ilturua nipikipiki enyuaata ilootapalari niretutu ilooshal, enting'iria te lelo pooki.

¹⁵Entodol pee melaaki oltung'ani olikae entorroni te ntorroni, kake entetem anaake entaasata isidain maate o ltung'ana pooki.

¹⁶Entishipata anaake.

¹⁷Entoomon pooki kata,

¹⁸enchooi enashe te pooki pukunoto, amu ena doi eyieunoto e Nkai te ntae tiatua Kristo Yesu.

¹⁹Nimisiorogogo Enkiyang'et Sinyati,

²⁰nimimenaa enaibon e Nkai.

²¹Kake eneneng'a pooki toki, embung'a entukurraki ina sidai.

²²Entalam empukunoto pooki e ntorroni.

²³Meitisinya intae Enkai e seriani makewan tukul, ore enkiyang'et inyi o ltau o sesen, metaa biyoto meeta entibili o metaa enkata e lotunoto o Laitoriani lang Yesu Kristo.

²⁴Ore ilo ooipot intae, keisiligayu naa keitabaya ninye.

²⁵Ilalashera entoomonoki iyiook.

²⁶Eroroki ilalashera pooki te ng'ututata sinyati.

²⁷Nasai intae to Laitoriani pee eisumakini ena palai ilalashera pooki.

²⁸Metaa empiris o Laitoriani lang Yesu Kristo tenebo intae.