Read MAASAI REVISED PROTESTANT Yoshua 1 Bible Online

Yoshua 1 - MAASAI REVISED PROTESTANT bible

Yoshua 1

¹Ore te siadi keeya e Musa ilo sinka lo Laitoriani, nejoki Olaitoriani Yoshua olayioni le Nuni ilo sinka le Musa,

²Etua Musa osinka lai; ore naa taata tudumunye, shomo talang'a Yordan, iyie o kulo tung'ana pooki, enchom atua ina kop naishorita nanu ninche, iltung'ana le Israel.

³Ore pooki wueji neroro iroruat oo nkejek inyi aishoo nanu intae, anaa apa enaisiligie nanu Musa.

⁴Eiteru to olpurkel o ena Lebanon o metabaiki olkeju kitok, ilo keju le Frati, enkop pooki oo Lhiti o metabaiki enaiposha kitok te nkalo e ndoyioroto e nkolong, naa keaku enkop inyi.

⁵Meetae oltung'ani likindim aitasheikinore too nkolong'i pooki e nkishui ino. Ore apa anaa enatii nanu te nebo Musa, neijia aiko kaaku nanu te nebo iyie; maaitiak nanu iyie nemaaing'uaa nanu iyie.

⁶Tonyuaa nintagoluo amu iyie oidimie kulo metujung'o ina kop nainosie nanu olmumai too loo menye pee aisho ninche.

⁷Tonyuaa ake duoo iyie nintagoluo oleng, ning'or pee ias te risioroto e nena kitanapat pooki apa nikintanapa Musa osinka lai; mimbelekenya apaash alo enkaina e tatene aashu ene kedianye, pee itum aisula te pooki wueji neba anaa enilo.

⁸Ore ena buku oo nkitanapat mincho epuku te nkutuk ino, kake imbirribira imbaa enyena dama o kewarie, pee itum atujurru ataasa te risioroto e nena pooki naaigero tiatua ninye; amu ina kata ake ebul enkoitoi ino, naa ina kata itum enkisulata sidai.

⁹Keitu nanu aaitanap iyie? Tonyuaa ntagoluoyu; miureishoyu, niming'aeng'ae, amu ketii Olaitoriani Enkai ino te nebo iyie te pooki wueji nilo.

¹⁰Neitoki Yoshua aitanap ilkituaak loo ltung'ana ajoki,

¹¹Eima atua enkang oo lng'oborri, nintanapapa olorere, Entobira indaiki inyi; amu ore te rishata oo nkolong'i uni naa ilang'ilang'a intae Yordan, pee ipuopuo aaibung ina kop apa naishoo intae Olaitoriani Enkai inyi pee iyaya.

¹²Ore tialo ile Ruben o le Gad o lpisiai lo losho le Manase nejoki Yoshua,

¹³Entadamu ororei apa oitanapa intae Musa osinka lo Laitoriani, ejo, Ore Olaitoriani Enkai inyi naa keisho intae ewueji e nkiyeng'iyeng, naa keisho ninye intae ena kop.

¹⁴Ore inkituaak inyi o inkera inyi o inkishu inyi naa ketoni tiatua ina kop apa naishoo intae Musa te lido kekun le Yordan; kake ore iltung'ana pooki oogol tiatua intae nepuo etanapate te dukuya ilalashera linyi neretu ninche,

¹⁵o metaba anaa neisho Olaitoriani enkiyeng'iyeng ilalashera linyi o intae sii, neya sii ninche ina kop naisho ninche Olaitoriani Enkai inyi; nitumutumu taa aatushukokinoto enkop inyi, niyaya ninye, ina kop apa naishoo intae Musa osinka lo Laitoriani te lido kekun le Yordan te nkalo e nkilepunoto e nkolong.

¹⁶Newaliki ninche Yoshua aajoki, Ore nena pooki nintanapa iyiook naa eikiaas, ore eneba anaa enirriwaa iyiook naa eikipuo.

¹⁷Ore apa anaa enikitoning'o Musa too mbaa pooki, neijia sii kinko aaning iyie; metaa ake duoo ninye Olaitoriani Enkai ino te nebo iyie, anaa apa enatii te nebo Musa!

¹⁸Ore oloba anaa olikipaash aany enkitanapata ino negolong'aki irorei linono, enaba anaa enintanap ninye naa keari metua. Tonyuaa ake duoo iyie nintagoluo.