Read MAASAI REVISED PROTESTANT Yoshua 10 Bible Online

Yoshua 10 - MAASAI REVISED PROTESTANT bible

Yoshua 10

¹Ore apa pee ening Adoni-sedek olaiguanani le Yerusalem eneikuna Yoshua pee eibung Ai, neidaikie ninye katukul, aitaas Ai o laiguanani lenye anaa apa enaitaasa Yeriko o laiguanani lenye, o ina naitobira lelo oomanya Gibeon eseriani o Israel nemanya atua ninche.

²Neureishoyu ninye oleng, amu enkanasa kitok apa Gibeon, anaa ake duoo ae anasa e nkitoo o te nkaraki naa eikitok apa alang Ai naa magil iltung'ana lenyena pooki.

³Ore te nkaraki ina neirriwaki Adoni-sedek olaiguanani le Yerusalem Hoham olkilikuai ilo aiguanani le Hebron o Piram olaiguanani le Yarmut o Yafia olaiguanani le lakish, neirriwaki sii Debir olaiguanani le Eglon, ejoki,

⁴“Wootu enatii nanu, entaretuoki nanu, emataar iyiook Gibeon; amu eitobira ninye eseriani o Yoshua o te nebo iltung'ana le Israel.”

⁵Ore lelo aiguanak pokira imiet loo Lamori, o ilo aiguanani le Yerusalem o ilo aiguanani le Hebron o ilo aiguanani le Yarmut o ilo aiguanani le Lakish o laiguanani le Eglon neiturrur iltimito lenye, nepuo ninche te nebo injorin enye pooki neitayu ninche ilng'oborri aaipirakinore Gibeon, neitayunye ninye olarrabal.

⁶Neirriwaki lelo tung'ana le Gibeon Yoshua olkilikuai too lng'oborri te Gilgal, aajoki, “Miyeng'iyeng'ie iyie enkaina te nkaraki isinkan linono; tasieku wou enikitii, pee intajeu iyiook, niretu iyiook, amu ore kulo aiguanak pooki loo Lamori oomanya enkop oo ldoinyo neiturrurrote te nkaraki iyiook.”

⁷Neaku eilepa apa Yoshua te Gilgal, ninye o ltung'ana pooki lo larrabal te nebo ninye o ltung'ana pooki magil oodupa.

⁸Nejoki Olaitoriani Yoshua, “Miureyu ninche, amu aishooyie nanu ninche apik atua inkaik inono; meitashe hoo oltung'ani lenye te dukuya intae.”

⁹Neaku eewuo apa Yoshua enetii ninche aipang'aki te luamata, eewuo apa enkewarie pooki eing'uaa Gilgal.

¹⁰Nepik ninche Olaitoriani olkirutoto te dukuya Israel. Nesesekuan Israel Ilamori te sesekuanata kitok te Gibeon, nemiraa ninche aaimie enkoitoi nashong'ishong e Bet-horon near ninche metuata o metabaiki Aseka o Makeda.

¹¹Naa ore eisikita ninche te dukuya Israel, epuoito ninche aadoyio to loshong'ishong'i le Bet-horon, nenang'u Olaitoriani aitadou isoito sapuki aitung'uaa shumata aitadoiki ninche ebaiki Aseka, neye ninche; ilkumok apa ootuata te nkaraki isoito le nchan aalang iltung'ana ootara Israel to lalem.

¹²Neitoki Yoshua airorie Olaitoriani teina olong apa naishooyie Olaitoriani Ilamori aisho iltung'ana le Israel; nejo ninye te dukuya Israel, “Na olong, intasho iyie intirring'ayu te Gibeon, naa ore sii iyie Lo apa intasho to erata le Ajalon.”

¹³Neitashe enkolong aitirring'a, neuno olapa, o metaba anaa neitalaku ilo osho elap too lmang'ati lenye. Aimeigero ena tiatua embuku e Yashar? Eitasho enkolong te mpolos e shumata, neitu eitasim adoyio te ndama pooki.

¹⁴Eitu aekata etumi enkolong naaijo ena too nkolong'i naatulusoitie o too naatusujutua, eji nening Enkai oltoilo lo ltung'ani; amu etijing'a apa Olaitoriani olarrabal te nkaraki Israel.

¹⁵Neitoki Yoshua ashukunye o Israel pooki te nebo ninye aapuonu ilng'oborri te Gilgal.

¹⁶Neisik apa kulo aiguanak pokira imiet, neisudoo ate tiatua enkapune te Makeda.

¹⁷Netolikioki apa Yoshua aajoki, “Ore lelo aiguanak pokira imiet nenotoki eisudori tiatua enkapune te Makeda.”

¹⁸Nejo Yoshua, “Emperiperaki isoito sapuki enkutuk e ina apune, nipikipiki iltung'ana embata enye pee errip ninche;

¹⁹kake emitonini intae teine, entusujai ilmang'ati linyi, entadoiki ilo kidong'oe lenye, emincho ninche metijing'a inkanas enye; amu eishorua Olaitoriani Enkai inyi apik atua enkaina inyi.”

²⁰Ore ake pee eidip Yoshua o ltung'ana le Israel aatasesekuan ninche te sesekuanata kitok, o metaba anaa nejutuni ninche, ore ake ilo pisiai, aashu ore ake ilo pisiai lenye otelekua pee ejing atua nena ang'itie naagol naasheta sunta,

²¹neshukunye iltung'ana pooki eserian aapuonu enetii Yoshua too lng'oborri te Makeda; nemetii ninye oltung'ani hoo obo otabolo enkutuk te ntorroni tialo likae tung'ani ninye obo le Israel.

²²Neitoki Yoshua ajo, “Entabol enkutuk e nkapune nimpang'unyenye lelo aiguanak pokira imiet te nkapune aayau enatii nanu.”

²³Neiko ninche neijia, neyau lelo aiguanak pokira imiet aaitayu te nkapune aayaki ninye, olaiguanani le Yerusalem o laiguanani le Hebron o laiguanani le Yarmit o laiguanani le Lakish o laiguanani le Eglon.

²⁴Ore ake pee eipang'unye ninche lelo aiguanak aayau enetii Yoshua, neipotu Yoshua iltung'ana pooki le Israel, nejoki lelo kituaak apa loo ltung'ana le njore ooshomo te nebo ninye, “Wootu entinyiku, entipik inkejek inyi enchumata oo murto e kulo aiguanak.” Nepuonu ninche aanyiku nepik inkejek enye nchumat oo murto e lelo aiguanak aaroro.

²⁵Nejoki Yoshua ninche, “Emiureishoyu niming'aing'ayaya; entagoluoto nipijuju; amu inji eiko Olaitoriani ilmang'ati linyi pooki laa ninche iararere.”

²⁶Ore te siadi near Yoshua ninche metuata, neilili ninche too lkeek imiet. Neililio ninche te lelo keek o metaa teipa;

²⁷kake ore te ndoyioroto e nkolong, neitanapisho Yoshua, meitayuni ninche aaitadou too lkeek, nenang'akini ninche atua ina apune apa naisudorie ate, nepik isoito sapuki enkutuk e ina apune, leton etii o metabaiki ena olong.

²⁸Neya apa Yoshua Makeda ina olong, near ninye olaiguanani lenye te nepi o lalem; neidaikie ninye tukul pooki tung'ani otii atua, eitu ninye eleku oltung'ani; neitaas ilo aiguanani le Makeda anaa apa enaitaasa olaiguanani le Yeriko.

²⁹Neitoki Yoshua alo agiroo Makeda, o Israel pooki te nebo ninye, nelo Libna, nearare Libna;

³⁰neitoki sii Olaitoriani aishooyo ninye o laiguanani lenye apik atua enkaina e Israel; near Yoshua ninye te nepi o lalem, o pooki tung'ani otii atua ninye; eitu ninye eleku oltung'ani obo tiatua ninye eishu; neitaas olaiguanani lenye anaa apa enaitaasa olaiguanani le Yeriko.

³¹Neitoki Yoshua te nebo Israel pooki aagiroo Libna, nepuo Lakish, nemuat aaman ninye, neibung ninye.

³²Neishooyo Olaitoriani Lakish apik atua enkaina e Israel, neya ninye te nkolong e are, near ninye te nepi o lalem, o pooki tung'ani otii atua ninye, anaa apa enaitaasa ninye Libna.

³³Neitoki Horam olaiguanani le Geser alotu aretu Lakish; near Yoshua ninye o ltung'ana lenyena o metaba anaa neing'uaa ninye meishu hoo oltung'ani obo.

³⁴Neitoki Yoshua te nebo Israel pooki aagiroo Lakish nepuo Eglon; neng'adu ninche ninye, neibung ninye;

³⁵neya ninche ninye ina olong, near ninye te nepi o lalem; ore pooki tung'ani otii atua ninye neidaikie tukul ina olong, anaa apa enaitaasa Lakish.

³⁶Neitoki Yoshua te nebo Israel pooki aagiroo Eglon nepuo Hebron; neibung ninche ninye,

³⁷neya ninye, near ninye te nepi o lalem, olaiguanani lenye o nkang'itie enyena, o pooki tung'ani otii atua; eitu ninye eleku oltung'ani hoo obo oishu anaa apa enaitaasa Eglon, neidaikie ninye tukul te nebo pooki tung'ani otii atua ninye.

³⁸Neitoki Yoshua, te nebo Israel pooki, aashukunye aapuonu Debir neibung ninye,

³⁹neya ninye te nebo olaiguanani lenye o nkang'itie enyena pooki; near ninche te nepi o lalem, neidaikie tukul pooki tung'ani otii atua ninye, eitu ninye eleku oltung'ani obo eishu; ore anaa apa enataasa te Hebron o te Libna o laiguanani lenye neijia sii eikuna Debir o laiguanani lenye.

⁴⁰Neaku eisula apa Yoshua enkop pooki, ina kop oo ldoinyo e Negeb o ina kop nagum o neeshong'ishong o laiguanak lenye pooki; eitu ninye eleku hoo oltung'ani oishu, kake eidaikie tukul pooki ng'ae oishu anaa apa enaitanapishe Olaitoriani Enkai e Israel.

⁴¹Nemir apa Yoshua ninche ebaiki Kadesh-Barnea o metabaiki Gasa o enkop pooki e Goshen ebaiki Gibeon.

⁴²Neya apa Yoshua kulo aiguanak pooki o nkuapi enye te nkata nabo, amu etijing'a Olaitoriani Enkai e Israel olarrabal te nkaraki Israel.

⁴³Neshukunye taa Yoshua o Israel pooki te nebo ninye, aapuonu ilng'oborri te Gilgal.