Read MAASAI REVISED PROTESTANT Yoshua 11 Bible Online

Yoshua 11 - MAASAI REVISED PROTESTANT bible

Yoshua 11

¹Ore ake pee ening Yabin olaiguanani le Hasor ena, neirriwaki olkilikuai Yobab olaiguanani le Madon o laiguanani le Shimron o laiguanani le Akshaf;

²o laiguanak apa ootii moikuape ina kop oo ldoinyo o atua Araba kopikop e Kineret o atua ina kop nagum o atua Nafat-dor te nkalo o loontoluo,

³Ilkanaani te nchoto o loo saen o to loontoluo o Lamori o Lhiti o Lperisi o Lyebusi, tiatua ina kop oo ldoinyo, o Lhifi ti abori Harmon tiatua enkop e Mispa.

⁴Neipang'u ninche aapuonu, te nebo iltimito lenye pooki, olorora kitok, eba esiana enye anaa osinyai le mbata e naiposha, neeta imbartan kumok oleng o ngarrin oo mbartan.

⁵Ore apa kulo aiguanak pooki neitutum injorin enye, nepuonu aaitayu ilng'oborri te nebo too nkariak e Merom, pee earare Israel.

⁶Nejoki Olaitoriani Yoshua, “Miureyu iyie ninche, amu ore taaisere tena saa naa kaishoru nanu ninche pooki aisho Israel etuata. Tasesekuana nidung'udung'u irrisheta oo mbartan enye, nipejoo ingarrin enye oo mbartan te nkima.”

⁷Neaku eewuo apa Yoshua aipang'aki ninche nabo kata te nebo iltung'ana lenyena pooki lo larrabal, te mbata oo nkariak e Merom, nedoiki ninche.

⁸Neishooyo Olaitoriani ninche apik atua enkaina e Israel, apa ootara ninche nemiraa ninche eneba anaa Sidon kitok o Mirsefot-maim o enkalo o loo saen eneba anaa oerata le Mispe; nesesekuan ninche o metaba anaa neing'ua ninche eitu ninye eleku oltung'ani oishu.

⁹Neitaas Yoshua ninche anaa enaitanapa Olaitoriani ninye; etudung'o irrisheta mbartan enye, nepejoo ingarrin enye oo mbartan te nkima.

¹⁰Neibelekenya Yoshua teina kata, neya Hasor, nesesekuan olaiguanani lenye to lalem; amu ore apa Hasor naa ninye endukuya e nena kitoriat pooki.

¹¹Neidakie ninche lelo pooki apa ootii atua ninye, aaidaikie ninche tukul; eitu ninye eing'uari obo leton eiresa, nepejoo ninye Hasor te nkima.

¹²Ore apa inkanas pooki e lelo aiguanak o laiguanak lenye pooki, neya Yoshua ninche near ninche te nepi o lalem, aidaikie ninche tukul, anaa apa enaitanapishe Musa osinka lo Laitoriani.

¹³Kake meetae apa enkanasa hoo nabo te nena apa naaitashe too ldoinyo natapejoitie Israel, meteleku ake Hasor, naa ninye etapejoyie Yoshua.

¹⁴Ore imasaa pooki e kuna anas o nkishu neya iltung'ana le Israel aaitaa intokitin naataraitie, kake ore pooki tung'ani nesesekuan ninche te nepi o lalem, o metaba anaa neidaikie ninche tukul, neitu ninye eleku obo eiresa.

¹⁵Anaa apa enaitanapa Olaitoriani Musa osinka lenye, neitanapa sii apa Musa Yoshua, netaasa apa Yoshua ina; eitu ninye eing'uaa ae toki measa te nena apa pooki naaitanapa Olaitoriani Musa.

¹⁶Neaku ewa apa Yoshua ina kop pooki, ina kop oo ldoinyo o Negeb pooki o enkop e Goshen pooki o ina kop pooki nagum o Araba o ina kop oo ldoinyo e Israel o enkop nagum,

¹⁷ebaiki oldoinyo le Halak, ilo oshumunye aing'or Seir o metabaiki Baalgad to erata le Lebanon ti abori oldoinyo le Harmon. Neya ninye ilaiguanak lenye pooki, nesesekuan ninche.

¹⁸Neitayuo apa Yoshua olarrabal te nkata naado o lelo aiguanak pooki.

¹⁹Meetae apa ninye enkanasa nabo naitayio osotua o Israel, meteleku ake Ilhafi, lelo oomanya Gibeon; nerik apa ninche pooki olarrabal.

²⁰Amu enkitobirata apa o Laitoriani pee eitagol iltauja lenye pee etum aaetu aataarare Israel to larrabal, pee etumi aaidaikie ninche katukul, nemeng'amu ninche olng'ur kake pee eishuni anaa apa enaitanapa Olaitoriani Musa.

²¹Nelotu Yoshua teina kata, nejutu katukul aiwuang'ie ile Anakim teina kop oo ldoinyo, neiwuang'ie te Hebron, neiwuang'ie te Debir, neiwuang'ie te Anab, neiwuang'ie sii teina kop oo ldoinyo e Yuda, neiwuang'ie sii teina kop oo ldoinyo e Israel; neidaikie Yoshua ninche tukul te nebo inkanas enye.

²²Meetae apa hoo obo le Anakim otelekua tiatua enkop oo ltung'ana le Israel; te Gasa ake, tiatua Gati o tiatua Ashdod, etelekutua embata.

²³Neaku ewa apa Yoshua enkop pooki te risioroto e nena pooki apa naatiaka Olaitoriani Musa, neishooyo Yoshua metaa enjung'ore te Israel te risioroto eorikinoto oo loshon lenye. Neitirring'a enkop to larrabal.