Read MAASAI REVISED PROTESTANT Yoshua 15 Bible Online

Yoshua 15 - MAASAI REVISED PROTESTANT bible

Yoshua 15

¹Ore apa erubata oo ltung'ana lo losho le Yuda te risioroto oo lmareita lenye nelo abaiki enkalo e moikuape o metabaiki olpolosie le Edom, o metabaiki olpurkel le Sin te nelakua oleng te nkalo e moikuape.

²Ore olpolosie lenye le enkalo e moikuape nedumunye te nkiting'oto Enaiposha e Munyan ebaiki olkina le naiposha oing'or enkalo e moikuape:

³Nelo aipir enkalo e moikuape enkilepakinoto e Akarabim, negiroo o meshomo Sin nelo o metabaiki moikuape e Kadesh-Barnea, aipirakinore Hesron, o metabaiki Adar, neb o ina o metabaiki Karka,

⁴negiroo o metabaiki Asmon, neipang alo o metabaiki enong'oto e Misiri, nelotu enkiting'oto enye te naiposha. Ele oaku olpolosie linyi te enkalo e moikuape.

⁵Ore olpolosie le enkalo o loo saen naa Enaiposha e Munyan naisukut, o metabaiki enkutuk o lkeju le Yordan. Ore olpolosie le enkalo e kopikop neiteru te mbata e naiposha te nkutuk o lkeju le Yordan;

⁶nelo ilo polosie o metabaiki Bet-hogla, nelo agiroo kopikop e Bet-araba; nelo ilo polosie o metabaiki osoit le Bohan olayioni le Ruben;

⁷nelo ilo polosie o metabaiki Debir ebaiki oerata le Akor o meshomo enkalo e kopikop, neibelekenya aing'or Gilgal, aa ninye apa natalakinore enkilepakinoto e Adamin, aa ninye apa natii enkalo e moikuape e ilo erata; nelo ilo polosie o metabaiki inkariak e En-shemesh, nelo aiting te En-rogel;

⁸neitoki ilo polosie adumunye o meshomo embata oerata lo layioni le Hinom te murte moikuape oo Lyebusi (aa taa Yerusalem) nelo ilo polosie o metabaiki enchumata e ilo doinyo otalita oerata le Hinom, te enkalo o loo ntoluo te enkalo e moikuape teine neiting'ie o erata le Refaim;

⁹neitoki ilo polosie ayiatari te nchumata e ilo doinyo o metabaiki enkong'u oo nkariak e Neftoa nedumunye teine o metabaiki inkanas o ldoinyo le Efron; neitoki ilo polosie aloja nemanaa nelo Baala (aa taa, Kiriat-yearim);

¹⁰neman ilo polosie enkalo oloontoluo le Baala o metabaiki oldoinyo le Seir, negiroo o meshomo e nkishong'ishong'ata o ldoinyo le Yearim (aa taa Kesalon) te nkalo e kopikop nedoyio o meshomo Betshemesh, nelo agiroo Timna.

¹¹Nelo ilo polosie o metabaiki e nkishong'ishong'ata o ldoinyo te nchoto e kopikop e Ekron, neitoki ilo polosie aloja nemanaa o meshomo Shikeron, negiroo alo o metabaiki Yabneel; nelo ilo polosie o meiting'oki enaiposha.

¹²Ore apa olpolosie le nkalo o loo ntoluo naa ina aiposha kitok o ilo omanaa lenye. Ele ninye olpolosie omanita iltung'ana le Yuda te risioroto oo lmareita lenye.

¹³Ore te risioroto e nkitanapata o Laitoriani naitanapa Yoshua, eishoo ninye Kaleb olayioni le Yefune erubata tiatua iltung'ana le Yuda, Kiriat-arba, aa taa Hebron (Arba apa menye le Anak).

¹⁴Nearaa apa Kaleb teine lelo ayiok pokira okuni le Anak, Sheshai o Ahiman o Talmai, lelo le ishoi e Anak.

¹⁵Neilep ninye teine alo aarare lelo oomanya Debir; ore apa enkarna e Debir ti apa naa keji Kiriat-seper.

¹⁶Nejo apa Kaleb, “Ore Oltung'ani oar Kiriat-seper, neya ninye, naisho nanu ninye Aksa entito ai meyama.”

¹⁷Neya Otniel olayioni le Kenas, olalashe le Kaleb, neisho Kaleb ninye Aksa entito enye meyama.

¹⁸Ore pee elotu Aksa enetii Otniel nejoki meikilikuana papaai lenye meishoo enkop, nedou Aksa ninye to sikiria lenye, nejoki Kaleb ninye, “Kainyoo iyie iyieu?”

¹⁹Nejoki ninye, “Inchooki nanu enkishooroto; ore kitipika nanu atua enkop e Negeb, nyaaki sii nchooki nanu inkonyek oo nkariak.” Neisho Kaleb ninye inkonyek oo nkariak e shumata o niabori.

²⁰Ena ninye enjung'ore o losho loo ltung'ana le Yuda te risioroto oo lmareita lenye.

²¹Ore inkanas naara inolosho loo ltung'ana le Yuda te nkiting'oto nkalo e moikuape tialo olpolosie le Edom, naa Kabseel o Eder o Yagur,

²²o Kina o Dimona o Adaba,

²³o Kedesh o Hasor o Itnan,

²⁴o Sifu o Talemu o Bealot,

²⁵o Hasor-hadata o Keriothesron (aa taa Hasor),

²⁶o Amam o Shema, o Molada,

²⁷o Hasar-gada o Heshmon o Bet-pelet,

²⁸o Hasar-shual o Beer-sheba o Bisiotia,

²⁹o Baala o Iyumu o Esem,

³⁰o Eltolad o Chesil o Horma,

³¹o Siklag o Madmana o Sansana,

³²o Lebaot o Shilhim o Ain o Rimon; ore te umata naa inkanas tikitam o obo tenebo inkang'itie kutiti.

³³Ore teina kop nagum naa Eshtaol o Sora o Ashna,

³⁴o Sanoa o En-ganim o Tapua o Enam

³⁵o Yarmut o Adulam o Soko o Aseka,

³⁶o Sharaim o Aditaim o Gedera o Gederotaim: inkanas tomon o ong'uan te nebo inkang'itie enye kutiti.

³⁷O Senan o Hadasha o Migdal-gad,

³⁸o Dilean o Mispe o Yokteel,

³⁹o Lakish o Boskat, o Eglon,

⁴⁰o Kabon o Laham o Kitilish,

⁴¹o Gederat o Bet-dagon o Naama o Makeda: inkanas tomon o ile te nebo inkang'itie enye kutiti.

⁴²O Libna o Eter o Ashan,

⁴³o Ifta o Ashna o Nesib,

⁴⁴o Keila o Aksib o Maresha: inkanas naaudo o nkang'itie enye kutiti.

⁴⁵O Ekron te nebo inkanas enyena o nkang'itie kutiti,

⁴⁶ebaiki Ekron o metabaiki enaiposha ina apa pooki natii embata e Ashdod, te nebo inkang'itie enyena kutiti.

⁴⁷Ashdod, inkang'itie enyena o nkang'itie enyena kutiti o metabaiki enong'oto e Misiri, o enaiposha kitok te nebo olomanaa lenye.

⁴⁸Ore teina kop oo ldoinyo, naa Shamir, Yatir, Soko,

⁴⁹o Dana o Kiriat-sana (aa taa Debir),

⁵⁰o Anab o Eshtemo o Anim,

⁵¹o Goshen o Holon o Gilo: inkanas tomon o obo te nebo inkang'itie enyena kutiti.

⁵²O Arabu o Duma o Eshan,

⁵³o Yanim o Bet-tapua o Ajeka,

⁵⁴o Humta o Kiriat-araba (aa taa, Hebron) o Sior: inkanas naaudo o nkang'itie enye kutiti.

⁵⁵O Maen o Karmel o Sifi o Yuta,

⁵⁶o Yesreel o Yokdeam o Sanoa,

⁵⁷o Kain o Gibea, o Timna: inkanas tomon te nebo inkang'itie enye kutiti.

⁵⁸O Halhul o Bet-sur o Gedori,

⁵⁹o Maarat, o Bet-anot o Eltekon: inkanas ile te nebo inkang'itie enye kutiti.

⁶⁰O Kiriat-baal (aa taa Kiriat-yearim) o Raba: inkanas are te nebo inkang'itie enye kutiti.

⁶¹Ore tiatua olpurkel, naa Bet-araba o Midin, o Sekaka,

⁶²Nibshan o Enkanasa e Munyan o En-gedi: inkanas ile te nebo inkang'itie kutiti.

⁶³Kake ore Ilyebusi, lelo oomanya Yerusalem, eitu eidimu iltung'ana le Yuda aatarai ninche; neaku etobiko apa Ilyebusi te nebo iltung'ana le Yuda te Yerusalem o metabaiki ena olong.