Read MAASAI REVISED PROTESTANT Yoshua 17 Bible Online

Yoshua 17 - MAASAI REVISED PROTESTANT bible

Yoshua 17

¹Neitokini aaisho erubata e nkop olosho le Manase, amu ninye apa olkikau le Yosef. O Makir olkikau le Manase, menye le Gilead, neorikini ninche Gilead o Bashan, amu oltung'ani apa lo larrabal.

²Neitokini aaoriki irubat lelo kulikae lo losho le Manase, too lmareita lenye, Abiesa o Helek o Asriel o Shekem o Hafer o Shenuda; kulo apa ilayiok ootoiuo Manase olayioni le Yosef, too lmareita lenye.

³Ore apa Selofehad olayioni le Hefer, olayioni le Gilead, olayioni le Makir, olayioni le Manase, nemeeta apa ilayiok, kake intoyie apake eeta; naa kuna inkarn e nena toyie enyena: Mahala o Noa o Hogla o Milka o Tinsa.

⁴Nepuonu ninche dukuya Eliesa olapolosani o Yoshua olayioni le Nuni o larikok, nejo, “Eitanapa apa Olaitoriani Musa pee eisho iyiook enjung'ore te nebo ilalashera lang.” Neaku ore te risioroto e nkitanapata o Laitoriani eishoo ninye ninche enjung'ore te nebo ilalashera le papaai lenye.

⁵Ina apa pee enoto Manase irubat tomon, metii enkop e Gilead o Bashan, apa naatii lido likae kekun le Yordan;

⁶te nkaraki natang'amutua intoyie e Manase enjung'ore te nebo ilayiok lenyena. Ore enkop e Gilead neorikini lelo kulikae le ishoi e Manase.

⁷Ore enkop e Manase nelo abaiki Asheri o metabaiki Mikmetat apa naa enkalo o loo saen le Shekem; nelo olpolosie enkalo e moikuape o metabaiki lelo oomanya Entapua.

⁸Ore apa enkop e Tapua naa ene Manase, kake ore enkang e Tapua apa natii olpolosie le Manase naa enoo layiok le Efraim.

⁹Nelo ilo polosie adoyio o metabaiki enong'oto e Kana. Ore inkanas tene, te enkalo e moikuape e nong'oto tiatua inkanas e Manase, naa ine Efraim. Nelo apa olpolosie le Manase enkalo e kopikop e ina nong'oto nelo aiting te naiposha;

¹⁰ore enkop te nkalo e moikuape naa ene Efraim, ore te enkalo e kopikop naa ene Manase, nelo enaiposha aitayu olpolosie; ore te enkalo e kopikop nebaiki Isaakar.

¹¹Ore ake sii tiatua Isaakar o tiatua Asheri neeta apa Manase Betshean o nkang'itie enyena o Ibleam o nkang'itie enyena o lelo oomanya Dori o nkang'itie enyena o lelo oomanya Endor o nkang'itie enyena o lelo oomanya Taanak o nkang'itie enyena o lelo oomanya Megido o nkang'itie enyena ore ene uni naa Nafat.

¹²Ore eyia, eitu apa eidimu ilayiok le Manase aaibung'a nena anas; kake eting'iriakinote Ilkanaani aabik teina kop.

¹³Kake ore apa pee eponari iltung'ana le Israel aagolu, nepik ninche Ilkanaani enkisiaayiare nagol, neitu earaa ninche tukul aaipang'ie.

¹⁴Neirorie olosho le Yosef Yoshua aajoki, “Kainyoo iyie pee kinchoo nanu erubata nabo o eoroti nabo metaa enjung'ore, hoo nara olosho loo ltung'ana kumok, naatamayiana nanu Olaitoriani aiko nji?”

¹⁵Nejoki Yoshua ninche, “Te nirara intae olosho loo ltung'ana kumok, elepa enchom entim, ore teine, nisiashakinyenye ate enkop teina kop oo Lperisi o ene Rafaim, amu ore ena kop oo ldoinyo e Efraim naa eironkai te intae.”

¹⁶Nejo olosho le Yosef, “Meidip iyiook ena kop oo ldoinyo; ore ake sii kulo Kanaani pooki oomanya enkop naisiasha naa keeta ingarrin oo mbartan oo sekenke, lekua ootii Betshean o nkang'itie enyena o lekua ootii oerata le Yesreel.”

¹⁷Neitoki Yoshua ajoki enkaji e Yosef o Efraim o Manase, “Irara intae olosho loo ltung'ana kumok, niatata enkidimata kitok; mintokiki intae aata erubata nabo ake,

¹⁸kake keaku eninyi ena kop oo ldoinyo, ore hoo naa entim, isiashayieyie intae niyaya ninye aaitabaiki ilpolosien lenyena oolakua; amu iyiookiki intae aaraa aaipang'ie lelo Kanaani, hoo neeta ninche ingarrin oo mbartan oo sekenke, negoli.”