Read MAASAI REVISED PROTESTANT Yoshua 23 Bible Online

Yoshua 23 - MAASAI REVISED PROTESTANT bible

Yoshua 23

¹Ore etulusoitie inkolong'i kumok, eidipa Olaitoriani aishoo Israel enkiyeng'iyeng tialo ilmang'ati lenye oomanita ninche, netamorua Yoshua oleng neaku oloo larin kumok.

²Neipotu Yoshua Israel pooki, ilpayiani lenye, o lukuny oo nkajijik, olarishak lenye o lkituaak, nejoki ninche, “Atamorua taata nanu nataa oloo larin kumok;

³nitoduaa intae nena pooki naaitaasa Olaitoriani Enkai inyi kuna kuapi pooki te nkaraki intae, amu Olaitoriani Enkai inyi ninye otijing'a olarrabal te nkaraki intae.

⁴Atoorikia nanu intae metaa enjung'ore too loshon linyi nena kuapi naang'or, te nebo inkuapi pooki naidipa nanu aiwuang'ie, ebaiki Yordan o metabaiki enaiposha kitok te nkalo o loo ntoluo.

⁵Kerrumoo ninche arriny siadi Olaitoriani Enkai inyi te dukuya intae nereu ninche aiwuang'ie too nkonyek inyi; naa iyaya intae enkop enye anaa apa enaisiligie intae Olaitoriani Enkai inyi.

⁶Metaa entuunoto embung'a niasiasa nena pooki naaigero tiatua embuku oo nkitanapat e Musa, nimimbelekenyanya aaing'uaa aapuo enkalo e tatene aashu enkalo e kedianye,

⁷pee mishularere ake kuna kuapi naatelekutua naatii atua intae, aashu impotipoto inkaitin enye, aashu inyanya olmumai te ninche, aashu isiaayiayia ninche, aashu irrugokinono ninche,

⁸kake enteenikinoto Olaitoriani Enkai inyi anaa enitaasa intae o metabaiki ena olong.

⁹Amu etaarayie Olaitoriani te dukuya intae inkuapi kituaak naagol, ore tialo intae meetae oltung'ani oidima aitasheikinore intae o metabaiki ena olong.

¹⁰Oltung'ani obo te intae odumu enkalifu meisika, amu Olaitoriani Enkai inyi otii olarrabal te nkaraki intae, anaa apa enaisiligie intae.

¹¹Entujurroto naa maate, pee inyorrurru Olaitoriani Enkai inyi.

¹²Amu ti nimbelekenyanya aaibung'are olpisiai le kuna kuapi naatelekutua tene tiatua intae niyamama o ninche, pee iyamiyama inkituaak enye neyam inkuninyi.

¹³Entayiolo te sipata nchere meitoki Olaitoriani Enkai inyi areu kuna kuapi te dukuya intae; kake keaku ninche orreshet te intae, enchipishipi too sunta inyi o lkiku too nkonyek inyi o metaba anaa nindaayaya aaishunye tena kop sidai naishoo intae Olaitoriani Enkai inyi.

¹⁴“Ore naa taata etaa nanu kalo anaa enapuo iltung'ana pooki, niyiololo intae too ltauja linyi o te nkishui inyi, intae pooki, nchere, meetae embae hoo nabo neitu ebaya te nena baa pooki sidain naaisiligishore Olaitoriani Enkai inyi tialo intae, eetuo pooki aabaya te nkaraki intae, meetae hoo nabo neitu ebaya.

¹⁵Kake ore anaa enaitabayioki nena baa pooki sidain naaisiligishore Olaitoriani tialo intae, neijia sii eiko Olaitoriani ayaki intae intorrok pooki o metaba anaa nemut intae aiwuang'ie tena kop sidai apa naishoo intae Olaitoriani Enkai.

¹⁶Ti nigiligili olning'o lo sotua lo Laitoriani Enkai inyi, apa oitanapa ninye intae, nipuopuo aaisiai kulie aitin, nirrugokinono ninche. Netum taa engoro o Laitoriani ayupuyupo te nkaraki intae nindaayaya intae aaing'uaa ina kop sidai naishoo ninye intae.”