Read MAASAI REVISED PROTESTANT Yoshua 3 Bible Online

Yoshua 3 - MAASAI REVISED PROTESTANT bible

Yoshua 3

¹Ore tadekenya enasirie nedumunye Yoshua nelo ninye Shitimu, te nebo iltung'ana pooki le Israel; nepuonu Yordan, neirrag ninche ine eton eitu elang.

²Ore te siadi inkolong'i uni neim ilkituaak atua ilng'oborri pooki

³neitanap iltung'ana aajoki, “Ti nidolidolo intae osanduku lo sotua lo Laitoriani Enkai inyi enapita ilapolosak le Lawi, nipuopuo aaing'uaa iwuejitin inyi aasuj ninye,

⁴pee itumutumu aatayiolo enkoitoi niimiimi, amu eitu ae kata iimiimi ena oitoi. Kake enchoo ejing erishata intae o ilo sanduku, erishata naba anaa intemat e nkaina inkalifuni are; emipuonunu intae aanyikaki ninye.”

⁵Neitoki Yoshua ajoki iltung'ana, “Entisinya ate; amu ore taaisere naa keas Olaitoriani inenking'asia tiatua intae.”

⁶Nejoki Yoshua ilapolosak, “Entudumu osanduku lo sotua enchom dukuya iltung'ana.” Nedumu ninche ilo sanduku lo sotua nepuo dukuya iltung'ana.

⁷Neitoki Olaitoriani ajoki Yoshua, Ore ena olong kaang'as nanu ailepie iyie too nkonyek e Israel pooki, pee etum ninche aatayiolo inchere, ore apa anaa enatii nanu te nebo Musa, kaaku sii te nebo iyie.

⁸Naa intanapa iyie lelo apolosak oonapita osanduku lo sotua, inchere, Ore pee ipuonunu aabaiki emurt e nkare e Yordan nintasheshe intae aaitirring'a te Yordan.

⁹Nejoki Yoshua iltung'ana le Israel, Wootu ene, entoning irorei lo Laitoriani Enkai inyi.

¹⁰Neitoki Yoshua ajo, Tena intae iyiolouu inchere ketii Enkai naishu atua intae, naa inchere meitadiak ninye eitu earaa te dukuya intae Ilkanaani o Ilhiti o Ilhifi o Ilperesi o Ilgilgashi o Lamori o Ilyebusi.

¹¹Ng'ura ajo ore osanduku lo sotua lo Laitoriani le nkop pooki naa kegiroo intae alo Yordan.

¹²Ore naa taata ewaita iltung'ana tomon oaare too loshon le Israel, to losho ake oltung'ani.

¹³Naa ore ake pee eroro indapi oo nkejek e lelo apolosak oonapita osanduku lo sotua lo Laitoriani le nkop pooki inkariak e Yordan, neitasheyieki inkariak e Yordan meitoki aaruko, ore nena ariak naadou eing'uaa shumata neitashe aarupa to lturrur obo.

¹⁴Neaku ore ake pee edumunye iltung'ana too lng'oborri lenye ejo pee elang Yordan to nebo lelo apolosak oonapita osanduku lo sotua te dukuya iltung'ana,

¹⁵ore ake pee epuonu lelo oonapita osanduku lo sotua Yordan, nedoiki inkejek e lelo apolosak oonapita osanduku atua enkare (naa kenang'ari apa Yordan aim ingilat te nkata pooki e nkikesare),

¹⁶ore inkariak naadou eing'uaa shumata neitashe aaku orupati olo enelakua abaiki Adam, ina anasa apa natii embata e Saretani, ore nena ariak naanang'ari aadoyio aapuo enaiposha e Araba, ina Aiposha e Munyan, nedung'o katukul; nelang iltung'ana aaim enkishaakinoto e Yeriko.

¹⁷Ore apa ina kata eimita Israel pooki enkop natoyio, ore lelo apolosak oonapita osanduku lo sotua lo Laitoriani neitashe te nkop natoyio te mpolos o lkeju le Yordan, o metaba anaa neidip olosho pooki atalang'a Yordan.