Read MAASAI REVISED PROTESTANT Yoshua 5 Bible Online

Yoshua 5 - MAASAI REVISED PROTESTANT bible

Yoshua 5

¹Ore ake pee ening ilaiguanak pooki loo Lamori apa ootii lido kekun le Yordan te nkalo o loo ntoluo o laiguanak pooki loo Lkanaani apa ootii embata e naiposha, inchere eitoyio Olaitoriani inkariak e Yordan te nkaraki iltung'ana le Israel o metaba anaa nelang'u nelepori ninche, neitu eitokini aata hoo obo oata oltau le mpijan te ninche, te nkaraki iltung'ana le Israel.

²Ore apa teina kata nejoki Olaitoriani Yoshua, Intobira nkalema oo soito naagol pee intoki amurat iltung'ana le Israel enkata e are.

³Neitayu Yoshua nkalema oo soito, nemurat iltung'ana le Israel te Gibeat-haaralot.

⁴Naa te nkaraki ena apa pee etumurata Yoshua ninche: ore apa ilayiok pooki loo ltung'ana ooetuo eing'uaa Misiri, iltung'ana pooki lo larrabal, netuata ninche te nkoitoi to lpurkel pee eidip ake aatupuku aatung'uai Misiri.

⁵Ore hoo netumurataki apa iltung'ana pooki ooipang'utua aapuonu, kake ore eyia ore lelo tung'ana pooki apa ootoiuoki te nkoitoi to lpurkel eidipa ninche aatupuku te Misiri neton apa eitu emurati.

⁶Amu eshomo apa iltung'ana le Israel ilarin artam to lpurkel, o metaba anaa neishunye olosho pooki, lelo tung'ana lo larrabal apa ooipang'utua aapuku te Misiri, te nkaraki neitu apa ening ninche oltoilo lo Laitoriani; ore tialo ninche neinosa Olaitoriani olmumai inchere meisho ninche metoduaa ina kop nainosakinye Olaitoriani olmumai loo papaai lenye pee eisho iyiook, enkop naruko kule o naishi.

⁷Neaku inkera enye apa etudumua Yoshua te rishata enye, ninche etumurata Yoshua; amu memurata apa, te nkaraki neitu apa emurati ninche te nkoitoi.

⁸Ore ake pee eidipayu emuratare o losho pooki, netoni ninche tiatua ilng'oborri o metaba anaa neishiu.

⁹Nejoki Olaitoriani Yoshua, Ore ena olong aibeleleng'oyie nanu esulare e Misiri aitung'uaa intae. Neaku ore enkarna e ine wueji naa keji Gilgal o metabaiki ena olong.

¹⁰Ore eton etii iltung'ana le Israel ilng'oborri te Gilgal nenya ninche Pasaka te nkolong e tomon o ong'uan o lapa teipa too nkisiashat e Yeriko.

¹¹Ore pee ekenyu etulusoyie Pasaka, teina olong, nenya ninche ilng'anayio le ina kop, imukateni neitu eisuishieki o entapa natapejoki.

¹²Neishunye mana pee ekenyu ina kata apa enya ninche ilng'anayio le ina kop; neitu eitoki iltung'ana le Israel aatum mana, kake einosa ilng'anayio le nkop e Kanaan te ilo ari.

¹³Ore apa etii Yoshua embata e Yeriko, neshumu inkonyek enyena aing'orisho, nedol eitashe oltung'ani te mbata ninye eeta olalem lenye oshutuno te nkaina enye; nelo Yoshua enetii ninye nejoki ninye, “Eira iyie ole nkalo ang, aashu oloo lmang'ati lang?”

¹⁴Nejo ninye, “A'a; kake aewuo nanu anaa olarikoni le njore o Laitoriani.” Nebatata Yoshua te nkomom enye o metabaiki enkop, neserem, nejoki ninye, “Kainyoo ejoki Olaitoriani lai osinka lenye?”

¹⁵Ore ilo arikoni le njore o Laitoriani nejoki Yoshua, “Intayu inamuka inono too nkejek inono; amu ore ine wueji nintasheyie naa eisinyati.” Neas Yoshua ina.