Read MAASAI REVISED PROTESTANT Yoshua 6 Bible Online

Yoshua 6 - MAASAI REVISED PROTESTANT bible

Yoshua 6

¹Ore apa Yeriko naa keikeno tiatua o ti oriong te nkaraki iltung'ana le Israel; meetae apa oltung'ani olo boo nemeetae olojing'u.

²Nejoki Olaitoriani Yoshua, “Toduaa ajo aishorua nanu apik inkaik inono Yeriko, te nebo olaiguanani lenye o ltung'ana magil lo larrabal.

³Tamana iyie ina anasa, ore iltung'ana pooki lo larrabal nepuo aaman enkanasa te nkata nabo. Ninkoko neijia too nkolong'i ile.

⁴Ore ilapolosak oopishana nenap imowuarak naapishana oo lmeregeshi te dukuya ilo sanduku; ore te nkolong e naapishana, nimanimana enkanasa katitin naapishana, ekutita ilapolosak imowuarak:

⁵Naa ore ake pee eitayu ninche eoshoto naado te nena mouwuarak oo lmeregeshi, ore ake pee ining'ining'i oltoilo le mowuo, nebuaku iltung'ana pooki te mbuakunoto kitok; neurunye esuntai e nkanasa abaiki enkop, nepuo iltung'ana dukuya, oltung'ani ake neiulokino dukuya ninye.”

⁶Neipotu Yoshua olayioni le Nuni ilapolosak nejoki ninche, “Ewaita osanduku lo sotua, ninchosho ilapolosak oopishana enap imowuarak naapishana oo lmeregeshi te dukuya ilo sanduku lo Laitoriani.”

⁷Nejoki ninye iltung'ana, “Enchom dukuya; entaman enkanasa, ninchosho lelo tung'ana oata imasaa o larrabal egiroo aapuo dukuya ilo sanduku lo Laitoriani.”

⁸Naa ore apa anaa enaitanapa Yoshua iltung'ana, ore lelo apolosak oopishana oonapita imowuarak naapishana oo lmeregeshi te dukuya Olaitoriani nepuo dukuya, eoshito imowuarak, esujita ninche ilo sanduku lo sotua lo Laitoriani.

⁹Ore lelo tung'ana apa ooata imasaa o larrabal nepuo te dukuya lelo apolosak ooshito imowuarak ore lelo ootii siadi nesuju ilo sanduku, eoshito imowuarak.

¹⁰Kake eitanapa apa Yoshua iltung'ana ajoki, “Mibuakuku ake aashu inchosho oltoilo linyi ening'oyu, nemepuku hoo ororei obo aimu inkutukie inyi, o metabau ina olong najokinye intae entabuaku.”

¹¹Neisho ninye ilo sanduku lo Laitoriani meitamani enkanasa, neman ninye nabo kata; nepuonu ninche ilng'oborri lenye, neirrag ninche ina kewarie ilng'oborri.

¹²Nedumunye Yoshua tadekenya enasirie, nedumu ilapolosak osanduku lo Laitoriani.

¹³Ore lelo apolosak apa oonapita nena mouwuarak naapishana oo lmeregeshi te dukuya ilo sanduku lo Laitoriani neituruk, eoshito imowuarak aaigil; ore lelo tung'ana apa ooata imasaa o larrabal nepuo te dukuya ninche, ore apa lelo ootii siadi nesuju osanduku lo Laitoriani, ina kata eoshitoi imowuarak aaigil.

¹⁴Ore te nkolong e are neman ninche enkanasa kata nabo, neshukunye aapuonu ilng'oborri. Neiko ninche neijia too nkolong'i ile.

¹⁵Ore te nkolong e naapishana nedumunye ninche enasirie, neman enkanasa anaa oshiake katitin naapishana: naa ina olong ake apa etamana ninche enkanasa katitin naapishana.

¹⁶Ore te nkata e naapishana, eidipa ilapolosak aatoosh imowuarak, nejoki Yoshua iltung'ana, “Entabuaku; amu eishoo intae Olaitoriani ena anasa.

¹⁷Ore ena anasa o pooki natii atua ninye neidaikieki tukul te nkaraki Olaitoriani; Rahab ina mulayoi ake o lelo pooki ootii te nebo ninye tiatua enkaji enye naapok, te nkaraki apa naisudoyie ninye lelo aikitalak likirriwaitie.

¹⁸Kake ore intae, entalama ate nena tokitin naaiteng'elakaki enkidaaroto, pee meaku ake ore inteng'ela intae ninche niyaya nabo e nena tokitin naaiteng'elaki nintaa ilng'oborri le Israel entoki e nkidaaroto, niyauu enyamali shumata ninye.

¹⁹Kake ore enkosholai pooki o saabu, o masaa o suyai o esekenkei, naa eisinyat to Laitoriani keyae ninche atua olchumati lo Laitoriani.”

²⁰Nebuaku iltung'ana neoshi imowuarak. Erisio ake etoning'o iltung'ana oltoilo le mowuo, neilepie iltung'ana embuakunoto kitok, neurori isunta aabaiki enkop, nejing iltung'ana atua ina anasa, neitoriokino ake oltung'ani dukuya enye, neya ninche ina anasa.

²¹Neitoki ninche aaidaikie tukul pooki natii atua ina anasa, ilewa o nkituaak, ilooti o lbotoro o lmong'i o nkerra o sirkon te nepi o lalem.

²²Nejoki Yoshua lelo tung'ana oaare apa ooikitalana ina kop, “Enchom atua enkaji e ina mulayoi, nimpang'unyenye tiatua ninye ina kitok, o lelo pooki oora ilkulenye, anaa apa eninosakita ninye olmumai.”

²³Neaku ore lelo barnot apa oora ilaikitalak nepuo atua aji, neipang'unye Rahab o papaai lenye o ng'otonye o lalashera o pooki oora ilkulenye; neyau ninche olmarei lenye pooki, nepik ninche auluo ilng'oborri le Israel.

²⁴Nepejoo ninche ina anasa te nkima o pooki naatii atua ninche; enkosholai ake o saabu o masaa o suyai o nesekenkei, etipika ninche atua olchumati le nkaji o Laitoriani.

²⁵Kake ore Rahab ina mulayoi, o enkaji e papaai lenye o pooki oora ilkulenye, eitajewuo Yoshua metopua; neton ninye tiatua Israel o metabaiki ena olong, te nkaraki apa naisudoyie ilaikitalak ooirriua Yoshua meikitalana Yeriko.

²⁶Neirragakinye Yoshua ninche olmumai teina kata, ejo “Kediaa te dukuya Olaitoriani ilo tung'ani odumunye neigil ashet ena anasa e Yeriko; keye olkikau lenye tenepik ninye olkitamanyunoto lenye, naa keye oldung'oret lenye tenepik ninye nchomito enyena.”

²⁷Neaku ketii apa Olaitoriani tenebo Yoshua; ore olning'o lenye neibulu enkop pooki.