Read MAASAI REVISED PROTESTANT Yoshua 8 Bible Online

Yoshua 8 - MAASAI REVISED PROTESTANT bible

Yoshua 8

¹Nejoki Olaitoriani Yoshua, “Miureishoyu niming'aing'ai; iwa lelo tung'ana pooki lo larrabal te nebo iyie, naa tudumunye, ilepa shomo Ai; toduaa ajo aishorua nanu apik atua enkaina ino olaiguanani le Ai o ltung'ana lenyena o enkanasa enye o enkop enye.

²Naa intaasiasa intae Ai o laiguanani lenye anaa apa enintaasa Yeriko o laiguanani lenye; kake ewaita intokitin enyena o nkishu entaarai; entipik olnukata empirakinye enkanasa ti oriong.”

³Nedumunye Yoshua te nebo o ltung'ana pooki lo larrabal, pee eilep aapuo Ai, negelu Yoshua iltung'ana inkalifuni tomoni uni magil oodupa, neirriwaa ninche kewarie.

⁴Neitanap ninye ninche ajoki, “Irragirraga intae aanuka aaishiaakinore enkanasa, aaimu ninye ti oriong; emipuopuo intae aalamari oleng teina anasa, kake enterretenata pee irasakiki.

⁵Ore nanu o ltung'ana pooki ootii te nebo nanu, nikipuo aanyikaki ina anasa. Naa ore te neipang'u ninche aapuonu aarare iyiook, anaa apa, nikimpirri aailanyisho te dukuya ninche;

⁶naa keipang'u ninche aapuonu aamir iyiook, o metaba anaa nikiya ninche enelakua teina anasa; amu kejo ninche, ‘Eisika aailany iyiook, anaa apa.’ Neaku aikisik iyiook aailany ninche;

⁷nitumokiki taa aatudumunye aatupuku te ilo nukata nimbung'ubung'u ina anasa; amu keisho intae Olaitoriani Enkai inyi apik atua enkaina inyi.

⁸Naa ore te nindipidipi aawaita ina anasa, nipikipiki intae ina anasa enkima, niasiasa anaa enaitanapishe Olaitoriani; entodol inchere aitanapa nanu intae.”

⁹Neaku eirriwayie apa ninche Yoshua; nepuo ninche ewueji o lnukata, neirrag te rishata e Betel o Ai te nkalo e ndoyioroto e Ai; kake etotona apa Yoshua ina kewarie te nebo o ltung'ana.

¹⁰Nedumunye Yoshua tadekenya enasirie neiturrur iltung'ana, neilep alo te nebo ilpayiani le Israel neituruk te dukuya iltung'ana alo Ai.

¹¹Ore lelo tung'ana pooki apa lo larrabal ootii te nebo ninye neilep aapuo nenyikaa aataaniki ina anasa; nepik ilng'oborri enkalo e moikuape e Ai.

¹²Nerik Yoshua iltung'ana oobaya inkalifuni imiet, nepik ninche atua olnukata te rishata e Betel o Ai, te nkalo o loo ntoluo e nkanasa.

¹³Neitobiraki ninche iltimito, etii oltim kitok enkalo e moikuape e ina anasa netii likae tim oriong enye enkalo o loo ntoluo e nkanasa. Kake eirraga apa Yoshua ina kewarie atua oerata.

¹⁴Ore ake pee edol olaiguanani le Ai ena, ninye o ltung'ana lenyena pooki, lelo tung'ana le ina anasa, neisarrisar neipang aapuo tadekenya aaishong'ishong, aaipirri enkalo e Araba pee enang'are Israel aarare; kake eitu apa eyiolou inchere ketii likae tim olnukata oarare ninye otii oriong ina anasa.

¹⁵Ore Yoshua o Israel pooki neitaakuno ketaraki te dukuya ninche, neisik aapuo enkalo e ong'ata.

¹⁶Neaku ore iltung'ana pooki apa ootii atua enkanasa neipotuni te nebo pee esujaa ninche, naa ore esujita ninche Yoshua nerikori aaitalam ina anasa.

¹⁷Metii apa oltung'ani hoo obo otung'uayioki te Ai aashu te Betel, leitu eipang alo asujaa Israel; neing'uaa ninche enkanasa ebolo, nesujaa Israel.

¹⁸Nejoki Olaitoriani Yoshua, “Intorioi ina pere natii enkaina ino ing'orie Ai, amu kaaisho nanu iyie apik atua enkaina ino.” Neitorioo Yoshua ina pere apa natii enkaina enye aing'orie ina anasa.

¹⁹Ore lelo apa ootii olnukata nedumunye nabo kata aapuku teine wueji apa nenukare, nerisio ake eitorioyie ninye enkaina enye, nekuet ninche nejing atua ina anasa neya ninye; neisarrisar aapik atua ina anasa enkima.

²⁰Neaku ore pee eing'or lelo tung'ana apa le Ai siadi, nedol eilep empuruo e ina anasa alo shumata; nemeekure eeta engolon naisikakinye ena shoto aashu idia, amu ore lelo tung'ana apa ooisikakita ong'ata neibelekenyakinote lelo apa oosujita.

²¹Ore ake pee edol Yoshua o Israel pooki nchere eibung'a lelo apa ootii olnukata enkanasa, neilepa empuruo e ina anasa alo shumata, neibelekenyunye aar metuata lelo tung'ana le Ai.

²²Neipang'u ilkulikae ooing'uaa enkanasa aapuonu aarare ninche; nejing empolos e Israel, etii ilkulikae ena shoto netii ilkulikae idia shoto; nesesekuan Israel ninche o metaba anaa neaku metii hoo obo otelekua aashu otuluayie.

²³Kake ore olaiguanani le Ai neya ninche eishu, neyau ninye enetii Yoshua.

²⁴Ore ake pee eidip Israel atara metuata lelo pooki apa oomanya Ai tiatua ina ong'ata naisiasha apa natusujakita ninche, ore ninche pooki o metabaiki olobayie lenye netabatatate te nepi o lalem neshukunye Israel pooki aapuonu Ai neosh ninche te nepi o lalem.

²⁵Ore lelo pooki apa ootabatata teina olong, ilewa o nkituaak naa inkalifuni tomon o are, iltung'ana pooki le Ai.

²⁶Amu eitu apa eshuk Yoshua enkaina enye, naa ninye apa oitorioriyie ina pere o metaba anaa neidaikie tukul lelo pooki apa oomanya Ai.

²⁷Inkishu ake o masaa e ina anasa apa ewaita Israel aaitaa intokitin naataraitie, te risioroto e ilo rorei lo Laitoriani apa oitanapa Yoshua.

²⁸Neaku etapejoyie Yoshua Ai, neitaa ninye intarasi osototi le nkidaata, anaa enatiu ena olong.

²⁹Neilili ninye ilo aiguanani le Ai to lchani o metaa teipa; ore pee eaku kedoyio enkolong neitanapisho Yoshua, neitayu ninche aaitadou osesen lenye to lchani nenang'aki enejing'ieki kishomi e ina anasa nepik shumata ninye osototi kitok loo soito, leton eitashe teine o taata.

³⁰Neitoki Yoshua ashet olperere lo lasar to ldoinyo le Ebal, ashetaki Olaitoriani, Enkai e Israel,

³¹anaa apa enaitanapa Musa ilo sinka lo Laitoriani iltung'ana le Israel, anaa enaigero tiatua embuku oo nkitanapat e Musa, “Olperere lo lasar loo soito lemegueta, leitu aekata eiteleiki oltung'ani enguetet e sekenkei;” neishooyo ninche te nchumata enye ilasarri oopejori aaisho Olaitoriani, nepolos ilasarri le seriani.

³²Ore teine, etii iltung'ana le Israel, neiger Yoshua te nchumata oo soito enkigilata e nkitanapata e Musa, apa naigero ninye.

³³Ore Israel pooki, olotadokuo o inoti, te nebo ilpayiani lenye o lkituaak o larishak lenye, neitashe too nkipirakinot e ilo sanduku te dukuya ilapolosak le Lawi apa oonap ilo sanduku lo lning'o lo Laitoriani, etii olpisiai lenye dukuya oldoinyo le Geresim netii olpisiai lenye dukuya oldoinyo le Ebal, anaa apa enaitanapishe Musa ilo sinka lo Laitoriani te dukuya, inchere pee emayian ninche iltung'ana le Israel.

³⁴Ore te siadi nena neisum ninye irorei pooki le nkitanapata, emayianata o ldeket, te risioroto e nena pooki naaigeroki tiatua embuku oo nkitanapat.

³⁵Meetae apa ororei hoo obo le nena pooki apa naaitanapishe Musa leitu eisum Yoshua te dukuya ina umata pooki e Israel o nkituaak o nkera kutiti o ldokunot apa ootii atua ninche.