Read MAASAI REVISED PROTESTANT Tito 1 Bible Online

Tito 1 - MAASAI REVISED PROTESTANT bible

Tito 1

¹Paulo osinka le Nkai olkipaaret le Yesu Kristo, pee eitubulaa enkirukoto e lelo gelunot le Nkai o eng'eno naishiaakino orrekie le Nkai,

²te ilo siligi le nkishui nemeiting, oisiligie apa Enkai nemeeta elejare ninche apa moitie;

³ore ake pee eiririkino enkata, neibalunye tiatua ororei lenye aimunye ina likioroto naaishooki nanu mainosai te nkitanapata e Nkai Olaitajeunoni lang.

⁴Tito aigeroki, enkerai ai nasipa tiatua enkirukoto niking'ar. Meeu enitii empiris o eseriani eing'uaa Enkai Papa o Kristo Yesu Olaitajeunoni lang.

⁵Te nkaraki ena apa pee aatung'uayie te Krete, pee itum aitobira mbaa naang'or, nigelu ilpayiani too nkang'itie pooki anaa enaatuutaka,

⁶olpayian lemeeta eleyiata, olee le nkitok nabo, neiruko inkera enyena, nemekurri aajo aiserseri aashu mening'isho.

⁷Amu ore olaitasheikinoni te nkaji e Nkai, naa olaisiaayiani le Nkai, meishiaakino neeta eleyiata; nchoo eaku mme ole makewan aashu olosieku engoro, aashu emera, aashu arruoni aashu eeta olorok le dupoto.

⁸Kake keishiaa paa aminin, olonyor esupatisho, oloata entonata sidai, oloitoriori, sinyati neibooyo kewan.

⁹Neibung akurraki ilo rorei osipa anaa enaiteng'enishoteki, pee eidim ninye aishooi eutaroto tiatua ina kiteng'enare supat, neibooyo lelo ooishankarra.

¹⁰Ketii iltung'ana kumok lemening'isho, ooata irorei le pesho, oolejisho neisul lelo ooibung imbaa e muratare aitaa enjeunoto.

¹¹Meeta nchere emeitigiri ninche, meitoki aaibelekeny ilmareita oolulung'a eiteng'enisho nena nemeitoriori ejo pee etumisho te ntorroni nemeeta esipata naiteng'enishore.

¹²Ore obo lenye maate eji laa kejo ninche oloiboni, nejo, “Ilalejak oshiaake Lkrete, ilowuarak torrok, ilaikoshuaak turua!”

¹³Ekesipa ena shakenisho. Metaa isikong'a ninche te mpijan pee etum aataa supati te nkirukoto

¹⁴alang te nesuj nkaatini oo Lyahudi aashu nkitanapat oo ltung'ana ooany isipat.

¹⁵Ore to supat naa eisidain intokitin pooki kake ore te ilo torrono o too lemeiruk meetae entoki sidai. Eidurukieki eng'eno enye o ltoiloishi loo ltauja lenye.

¹⁶Kejo ninche keyiolo Enkai, kake neany ninye too nkiasin enye; ilainyalak ninche, oogolong'u lemeeta tipat ti ae siaai sidai hoo nabo.