Read MAASAI REVISED PROTESTANT Tito 2 Bible Online

Tito 2 - MAASAI REVISED PROTESTANT bible

Tito 2

¹Kake ore iyie Tito nteng'enisho nena naaishiaakino enkiteng'enare sidai.

²Tiaaki ilpayiani kituaak meiririki mbaa, nedupayu naa ng'eni, neaku sidain te nkirukoto, te nyorrata, te nkitashoto o te ng'iriata.

³Tiaaki nkituaak moruak neijia, metaa inaayanyitayu to lkuaak, nepal olmarenke nemeaku rrindiki e merai; nchoo eiteng'enisho nena sidain.

⁴Neiteng'eni sii isiankikin metonyorra ilpayiani lenye o nkera enye,

⁵neaku ng'eni neisosion, neramatisho ti ang, naa supati, nening ilpayiani lenye pee memenuni ake ororei le Nkai.

⁶Neijia sii nkuna, tiaaki ilpayiani ooti pee eibooyo ate.

⁷Intoduaai kewan too mbaa pooki, niaaku enkitanyaanyukoto oo nkiasin sidain. Ore te nkiteng'enare ino ntodolu esipata o ltau o entukunyakinoto,

⁸o enkiroroto sidai nemeidimi aatusukeny, pee etumi aaitukurru ilo okeshisho, meeta ae torrono najo tialo iyiook.

⁹Tiaaki irrindiki metoning'o ilaitoriak lenye, neitiship ninche te pooki bae, nemeeta ntorok naawaliki, pee eitoduaaya esupatisho pooki,

¹⁰paa ore too mbaa pooki nejukaa enkiteng'enare e Enkai Olaitajeunoni lang.

¹¹Amu eitaliooki empiris e Nkai te nkaraki enjeunoto oo ltung'ana pooki,

¹²neiteng'en iyiook maibai nena pooki neme nne Enkai, o ng'uarrat e nkop, nikitoni te nkiririkinoto, o te nkitorioroto o to rrekie le Nkai tena kop,

¹³nikiaanyu osiligi lang omayiana, ina lotunoto e nkitoo e Nkai ang kitok o Laitajeunoni lang Yesu Kristo,

¹⁴oishorua kewan te nkaraki iyiook, pee elaku iyiook aitung'uaa entorroni pooki neitisinyaki kewan iltung'ana lenyena. Lelo ooata enyuaata te nkaraki nkiasin sidain.

¹⁵Mbalunye kuna baa, nkoo ninguan te ngolon pooki. Mincho hoo oltung'ani obo mikitemena.