Read MAASAI REVISED PROTESTANT Ilbrania 1 Bible Online

Ilbrania 1 - MAASAI REVISED PROTESTANT bible

Ilbrania 1

¹Eirori apa Enkai iloo papa too nkoitoi kumok o too mpukunot kumok too loibonok lenyena,

²kake ore te kuna olong'i naabayie neirorie iyiook to Inoti otegelua ninye metaa olajung'oni loo ntokitin pooki, olaa te ninye eitayioki enkop.

³Ninye oitodolu enatiu enkitoo e Nkai naa ninye otaa olmishire le naikununo Enkai, naa ninye oibung'ita shumata o enkop to rorei le ngolon enye. Ore apa pee eidip aitobira enkipooto oo ng'ok, neton te tatene e Nkitoo te keper.

⁴Eidipa Enkerai aisula ilmalaika amu ore enkarna nanoto naa ninye nalusoo too nkunenye.

⁵Amu kalo malaika etiaaka Enkai ae kata nchere, “Ira iyie Oinoti lai latoiwuo tele kekun?” Aashu sii, “Kaaku nanu menye lenye, neaku ninye Oinoti lai?”

⁶O sii, pee eyau olkikau lenye enkop nejo, “Inchoo eserem ninye ilmalaika pooki le Nkai.”

⁷Ore tialo ilmalaika nejo ninye, “Oloitaa ilmalaika lenyena isiwuoishi, neitaa isinkan lenyena ilng'ejepa le nkima.”

⁸Kake etejo tialo Oinoti lenye, “Ore olorika lino, iyie Enkai naa oloo ntarasi o ntarasi orinka le supatisho ilo rinka le nkitoria ino.

⁹Itonyorra iyie esupatisho nimbayu entorroni. Ore te nkaraki ina nikitubukoko Enkai ino eilata aput, nikiela te ilata e ng'ida nalang ene sirit ino.”

¹⁰Ore sii, “Iyie, Olaitoriani, oitobira enkop te nkiterunoto, ore keper naa esiaai oo nkaik inono.

¹¹Keishari ninche, kake ibik ake iyie, kemusanu ninche, kake ibik ake iyie, kemusanu ninche anaa enkila,

¹²naa iyie oyooki apiyai ninche anaa enkila neibelekenya ninche. Kake itiu iyie anaa apake, nemeishunye ilarin linono ntarasi.”

¹³Kake kalo malaika etiaaka aekata Enkai, “Totona te nkaina ai e tatene o metaba anaa naitaa ilmang'ati linono olorika loo nkejek inono?”

¹⁴Aime nkiyang'eta aisiaayiak ake ilmalaika pooki oirriwayioki meisiaaisho, te nkaraki lelo ootum enjeunoto?