Read MAASAI REVISED PROTESTANT Ilbrania 12 Bible Online

Ilbrania 12 - MAASAI REVISED PROTESTANT bible

Ilbrania 12

¹Ore te nkaraki nena, amu kemanita iyiook enkatampoi kitok e lelo shakenini, emaiturrai sii iyiook enkiroishi ake pooki o eng'oki naonyikino iyiook oleng, emaipirrio te ng'iriata teina kuetata natipikaki dukuya iyiook.

²Emaimariria Yesu olaa ninye oiterua naa ninye oitabaya enkirukoto ang, olaa ore te nkaraki eng'ida natipikaki dukuya ninye neting'iria osalaba, nemenu ina kurruna, neton taata te nkaina e tatene o lorika le nkitoo e Nkai.

³Entadamu intae ilo oting'iria enkiba naba neijia oo laing'okok eiba kewan enye, pee minaururu intae nemidukenyanya tiatua iltauja linyi.

⁴Ore te nkesha inyi iararere ing'ok neton eitu igilunorere o meibukori osarge.

⁵Anaa ketorikine intae ina naikokieki intae anaa nkera? “Enkerai ai, nimimenu earata nikiaar Olaitoriani, nimilepori ti nikiosh ninye!

⁶Amu olonyor eosh Olaitoriani, neitame enkerai ake pooki nang'amu ninye.”

⁷Te nkaraki naa ioshot e nkikoo pee ing'iriri. Eitaasa intae Enkai enaitaas inkera enyena, anaa kaa kerai eetae nemeosh menye arere?

⁸Te nemeoshi intae aarere, anaa enaitaasaki ilkulikae pooki, nitaa nkera naadumuni nimirara inot.

⁹Ore etii ena, ekiaata loo papa lang te nkop ootosho iyiook aarere nikiyanyita ninche. Paa eimikiyanyit naa oleng ilo Papa loo nkiyang'eta pee kinchu?

¹⁰Amu etoosho ninche iyiook aarere te nkiti rishata anaa enayieu ninche, kake keosh ninye iyiook arere amu eisidai ina te iyiook pee kitum esinyatisho o esupatisho enye.

¹¹Ore te pooki rishata ore eoshoto pooki narere oltung'ani nememelok; ore te siadi neiu ilng'anayio le seriani e supatisho te lelo ootarerioki teina.

¹²Ore te nkaraki ina entarrapu[1] nena aik naalepori naa entagolo nena kung inyi naashal,

¹³naa entobiraki inkejek inyi inkoitoi naaitoriori, paa ore ilo ng'ojine nemeburukusha kake pee etumi aaishiunye.

¹⁴Entonyok eng'oru osotua too ltung'ana pooki o esinyatisho naa ore te nemeetae nemetumi hoo olodol Olaitoriani.

¹⁵Entodol ake pee meetae hoo obo olau empiris e Nkai; inchere pee metumi “Entonai e nduaran” nabulu neyau entorroni, neaku teina eisarkionieki ilkumok.

¹⁶Eminchosho etumi oltung'ani hoo obo ololoito aashu olemeserem Enkai anaa Esau, otimira enjung'ore e ikinet enye neinosie endaa e nabo kata.

¹⁷Amu iyiololo aajo ore te siadi, pee eitoki aayieu nejung ina mayianata, netanyaki ninye, amu eitu etum erishata pee eirridu, hoo neing'orua too lkiyio.

¹⁸Amu mme doi entoki naiseyieki ietuo enetii, enkima nayupuyup o enaimin o entoki naitureisho o lkutati,

¹⁹o ltoilo le ntarumpeta o ltoilo laa ore nkirorot enyena netureita lelo apa ootoning'o metasaisho aajo pee meitokini aaigilie kulie kirorot.

²⁰Amu meitieu apa ninche aating'iria enkitoria naishooki, “Te neiseyie ninye eng'ues ele doinyio, neari too soito.”

²¹Eituria ina naitoduaaki o metejo Musa, “Kaikirikira nanu te nkuretisho.”

²²Kake Oldoinyo le Sion ietuo intae o enkanasa e Nkai naishu, Yerusalem e keper, o enetii ilmalaika lemeikenayu ooiturrurro eikodoki,

²³nietuo eumata oo lkikaunot ooigero te keper, nietuo enetii olarishani laa ninye Enkai e pooki; o enetii inkiyang'eta oo ltung'ana sinyat ooitabayioki,

²⁴o enetii Yesu, ilo Aitutumoni lo sotua ng'ejuk, o enetii ilo sarge oisuaayioki neiro te mpiris nalang eno sarge le Abel.

²⁵Entodol ake emiaany ele olimu kuna. Amu amaa te neitu eilanyisho lelo ootanyaita ninye te nkop, mikiaata sii iyiook enikilanyie ilo oirorie iyiook etii keper.

²⁶Eikirikirie oltoilo lenye enkop ina kata apa; kake eitayio taata enkisiligata ajo, “Eton aigil ena nabo neme enkop ake aikirikirie kake o shumata sii.”

²⁷Ore ena bae najo “Kaigil ena nabo,” neitodolu inchere keiwuang'ieki ina apa naikirikirieki, neitodolu ena entoki naitobiraki, pee eing'uari ina nemeikirikirieki.

²⁸Ore te nkaraki ina emanoto iyiook enashe kitang'amutua enkitoria nemeidimi aaigusugusie, naa emaishoo Enkai eseremata nang'amaroyu, natii enkanyit o lturiaki;

²⁹amu ore Enkai ang naa enkima namutisho.