Read MAASAI REVISED PROTESTANT Ilbrania 2 Bible Online

Ilbrania 2 - MAASAI REVISED PROTESTANT bible

Ilbrania 2

¹Ore te nkaraki ina, keishiaakino nikirrip nena nikitoning'o oleng, pee mikipaashare ake aaing'uaa.

²Amu amaa tenaa keewuo olkilikuai apa otolimutuo ilmalaika neaku ore engilata enye aashu eanyata netum enkitamioto,

³kaji kijeunye iyiook ti nikintololoiki enjeunoto kitok naba inji? Olaitoriani otang'asa alimu ena jeunoto te dukuya, neetuo aaishakenoki tialo iyiook lelo apa ootoning'o ninye.

⁴Neishakenoko sii ninye Enkai too lmonek o too mbaa e nking'asia o too mpukunot kumok e nking'asia o too nkishorunot e Nkiyang'et Sinyati naaori te risioroto e yieuna enye.

⁵Amu mme ilmalaika eishoo Enkai meitoria enkop nalotu, naa ninye ena nikiimaki.

⁶Eishakenoki aajo te dikae, “Kainyoo ninye oltung'ani linkenaa iyie, anaa enkerai e tung'ani niramat iyie?

⁷Iyie oitadowuo ninye te nkiti rishata meeu abori lmalaika, naa iyie oishoo olmarisian le nkitoo o enkanyit,

⁸nintadowuo pooki toki meeu abori nkejek enyena.” Nitipika pooki toki abori enkitoria enye, nemeetae ae toki natelekua nemeitore ninye. Ore anaa enatiu, eton mikidol iyiook pooki toki, tiabori enkitoria enye.

⁹Kake kidolita Yesu, otang'asaki aaitadou te nkiti rishata metadou abori ilmalaika, neishooki enkopiyia e nkitoo o enkanyit te nkaraki emion enye e keeya, peyie aa te mpiris e Nkai eishamishama ninye keeya te rishata e pooki ng'ae.

¹⁰Amu keiririkino apa paa ore Enkai, olaa inenyena naa te ninye pee eetae intokitin pooki naa ore pee etumoki ninye atorikoki inkera kumok enkitoo, neiteraka emion neitaa bayaroti ilo oipirua enjeunoto enye te mion o larikoni.

¹¹Amu ore ilo oitisinyi o lelo ooitisinyi nebo eing'uaa pooki. Naa ina pee mekurru Yesu te nejo ninche ilalashera

¹²Nejo, “Kaliki ilalashera laainei enkarna ino, naaisis iyie te mpolos e umata.”

¹³Nejo sii, “Ekapik nanu osiligi lai atua Enkai.” Neigil ake ajo, “Nele nanu o nena kera naaishoo nanu Enkai.”

¹⁴Ore naa te nkaraki nang'ar inkera nkiri o sarge, etang'arie sii ninye Yesu makewan ina pukunoto, paa te keeya etum ninye aitarruoi ilo oata engolon e keeya, aa oloirirua,

¹⁵netum atokordu lelo pooki ooena te nkishui enye pooki te nkaraki naure keeya.

¹⁶Amu kesipa nchere mme lmalaika doi eret kake eishoi e Abraham.

¹⁷Te nkaraki ina pee eishooki Yesu metotiwuo anaa lalashera lenyena too mpukunot pooki, pee etum ataa olapolosani oata olng'ur neisiligayu te siaai e Nkai, netum aitayu enkitukuoroto oo ng'ok oo ltung'ana.

¹⁸Amu ore te nkaraki netamio ninye makewan pee etemi, ekeidim ninye atareto lelo ootemi.