Read MAASAI REVISED PROTESTANT Ilbrania 3 Bible Online

Ilbrania 3 - MAASAI REVISED PROTESTANT bible

Ilbrania 3

¹Ore te nkaraki nena, lo alashera sinyat, oong'ar enkipototo e keper, entadamu Yesu, olkipaaret naa olapolosani kitok likilikioo.

²Etaa ninye oloisiligayu tialo ilo otegelua ninye, anaa apa sii ninye Musa pee etaa oloisiligayu tiatua enkaji e Nkai.

³Kake ore ninye Yesu neikenakaki nchere keiririkino enkitoo nalang ene Musa anaa te neeta oloshetu enkaji enkitoo nalang ene nkaji.

⁴Amu keeta ake enkaji pooki oloteshetua kake Enkai olashetani loo ntokitin pooki.

⁵Etaa apa Musa oloisiligayu anaa olaisiaayiani te pooki naatii enkaji e Nkai, pee eishakenoki mbaa naanyaakaki aalimu te siadi.

⁶Kake ore Kristo netaa oloisiligayu te nkaji e Nkai anaa Oinoti. Nikira iyiook enkaji enye ti nikimbung aakurraki empijan ang o lwuasa tiatua ilo siligi lang.

⁷Ore te nkaraki ina, anaa enajo Enkiyang'et Sinyati, “Ore taata ena olong, ti nining'ining'i oltoilo le Nkai,

⁸emintagol iltauja linyi anaa te napa gogong'i, te napa olong e ntemata ti ong'ata,

⁹peyie aatem iloo minyi, nedol isiaaitin aainei too larin artam.

¹⁰Ore te nkaraki naaitagoro ilo porror, najo, ‘Kepaashari oshi ake ninche tiatua iltauja lenye; neitu aekata eyiolou inkoitoi aainei.’

¹¹Ore anaa enainosa olmumai te ngoro ai, ‘Mejing aekata ninche enkiyeng'iyeng'ata ai.’ ”

¹²Entodol ate, lo alashera, pee metii ake atua intae likae linyi lo ltau torrono, lemeiruk, orik intae nesulaa neitapaash Enkai naishu.

¹³Kake entaretunoto anaa ake, anaa neton ejoitoi, “Taata ena olong,” pee megolu likae linyi lukunya te nkaraki elejaroto oo ng'ok.

¹⁴Amu Kristo king'ar iyiook te nesipa eikikurraki aaibung empijan ang o metabaiki enkiting'oto,

¹⁵eton ejoitoi, “Ore taata ena olong, ti nining'ining'i oltoilo lenye, emintagol iltauja linyi anaa te napa gogong'i.”

¹⁶Kakua apa lelo ootoning'o oltoilo le Nkai neitoki aagolong'aki? Aime lapa pooki ootung'uaitie Misiri ootorikuo Musa?

¹⁷Naa kakua etagorokine Enkai too larin artam? Aime lelo ootaasa ng'ok, ooitanang'a iseseni lenye ilo purkel?

¹⁸Naa kakua einosaka Enkaiolmumai ajo, mejing enkiyeng'iyeng'ata enye ntarasi, ei kulikae leme lelo ootogolong'akita?

¹⁹Neaku kidol aajo eitu eidim ninche aatijing ine te nkaraki neitu eiruk.