Read MAASAI REVISED PROTESTANT Ilbrania 7 Bible Online

Ilbrania 7 - MAASAI REVISED PROTESTANT bible

Ilbrania 7

¹Amu ore ele oji Melkisedek, olaiguanani le Salem, naa olapolosani le Nkai natii shumata te pooki. Netanang'are ninye Abraham eshukunye eing'uaa enjore natimirie ilaiguanak, nemayian ninye;

²naa ninye etoorikia Abraham ematua e tomon e pooki toki. Ore te walunto e nkarna enye naa olaiguanani le supatisho, naa olaiguanani le Salem, “Eji Olaiguanani le seriani”.

³Meeta ninye menye anaa ng'otonye, nemeeta entipat, nemeeta eneiting'ie enkishui enye, kake etiu anaa ilo Inoti le Nkai, ora olapolosani ntarasi.

⁴Ng'ura eneba enkitoo enye! Eishoo papa lang Abraham ninye ematua e tomon oo yarunot.

⁵Naa ore lelo le ishoi e Lawi oong'amu empolosare neetae inaaitanapaki tiatua nkitanapat meishoo olorere ninche ematua e tomon, naa too lalashera lenye, hoo naa le ishoi e Abraham sii ninche.

⁶Kake ematua e tomon naishoo Abraham Melkisedek hoo neme ole ishoi oo Lawi naishoo metamayiani ninye, otang'amua nkisiligat.

⁷Metii enchankar inchere olkitok ake omayian oloti.

⁸Ore tene, iltung'ana ooyooki aaye oong'amu ematua e tomon, ore teine, naa ilo obo oitadedeyieki aajo keishu.

⁹Keidim doi ninye oltung'ani atejo ore ninye Lawi makewan, oishoro metang'amu ematua e tomon, eishooyie ematua e tomon te Abraham,

¹⁰amu eton apa etioyo too sapo e nkakuyiaa lenye pee enang'are Abraham Melkisedek.

¹¹Ore naa tenaa ketumoyu apa bayarotisho te mpolosare oo le Lawi, amu te ninche etang'amutua ilo orere nkitanapat, kainyoo eitokini aayieunye likae apolosani olotu to lkerreti le Aron?

¹²Amu te neibelekenyi ilapolosak neibelekenyi sii ninche inkitanapat.

¹³Amu ore ele oimaki kuna baa naa ole likae osho lemeeta ninye aekata oltung'ani lenye otopolosishe to lperere lo lasar.

¹⁴Amu keibala ajo olosho le Yuda etoikioki Olaitoriani lang, naa ore te ilo osho, neitu ejo Musa ae naipirta ilapolosak.

¹⁵Keitoki ena bae awang'u oleng te neinyototo likae apolosani lo rrekie le Melkisedek,

¹⁶ajo eitaaki olapolosani neme to rrekie loo nkitanapat anaa te ntipat o sesen ake eeta engolon, kake te nkidimata e nkishui nemeidimi aaishie.

¹⁷Amu keitaikiaki ninye shakenisho nchere, “Ira iyie olapolosani ntarasi to rrekie le Melkisedek.”

¹⁸Ore te nabo alo, eiwuang'ieki enapa kitanapata naituruku te nkaraki nashal nemeeta dupoto,

¹⁹amu meetae entoki nataa bayaroti te nkaraki nkitanapat, ore te nkae alo, eyawuaki osiligi oikash, laa te ninye kinyikaki iyiook Enkai.

²⁰Neitu easi ina metii olmumai.

²¹Ore lelo apa ooitera aaku ilapolosak netaa metii olmumai, kake ore ele netolimuoki to lmumai, “Einosa Olaitoriani olmumai nemeibelekeny enatejo inchere, ‘Ira iyie olapolosani intarasi.’ ”

²²Ena naishoo Yesu meitadedeyie osotua olusoo to likae.

²³Ore lapa apolosak ooiturukutuo naa kumok esiana enye, amu etomitikio keeya ebikoo te mpolosare;

²⁴kake eibung'ita ninye Yesu empolosare enye nemeiting, amu kebik ninye intarasi.

²⁵Ina pee eidim ninye aitajeu nkatitin pooki lelo ooimu ninye epuonu aanyikaki Enkai, amu keishu oshi ake ninye netumoki atoomonoki ninche.

²⁶Amu keishiaakino te iyiook, ti nikiata olapolosani kitok oba nji, osinyati, lemeeta entiyoto, nemeeta entibili, olotirishuaki too laing'okok neilepieki aaitogiroo shumata.

²⁷Meetayie ninye tipat, anaa enatiu apa lelo kulikae apolosak, meeta tipat napolosishore anaake, to lbae loo ng'ok enyena makewan, neitoki apolosisho to lbae loo ng'ok o lorere, eitabayie ninye ina nabo kata ake apa pee eishooyo kewan.

²⁸Kesipa nchere nkitanapat naaitaa ltung'ana ooshal ilapolosak kituaak, kake ore ilo rorei lo lmumai, otusujua nkitanapat, netegelua ilo Inoti bayaroti obik intarasi.