Read MAASAI REVISED PROTESTANT 2 Petero 1 Bible Online

2 Petero 1 - MAASAI REVISED PROTESTANT bible

2 Petero 1

¹Simon Petero osinka naa olkipaaret le Yesu Kristo oigeroki lelo oonoto enkirukoto naba anaa enaang, tiatua esupatisho e Nkai ang o eno Laitajeunoni lang Yesu Kristo.

²Metoponari empiris osotua te intae te yiolounoto e Nkai o Yesu Olaitoriani lang.

³Engolon kitok e Nkai naishoo iyiook intokitin pooki naaishiaakino te nkishon o te sinyatisho e Nkai, te yiolounoto enye ilo oipotoko iyiook enkitoo o enkishiaan enye.

⁴Naa te na oitoi eishoo iyiook nkisiligat enyena e tipat naa sapuki oleng, paa ore te nkaraki nena nitumutumu aailanya erruorroto natii enkop te nkaraki ing'uarrat, niaakuku ilooshulakino esinyatisho e mpukunoto e Nkai.

⁵Ore te nkaraki ena, entipik enyuaata pooki aponaa enkirukoto inyi, ore enkirukoto niponikiki eng'eno;

⁶ore eng'eno inyi niponikiki enkibooroto e maate, ore enkibooroto e maate enkitashoto, ore enkitashoto esinyatisho e mpukunoto e Nkai.

⁷Ore esinyatisho e mpukunoto e Nkai entoponiki enkaripo e nyorrata too lalashera, ore enkaripo enyorrata too lalashera.

⁸Ore iyatata kuna tokitin te nkumoi nemeisho intae iliarara anaa ilauu ilng'anayio tiatua eyiolounoto o Laitoriani lang Yesu Kristo.

⁹Ore pooki ng'ae lemeeta kuna baa naa aimodooni, nemedol enelakua, netorikine enkitukuoto oo ng'ok enyena musan.

¹⁰Te nkaraki ena, ilalashera entonyok oleng entisipa enkipototo o engelunoto inyi, amu ti niaasiasa ina nimibatata aekata.

¹¹Amu tena oitoi eishori intae esipata te leng'on entijing atua enkitoria oo ntarasi o Laitoriani lang naa Olaitajeunoni Yesu Kristo.

¹²Ore te nkaraki ena, kayieuta oshiaake naitadamu intae kuna baa, hoo ninye te naa indipa aatayiolo, nintirring'ang'a tiatua isipat naatii atua intae.

¹³Adol ajo keishakino, eton atii ele ng'obor te nkop, te nainyeiyie intae te nkoitoi e nkitadamunoto,

¹⁴amu kayiolo ajo, kasioki airragie osesen lai le nkop, anaa enaitoduaa Olaitoriani lang Yesu Kristo.

¹⁵Kanyok aas anaa enaidim, paa ore aidipa ashomo, nindimidimi aatadamu kuna baa inkatitin pooki.

¹⁶Amu eitu kisuj iyiook inkaatini naaitobiruaki te ng'eno ina kata kintayiolo intae engolon o elotunoto o Laitoriani lang Yesu Kristo, kake kira ilchakenini ootoduaa too nkonyek enkitoo enye e nkisisa.

¹⁷Amu ore pee eng'amu enchunet e nkisisa e nkitoo eing'uaa Enkai Papa, neewuo oltoilo enetii eing'uaa Enkitoo e nkisisa nalus, nejo, “Oinoti lai ele lanyor, natishipe oleng te ninye.”

¹⁸Kitoning'o iyiook ele toilo pee elotu eing'uaa shumata amu kiboitare apa iyiook ninye te ilo doinyo sinyati.

¹⁹Amu kiaata iyiook ilo rorei le naibon oitadedeyieki oleng nitaasa intae esidai te ning'amaa ninye anaa oltaa oilang'ilang ewueji nemisimis o metaba naa nekenyu, neilepu olakira too ltauja linyi.

²⁰Ore enaituruk te pooki, entayiolo ena, inchere meetae enaibon oo sirat nalotu ake te yieunoto o ltung'ani makewan,

²¹amu metii aekata enaibon naishoruaki te yieunoto o ltung'ani, kake eiroro iltung'ana sinyat ilomon le Nkai anaa enautaki Enkiyang'et Sinyati eing'uaa Enkai.