Read MAASAI REVISED PROTESTANT 2 Petero 3 Bible Online

2 Petero 3 - MAASAI REVISED PROTESTANT bible

2 Petero 3

¹Ena taata empalai e are nasiraki intae, ilanyor laainei. Ore te pokira are natuputuo indamunot inyi nemetii esunkuroisho te nkitadamunoto e kuna baa,

²inchere kenyor nidamumu intae irorei ooiroro iloibonok sinyat le dukuya o enkitanapata o Laitoriani naa Olaitajeunoni, oimua ilkipaareta linyi.

³Entayiolo ena te dukuya inchere ore too nkolong'i e siadi kepuonu ilasukenyak te sukeny enye, oopuoyie ing'uarrat enye maate,

⁴neikilikuanu aajo, “Koree doi enkisiligata e lotunoto Enye? Amu ore apa ebaiki pee eirura iloo papa, epuoito intokitin pooki aaikunari anaa enatiu apake te nkiterunoto pee eitaini enkop.”

⁵Etootikitio ninche aagiroo ena sipata, inchere to rorei le Nkai eetae keper apa moitie o enkop naitobiraki te nkare naa enkare eitainyieki;

⁶naa te ninye eidaikieki ina kop apa naatae aaitemoo to loirrag le nkare neidaaya.

⁷Naa te ilo rorei ake sii etushumaki keper taata natii o nkop aaitanyu enkima, nepali o metabaiki enkolong e nkiguana o emutata oo ltung'ana lemeure Enkai.

⁸Kake ore intae, ilchoreta laainei, emincho erikino intae ena bae nabo, inchere ore enkolong nabo to Laitoriani netiu anaa ilarin enkalifu nabo, ore ilarin enkalifu nabo netiu anaa enkolong nabo.

⁹Meimutie Olaitoriani eitu eitabaya enkisiligata enye anaa enadamu kulikae enkimutioto, kake keng'iri te intae amu meyieu obo oimin, kake pee ebaiki pooki ng'ae enkirridunoto.

¹⁰Kake kelotu enkolong o Laitoriani anaa olapurroni. Ore teina olong neishieki keper to ltoilo kitok. Ore wuejitin e shumata nepejori aaidaikie, ore enkop o pooki toki natii nepejori.

¹¹Amaa taa te naa inji eikoni kuna tokitin pooki aaidaikie keishiaakino intae niaakuku iltung'ana ooikununo aja, to rrekie le sinyatisho o esidano e nkishiaa inyi too naaishiaakinore e Nkai?

¹²Ore iyanyitata nintasiekuku ina olong e Nkai, ore ina olong naa kepeji shumata nesholi, ore intokitin naaitobirieki shumata neshola te nkima.

¹³Kake ore te risioroto e nkisiligata e Nkai, kiaanyita iyiook keper ng'ejuk o enkop ng'ejuk naa atua ninye emanya esupatisho.

¹⁴Ore te nkaraki ina ilanyor amu kuna iyanyitata entonyok naa pee einepu Enkai intae miaatata entibili anaa entiyoto, niserianana.

¹⁵Naa enkenai eng'iriata o Laitoriani lang inchere enjeunoto, neijia sii etiu olalashe lang onyorri Paulo etisira te risioroto e ng'eno naishooki ninye,

¹⁶eimaki ena anaa enajo too mpala enyena pooki. Amu etii atua ninche kulie naagol eyiolounoto naaboin iltung'ana lemeiteng'ena, nemeeta enkitashoto nauno nemerregel te nkidaaroto enye maate, anaa enaiko ilkulikae kigerot.

¹⁷Ore naa intae, ilanyor, itayioloito ena eton eado kop, entorrip ate pee meshoroo ake aaya intae te nkitapong'oroto oo ltung'ana lemeshilaa inkitanapat, neitiakieki intae enkitashoto inyi nauno.

¹⁸Kake entubulu te mpiris o te yiolounoto o Laitoriani naa Olaitajeunoni lang Yesu Kristo. Metaa enenye enkitoo te pokira, taata o metabaiki ina olong oo ntarasi.