Read MAASAI REVISED PROTESTANT 1 Yohana 2 Bible Online

1 Yohana 2 - MAASAI REVISED PROTESTANT bible

1 Yohana 2

¹Nkera aainei kutiti, intae aigeroki kuna pee miasiasa ing'ok; kake te neas oltung'ani ing'ok, nikiata olomitu iyiook te Papa, naa Yesu Kristo loo sipat;

²naa ninye olkituket loo ng'ok ang, neme nkunaang ake kake o ne nkop pooki.

³Naa ore pee kintadedeyie nchere eikiyiolo ninye, nikimbung inkitanapat enyena.

⁴Ore olojo, “Kayiolo nanu ninye” nemeibung inkitanapat enyena naa olalejani ilo, nemetii esipata atua ninye;

⁵kake ore pooki ng'ae oibung ororei lenye, naa tiatua ninye eitabari enyorrata e Nkai. Teina kintisip inchere kitii iyiook atua ninye.

⁶Ore olojo keton tiatua ninye neishiakino te neikunari anaa eneikunari apa ninye.

⁷Ilanyor laainei, mme enkitanapata ng'ejuk aigeroki intae, kake enkitanapata musana niatata apake te nkiterunoto; ore ina kitanapata musana naa ilo rorei lindipa aatoning.

⁸Kake, aigeroki ake intae enkitanapata ng'ejuk, nasipa te ninye nesipa te intae amu keishari enaimin neidipa atawang'a ina wang'an nasipa.

⁹Ore ilo ojo te wang'an eloito neton ake eiba olalashe lenye neton etii ninye atua enaimin.

¹⁰Ore olonyor olalashe lenye neton tiatua ewang'an, ore tiatua ina ewang'an nemeetae entoki narrorrisho.

¹¹Kake ore ilo oiba olalashe lenye atua enaimin etii neloito tiatua enaimin, nemeyiolo eneloito, amu eitamodoo enaimin inkonyek enyena.

¹²Nkera aainei kutiti, aigeroki intae, amu, etapalikiaki intae ing'ok inyi te nkaraki ninye.

¹³Naigeroki intae iloo papa amu, iyiololo ilo otii apake te nkiterunoto. Naigeroki intae lo barnot, amu itimira ilo torrono. Naigeroki intae, nakera, amu iyiololo Papa.

¹⁴Naigeroki intae iloo papa, amu iyiololo ilo otii apake te nkiterunoto. Naigeroki intae, lo barnot, amu igoligolo, neton ororei le Nkai tiatua intae, nitimira ilo torrono.

¹⁵Eminyorru enkop anaa ntokitin naatii enkop. Ore oltung'ani ake pooki onyor enkop, nemetii enyorrata nanyor Papa atua ninye.

¹⁶Amu ore nena pooki naatii enkop, ng'uarrat o sesen, ng'uarrat oo nkonyek o lwuasa le nkishui, ine nkop nena mme ne Papa.

¹⁷Naa keishari enkop, o ng'uarrat enyena; kake ore ilo oas enayieu Enkai nebik intarasi.

¹⁸Nakera esaa nabayie ena, naa ore amu itoning'o aajo kelotu Oloiba Kristo, eidipa doi taata aaetu ilooiba Kristo kumok, teina kiyiolo aajo esaa nabayie ena.

¹⁹Tiatua iyiook etupukutuo aapuo, kake mme ilkulalang apake, amu te naa ke lkulalang apa, anaata etotona tenebo o iyiook; kake etupukutuo aapuo, pee eibalayu nchere mme lkulalang lelo pooki.

²⁰Kake eidipaki aaela ninche intae ilo Obo Sinyati, niyiololo pooki.

²¹Ore pee aigeroki intae, neme te nkaraki nimiyiololo esipata, kake te nkaraki niyiololo, niyiololo sii aajo metii elejare atua esipata.

²²Kalo doi olalejani leme ilo otanya ejo ore Yesu ninye Kristo, Ilo doi Oiba Kristo, olotanya Papa neany Oinoti lenye.

²³Meetae oloany ilo Inoti oitoki ninye aata Papa. Ore oloibalunye ilo Inoti keeta sii ninye Papa.

²⁴Enchoo ina nitoning'o apake te nkiterunoto ebik tiatua intae. Te nebik tiatua intae ina nitoning'o apake te nkiterunoto naa eibikibiki sii tiatua ilo Inoti o tiatua Papa.

²⁵Naa ena eisiligie ninye iyiook, enkishui oo ntarasi.

²⁶Aigeroki intae ena tialo lelo oojo pee elej intae;

²⁷kake etamanya intae enkielata nitang'amutua te Kristo; nimiatayieyie tipat enkiteng'enare nalotu likae aitoki aiteng'en intae amu eiteng'ena intae enkielata too mbaa pooki, nesipa ninye, mme elejare, ore ake anaa ina naiteng'ena intae, entotoni intae tiatua ninye.

²⁸Ore taata, naa kera kutiti, entotoni tiatua ninye, paa ore pee elioyu nikintieu aaing'ura nimikikurru te lotunoto enye.

²⁹Ti nitayioloito ilo aajo oloo sipat ninye, nitayiloito aajo ore ake pooki ng'ae oas isidan naa keino te Nkai.