Read MAASAI REVISED PROTESTANT 1 Yohana 3 Bible Online

1 Yohana 3 - MAASAI REVISED PROTESTANT bible

1 Yohana 3

¹Eng'ura eneba enyorrata natonyorra iyiook Papa, pee eipoti iyiook aajo nkera e Nkai; naa kesipa eikira. Ore pee meyiolo iyiook enkop naa te nkaraki neitu eiyiolou Enkai.

²Ilanyor laainei, kira taata iyiook inkera e Nkai, neton eitu elioyu enikiyiooki aatiu, kake kiyiolo aajo ore pee elioyu Kristo nikitiu anaa ninye amu aikidol ninye anaa eneikununo.

³Naa ore pooki ng'ae oata ele siligi te ninye neitisiny kewan anaa enasinya ninye.

⁴Ore pooki ng'ae oas intorrok neeta entiyoto e mpaashata oo nkitanapat; ing'ok empaashata o nkitanapat.

⁵Iyiololo aajo eewuo ninye pee etum aawa ing'ok, nemetii ing'ok atua ninye.

⁶Meetae oloton tiatua Kristo oas ing'ok, nemeetae oloas ing'ok otoduaa ninye aashu otayiolo ninye.

⁷Nakera kutiti, emincho elej intae oltung'ani. Ore ilo oas isidan naa aisupat, anaa paa supat ninye.

⁸Ore ilo oas ing'ok naa ole Sheitani, amu etaasa apa Sheitani ing'ok ebaiki enkiterunoto. Ina pee etaliee Oinoti le Nkai pee eidaikie isiaaitin e Sheitani.

⁹Meetae oloino te Nkai oas ing'ok amu eton empukunoto e Nkai tiatua ninye. Nemeas ninye ing'ok amu keino te Nkai.

¹⁰Tena eidimi aatodol nchere kakua inkera e Nkai, naa kakua inkera e Sheitani: ore pooki ng'ae lemeas enaishaakino neme ole Nkai, naa nejia etiu ilo lemenyor olalashe lenye.

¹¹Ele kilikuai itoning'o apake te nkiterunoto, nchere matonyorrata olikae o likae,

¹²pee mikitiu anaa Kain le ilo torrono otara apa ninye olalashe lenye metua. Naa ainyoo pee etara ninye metua? Te nkaraki naa torrok inkiasin enyena naa sidain ino lalashe lenye.

¹³Eming'asia ilalashera, nchere keiba intae enkop.

¹⁴Eikiyiolo iyiook aajo kitupukutuo te keeya aajing empuaan, amu kinyor ilalashera. Ore olemenyorrisho netii atua keeya.

¹⁵Ore pooki ng'ae oiba olalashe lenye naa olarani, niyiololo intae aajo meetae olarani omany enkishui oo ntarasi atua ninye.

¹⁶Ena kiyiolounye enyorrata, nchere eirragie Kristo enkishui enye te nkaraki iyiook; neishiakino sii ninche iyiook te nikirragie enkishui ang te nkaraki ilalashera.

¹⁷Kake te neeta ake oltung'ani masaa e nkop neduaaki olalashe enyamali, nemeeta olng'ur tialo ninye, kaji naa etamanya enyorrata e Nkai tiatua ninye?

¹⁸Nakera kutiti emikinyorrisho to rorei ake aashu to lng'ejep kake to nkiasin o te sipata.

¹⁹Ena kiyiolounye aajo kira iyiook ile sipata, nikintadedeyie iltauja lang te dukuya ninye,

²⁰enoshi kata naiguanare iyiook iltauja lang, amu kitok Enkai alang iltauja lang, neyiolo pooki toki.

²¹Ilanyor laainei, te nemeiguanare iyiook iltauja lang, nikiata empijan nikintoriokinore Enkai;

²²naa eikitum pooki toki nikiomonu, amu eikimbung inkitanapat enyena nikias ina naitiship ninye.

²³Naa ena enkitanapata enye, nchere mairuko enkarna o Inoti lenye Yesu Kristo nikinyorruno maate, anaa ina ake naitanapa iyiook.

²⁴Ore lelo pooki ooibung inkitanapat enyena netoni ninche tiatua ninye. Naa ena kiyiolounye nchere etonita ninye tiatua iyiook, te nkaraki ina Kiyang'et Sinyati naishoo ninye iyiook.