Read MAASAI REVISED PROTESTANT Ilarishak 11 Bible Online

Ilarishak 11 - MAASAI REVISED PROTESTANT bible

Ilarishak 11

¹Ore apa Yepta ilo le Gilead naa olmurrani magilani, kake olayioni apa le mulayoi ninye. Gilead apa menye le Yepta.

²Ore apa enkitok e Gilead neiki sii ninye ilayiok. Ore ake pee ebulu lelo ayiok le ina kitok enye, nearaa ninche Yepta, nejoki ninye, “Mijung iyie enkaji e papa lang; amu ira iyie oliae kitok.”

³Neisik Yepta aing'uaa ilalashera lenyena, nelo abik te nkop e Tob; neiturrurrokino iltung'ana le pesho Yepta, nepuo aarisho te nebo ninye.

⁴Ore te nkiti rishata neitayunye iltung'ana le Amon olarrabal Israel.

⁵Ore ake pee eitayunye iltung'ana le Amon Israel olarrabal, nepuo ilpayiani le Gilead aariku Yepta te nkop e Tob.

⁶Nejoki ninche Yepta, “Wou taa olarikoni lang, pee kitum iyiook aataarare Ilamoni.”

⁷Kake etiaaka Yepta lelo payiani le Gilead, “Keitu apa intae kimbayuyu nanu, nikiaraa nanu aaipang'ie te nkaji e papa lai? Kainyoo taata pee ietuo enatii nanu iatata enyamali?”

⁸Nejoki lelo payiani le Gilead Yepta, “Ina pee kimbelekenyakinote taata iyiook iyie, pee itum ashomo te nebo iyiook niarare Ilamoni, niaku olarikoni lang te lelo pooki oomanya Gilead.”

⁹Nejoki Yepta lelo payiani le Gilead, “Ti nikintokiki nanu aaya ang mashomo aarare Ilamoni, ore ake pee aaisho Olaitoriani ninche, naaku nanu olarikoni linyi.”

¹⁰Nejoki lelo payiani le Gilead Yepta, “Olaitoriani olo aaku shakeni te rishata ang, kesipa eikiaas iyiook anaa enitejo.”

¹¹Nelo Yepta te nebo lelo payiani le Gilead, neitaa ninye iltung'ana endukuya o larikoni te shumata ninche; neiro irorei lenyena pooki te dukuya Olaitoriani te Mispa.

¹²Neitoki Yepta airriwaa ilkiliku enetii olaiguanani le Amon nejoki, “Kainyoo iyie kiatakinore nanu, pee iewuo enatii nanu, pee iarare enkop ai?”

¹³Newaliki ilo aiguanani le Amon lelo apa ooirriwayie Yepta ajoki, “Te nkaraki naa ore apa Israel pee elotu te Misiri neya enkop ai, ebaiki Arnon o metabaiki Yabok nelo abaiki Yordan; ore naa taata torrinyu te seriani.”

¹⁴Neitoki Yepta airriwaki ilkiliku olaiguanani le Amon,

¹⁵nejoki ninye, “Nji ejo Yepta: Eitu eya Israel enkop e Moab aashu enkop e Amon,

¹⁶kake ore apa pee eilepu Israel te Misiri nepuo aaim olpurkel o metabaiki Enaiposha Nanyokie nepuonu Kadesh.

¹⁷Neirriwaki Israel ilkiliku olaiguanani le Edom, ejo, ‘Nchoo siaake iyiook maima enkop ino.’ Kake etanya olaiguanani le Edom ening. Neitoki sii airriwaki ilkiliku olaiguanani le Moab, kake eitu enyorraa. Neaku etobiko apa Israel te Kadesh.

¹⁸Neim ninche olpurkel pooki nepuo aamanaa te nkop e Edom o enkop e Moab, nepuo aaitayu ilng'oborri te nkae shoto e Arnon; kake eitu ninche ejing atua enkop e Moab, ore apa Arnon naa ninye olpolosie le Moab.

¹⁹Neitoki Isiraeli aairriwaki ilkiliku Sihon loo Lamori o laiguanani le Heshbon; nejoki Israel ninye, ‘Nchoo sii ake iyiook matulusoi kitasayia iyie, aaim enkop ino aapuo enkop ang.’

²⁰Kake eitu apa eisilig Sihon Israel meima enkop enye; neaku eiturrurro apa Sihon iltung'ana lenyena pooki te nebo, neitayu ilng'oborri te Yahas, nearare Israel.

²¹Neishoru Olaitoriani Enkai e Israel Sihon o ltung'ana lenyena pooki apik atua inkaik oo Siraeli, nemir Israel ninche; neya taa Israel ina kop pooki oo Lamori, apa oomanya ina kop.

²²Neya sii ina kop pooki oo Lamori ebaiki Arnon o metabaiki Yabok o ebaiki olpurkel o metabaiki Yordan.

²³Neaku taa, Olaitoriani, Enkai e Israel, ninye otaarayie aoru Ilamori te dukuya iltung'ana lenyena, Israel; naa amaa iya iyie ninche araya?

²⁴Eimiya iyie ina nikincho Kemosh enkai ino? Ore ina pooki naatarua Olaitoriani Enkai ang te dukuya iyiook nikiya iyiook.

²⁵Eira iyie supat alang Balak olayioni le Sipor, olaiguanani le Moab? Ketekeshare aekata ninye Israel anaa keshomo aekata aarare ninche?

²⁶Amaa apa ebikito Israel te Heshbon o too nkang'itie enye kutiti, o tiatua Aroer o nkang'itie enyena kutiti, o tiatua nena anas pooki apa naatii embata e Arnon, too larin iip uni, kainyoo apa iyie pee eitu iya nena kuapi teina kata?

²⁷Eitu naa nanu aas eng'oki tialo iyie, nikintaasa iyie nanu entorrono aitayunye olarrabal; nchoo Olaitoriani, ilo Arishani eaku olarishani too ltung'ana le Israel o too ltung'ana le Amon.”

²⁸Kake ore ilo aiguanani le Amon eitu eshilaa ilo kilikuai le Yepta apa oirriwaka ninye.

²⁹Nelotu Enkiyang'et o Laitoriani shumata Yepta, nelo agiroo Gilead o Manase, negiroo alo Mispa e Gilead, aim Gilead negiroo Mispa e Gilead alo enetii ile Amon.

³⁰Nenya Yepta olmumai to Laitoriani, nejo, “Tenaa einchoru iyie ile Amon apik atua inkaik aainei,

³¹neaku ore pooki ng'ae oipang'u aimu nkutukie e nkaji ai, pee aalotu anang'are nanu, te narrinyo alotu aisula ile Amon, neaku olo Laitoriani, naishoru nanu ninye metaa olasar opejori.”

³²Nelang Yepta alo enetii ile Amon aarare ninche neishooyo Olaitoriani ninche apik atua inkaik enyena.

³³Near ninche ebaiki Aroer o metabaiki elatia e Minit, nkanas tikitam, o metabaiki Abel-keramim, te sesekuanata kitok oleng. Neaku etimiraki apa ile Amon te dukuya iltung'ana le Israel.

³⁴Neitoki Yepta alotu enkang enye te Mispa, neipang'u entito enye alotu anang'are ninye eranyisho neosh entampuri, naa ninye apake enkerai naata, meeta apa ae tito aashu olayioni.

³⁵Ore ake pee edol ninye, nepolos inkilani enyena, nejo, “Ee entito ai! Kintadouo iyie nanu oleng, nitaa iyie enkipirunoto e nyamali sapuk te nanu; amu ataboloko nanu Olaitoriani enkutuk ai nemaidim ainyaai olmumai lai.”

³⁶Nejoki ina tito enye ninye, “Papa, ti nitaboloko iyie Olaitoriani enkutuk ino, ntaasaki nanu enaba anaa enaimua enkutuk ino, amu kitalaaka Olaitoriani too lmang'ati linono te lelo le Amon.”

³⁷Nejoki ninye menye, “Nchoo maaitaasi ena bae; nchooki ake duoo iyie ilapaitin oaare, pee alo nanu aisampash too ldoinyo aishiraki titoisho ai, nanu o esirit ai.”

³⁸Nejoki menye, “Shomo.” Neisho ninye meshomo ilapaitin oaare; nelo ninye ina tito, ninye o encholiek enye, nelo aishiraki titoisho enye too nchumat oo ldoinyo.

³⁹Ore te nkiting'oto oo lapaitin oaare, neshukunye ninye enetii papaai lenye, apa oitaasa ninye te risioroto e ilo mumai apa oinosa. Eitu aekata eyiolou ina tito olee. Neaku apa olkerreti te Israel

⁴⁰nchere kepuo ake ntoyie e Israel to lari aaishiraki entito e Yepta ilo le Gilead nkolong'i ong'uan to lari.