Read MAASAI REVISED PROTESTANT Ilarishak 14 Bible Online

Ilarishak 14 - MAASAI REVISED PROTESTANT bible

Ilarishak 14

¹Nedoyio apa Samson alo Timna, ore te Timna nedol entito nabo oo Lfilisti.

²Neilepu ninye alotu, nejoki menye o ng'otonye, “Atoduaa nanu entito nabo oo Lfilisti te Timna; entorikokoki nanu metaa enkitok ai.”

³Kake etiaakita menye o ng'otonye ninye, “Aimeetae enkitok tiatua ntoyie o lgilata linyi, aashu tiatua iltung'ana lang pooki, eji pee ilo ayau enkitok too Lfilisti lememurata?” Kake etiaaka Samson menye, “Torikokoki nanu ninye; amu kaaitiship ninye nanu oleng.”

⁴Meyiolo apa menye o ng'otonye Samson nchere Olaitoriani eing'uaa ina; amu keing'oru apa ninye erishata naarie Ilfilisti. Ore apa ina kata naa Ilfilisti ooitore Israel.

⁵Nedoyio Samson o menye o ng'otonye aapuo Timna, nepuo enkurma oo lng'anayio e Timna. Naa ng'ura, neikurrukurroki ninye olkuoo lo lng'atuny.

⁶Nelotu Enkiyang'et o Laitoriani shumata ninye te ngolon, nepolos ninye ilo ng'atuny anaa oltung'ani opolos olkuoo le kine; nemeeta apa ninye toki te nkaina enye. Kake eitu apa ninye eliki menye aashu ng'otonye enataasa ninye.

⁷Nedoyio ninye alo airorie ina kitok; neitiship ina kitok Samson oleng.

⁸Ore te nkiti rishata nerrinyo alo aya ninye; neibelekenya aing'or empopok o lapa ng'atuny, naa ng'ura, etii emus oo lotorok ina popok o lng'atuny o enaisho oo lotorok.

⁹Nebelu ninye neibung too nkaik enyena, nelo ainosaa eloito; nelotu enetii menye o ng'otonye, neisho ninche embata, nenya ninche. Kake eitu ninye eliki ninche nchere te mpopok o lng'atuny eitayio ina aisho oo lotorok.

¹⁰Nedoyio menye Samson alo enetii ina kitok, neitobir Samson osirua teine, amu neijia apa eiko ilbarnot.

¹¹Ore ake pee edol iltung'ana ninye, neyau ninche iltung'ana tomoni uni pee epuonu aaku te nebo ninye.

¹²Nejoki Samson ninche, “Kaisho nanu intae oloyiote, naa ti nikindimidimi aatoliki nanu eneikununo, tiatua kuna olong'i naapishana o sirua, niyiolouu aajo kainyoo, naisho nanu intae nkilani tomoni uni e kitani o kulie kilani tomoni uni sidain;

¹³kake ti nimikindimidimi aatoliki nanu nchere kainyoo, nikinchosho intae nanu nkilani tomoni uni e kitani, o nkilani sidain.” Nejoki ninche ninye, “Tolimu oloyiote lino matoning.”

¹⁴Nejoki ninye ninche, “Oyiote: Etupukuo enainosi tiatua ina nainosisho. Etupukuo entoki namelok aimu ina nagol.” Neitu ninche eidim aatayiolo ilo oyiote too nkolong'i uni.

¹⁵Ore te nkolong e ong'uan nejoki ninche ina kitok e Samson, “Ilejileja olpayian lino metoliki iyiook ajo kainyoo ilo oyiote mikipejoo ake iyie o enkaji e papaai lino te nkima. Intoomono apa iyiook pee itumutumu aawaita imasaa ang?”

¹⁶Ore ina kitok e Samson neishir te dukuya ninye, nejoki, “Eikimba iyie, mikinyor nanu; itipikaka iyie oloyiote iltung'ana lang, neitu ninye kiliki nanu ajoki kainyoo.” Nejoki Samson, “Ng'ura, eitu aliki papa aashu yieyio, paa eijo iyie aliki?”

¹⁷Neishir ninye te dukuya ninye nena olong'i naapishana apa osirua lenye. Ore te nkolong e naapishana neliki ina kitok enye, amu eitirrishaka apa ninye oleng. Neliki ina kitok oloyiote lelo tung'ana lenye.

¹⁸Nejoki ilewa apa le ina anasa ninye te nkolong e naapishana eton eitu edoyio enkolong, “Kainyoo namelok alang enaisho oo lotorok? Kainyoo nagol alang olng'atuny?” Nejoki Samson ninche, “Teneme enkashe ai itukurrishore intae, anaata intae eitu itumutumu oloyiote lai.”

¹⁹Nelotu Enkiyang'et o Laitoriani te ngolon shumata ninye, nedoyio ninye alo Ashkelon near metuata iltung'ana tomoni uni le ina ang, neya ntokitin enye neisho nkilani lelo apa ootolimutuo oloyiote. Ore te ngoro napi neshuko alo enkaji e papaai lenye.

²⁰Neishori ina kitok e Samson ilo apa oboitare ninye, aa ninye apa shepu olkerr lenye.