Read MAASAI REVISED PROTESTANT Ilarishak 18 Bible Online

Ilarishak 18 - MAASAI REVISED PROTESTANT bible

Ilarishak 18

¹Ore apa te nena olong'i nemeetae olaiguanani te Israel. Ore apa te nena olong'i neing'oru olosho le Dan enjung'ore enye maate ewueji nemany; amu ore ebaiki ina kata meetae enjung'ore tiatua iloshon loo Siraeli nanoto ninche.

²Neirriu apa ile Dan iltung'ana imiet oodupa tiatua iltung'ana lo losho lenye pooki, eing'uaa Sora neing'uaa Eshtaol, pee epuonu aaikitalan enkop nejur; nejokini ninche, “Enchom entujur enkop.” Nepuonu apa ninche ina kop oo ndoinyo e Efraim, ine netii enkaji e Mika, neirrag ine.

³Ore apa etii ninche embata e nkaji e Mika, neyiolou ninche oltoilo le ilo barnoti loo Lawi; neibelekenya ninche nejoki ninye, “Kaing'ae likiyaua iyie ine? Kainyoo iyie iasita tene wueji? Kainyoo esiaai ino tene?”

⁴Nejoki ninye ninche, “Nji o nji aaitaasa nanu Mika: aaigero nanu, naaitaa nanu olapolosani lenye.”

⁵Nejoki ninche ninye, “Nkilikuanishore Enkai, kitoomono iyie, pee kitum aatayiolo tenaa kerasaa ena lototo nikipuoito.”

⁶Nejoki ilo apolosani ninche, “Enchom te seriani. Ore ina lototo nipuopuo netii abori enkong'u o Laitoriani.”

⁷Nepuo lelo tung'ana pokira imiet, nepuonu Laish, nedol iltung'ana apa ootii ine, eneikununo oltonei lenye te seriani, te mpukunoto oo le Sidon, eitirring'a nememuso, meeta entoki nabo e nkop nang'or, neeta karsisisho, o eneba elakuaniki ile Sidon nemeeta enaporokinore likae tung'ani.

⁸Ore ake pee epuonu ninche enetii ilalashera lenye te Sora o Eshtaol, nejoki ilalashera lenye ninche, “Kainyoo intae ilimumu?”

⁹Nejo ninche, “Entudumunye, maape iyiook aarare ninche; amu kitoduaa iyiook ina kop aajo kepir oleng. Eimiatata intae eniaasiasa? Emiyieta intae te lototo, kake entijing atua ina kop embung'a.

¹⁰Ti nipuopuo intae, naa ipuopuo aainepu iltung'ana lememuso. Kelala ina kop; ee, eishorua Enkai apik atua inkaik inyi, ewueji nemeeta entoki hoo nabo ena kop nemetii.”

¹¹Nedumunye iltung'ana iip ile lo losho le Dan, ootanapate too ruparen o larrabal, nepuo eing'uaa Sora o Eshtaol.

¹²Neilep aapuo neitayu ilng'oborri te Kiriat-Yearim tiatua Yuda. Ore te nkaraki ena naa keji ine wueji enkang e dan o taata; etii enkalo o loo ntoluo le Kiriat-yearim.

¹³Negiroo ninche ine nepuo ina kop oo ndoinyo e Efraim, nepuonu enkaji e Mika.

¹⁴Nejoki lelo tung'ana apa imiet ooshomo aaikitalan enkop e Laish lelo alashera lenye, “Iyiololo intae aajo ore atua kuna ajijik netii enkila o lgoo oo lapolosak, o Terafim e nkitanyaanyukoto naaguetuno o inaasholuno? Ore naa taata entayiolo eniaasiasa.”

¹⁵Neibelekenyakino ninche ine, nepuonu enkaji e ilo barnoti loo Lawi te nkang e Mika, neikilikuan ninye ilomon lenyena.

¹⁶Ore apa lelo tung'ana iip ile le Dan, ootanapate too ruparen enye o larrabal, neitashe te nejing'ieki kishomi.

¹⁷Ore lelo tung'ana imiet apa ooshomo aikitalan enkop neilep aapuo, nejing atua nepuo aaitayu ina kitanyaanyukoto naguetuno, ina kila o lgoo oo lapolosak, o enkitanyaanyukoto o Terafim, o ina kitanyaanyukoto nasholuno, ina kata eitashe olapolosani te mbata ewueji nejing'ieki kishomi te nebo lelo tung'ana iip ile apa ootanapate too masaa enye o larrabal.

¹⁸Ore ake pee epuo kulo atua enkaji e Mika neya ina kitanyaanyukoto naguetuno o enkila o lgoo oo lapolosak o Terafim o ina kitanyaanyukoto nasholuno, nejoki ilo apolosani ninche, “Kainyoo intae iasitata?”

¹⁹Nejoki ninche ninye, “Tigirayu, tipika enkaina ino enkutuk ino, nilotu te nebo iyiook, niaku te iyiook papa o lapolosani. Kenaikash iyie ti niaku olapolosani te nkaji o ltung'ani obo, anaa ei ti niaku olapolosani to losho to lmarei le Israel?”

²⁰Neshipayu oltau le ilo apolosani; neitayu ninye ina kila o lgoo oo lapolosak o Terafim, ina kitanyaanyukoto naguetuno, nelo ninye te nebo lelo tung'ana.

²¹Neibelekenya ninche nepuo, nepik nkera kutiti o nchoo o masaa dukuya ninche.

²²Ore eshomo ninche aalam enkang e Mika, neishiruni iltung'ana ootii nkajijik ootaaniki enkaji e Mika, nepuo ninche aainepu lelo tung'ana le Dan.

²³Nebuaaki ninche lelo tung'ana le Dan, aaibelekenyunye nejoki Mika, “Kainyoo nikinosita anaijo itorikuo olorere kumok ooba nji?”

²⁴Nejoki ninye, “Iwaita intae inkaitin aainei naitayio nanu, o lapolosani, nipuopuo, kainyoo naa aatung'ueikiaki? Kainyoo naa pee kijokiki intae nanu, ‘Eji kainyoo nikinosita?’ ”

²⁵Nejoki lelo tung'ana le Dan Mika, “Mincho iyie oltoilo lino metoning'i tiatua iyiook, pee mikidoiki iltung'ana ootagorote, niminie enkishui ino o nena tokitin e nkaji ino.”

²⁶Nepuo lelo tung'ana le Dan aaibung enkoitoi enye; ore ake pee edol Mika nchere kegol ninche oleng aalang ninye, neibelekenya neshuko alo enkang enye.

²⁷Neyau ninche nena tokitin apa naaitobirua Mika, o ilo apolosani apa ora olenye, nepuonu lelo tung'ana le Dan Laish, enetii iltung'ana oobor lememuso, nesesekuan ninche te nepi o lalem, nepejoo ina anasa te nkima.

²⁸Nemeetae apa olakordunoni amu kelakuaniki apa ninye Sidon, nemetii apa kulikae tung'ana ooata enabaikinore ninche. Etii atua oerata le Bet-rehob. Neitoki apa ninche aashet ina anasa nemany atua.

²⁹Neisho apa ina anasa enkarna aajo Dan, aaipotie nkakuyiaa lenye, apa otoiuo Israel; amu keji apa enkarna e ina anasa te dukuya Laish.

³⁰Neitobiraki apa lelo tung'ana le Dan a teina kitanyaanyukoto e nkai naguetuno; naa Yonatan ilo ayioni le Geshom, olayioni le Musa, o layiok lenyena apa ilapolosak lo losho le Dan o metabau ina olong apa natarayoki ilo osho.

³¹Neaku eitasheyie apa ninche ina kitanyaanyukoto e Mika naguetuno, naitayio ninye ina kata pooki apa natii enkaji e Nkai te Shilo.