Read MAASAI REVISED PROTESTANT Ilarishak 19 Bible Online

Ilarishak 19 - MAASAI REVISED PROTESTANT bible

Ilarishak 19

¹Ore apa te nena olong'i, eton meetae olaiguanani tiatua Israel, netii Olawi obo otii nena rishat naaliyio e ina kop oo ndoinyo e Efraim, apa oyaka kewan enkapiani e Betlehem tiatua Yuda.

²Ore ina apiani negorokino ninye, nelo enkaji e menye te Betlehem tiatua Yuda aing'uaa ilo Lawi, neton ninye teine too lapaitin oong'uan.

³Nedumunye ilo moruo lenye nelo asujaa, pee elo ailejilej ninye neshuku ninye ayau. Netii apa te nebo ninye osinka lenye o sirkon aare. Nelotu apa ninye enkaji e papaai lenye, ore ake pee edol menye ina tito ilo Lawi, nelotu te nchipai anang'are ninye.

⁴Neibok ninye olaputani, menye ina tito, neton ninye te nebo ninye nkolong'i uni; neaku etadaate ninche neokisho neirrag ine.

⁵Ore te nkolong e ong'uan nedumunye ninche tadekenya nenapa ninye pee elo; kake etiaaka menye ina tito olaputani lenye, “Ntagolo kewan inosa endaa, ore te siadi ina nitum taa ashomo.”

⁶Netoni lelo lewa pokira oaare aadaa neokisho te nebo; nejoki menye ina tito ilo tung'ani, “Tobiko tishipayu niyeng'iyeng'a.”

⁷Ore ake pee edumunye ilo tung'ani ajo alo, neitirrishaki olaputani ninye, o menyaaki aigil aairrag ine.

⁸Ore te nkolong e imiet nedumunye ninye tadekenya enasirie pee elo; nejoki menye ina tito, “Ntagolo kewan, totona o metigilayu enkolong.” Nedaa ninche pokira oaare.

⁹Ore ake pee edumunye ilo tung'ani o ina apiani enye o laisiaayiani lenye pee epuo, nejoki ninye olaputani lenye menye ina tito, “Ng'ura, etinyikaiyie endama aaku teipa; totona siaake enkewarie pooki, ng'ura etinyikua endama; irraga ene nchoo oltau lino eng'ida; ore taisere nidumunye tadekenya enasirie te nkaraki elototo ino, pee ilo ang.”

¹⁰Kake etanya apa ilo tung'ani eirrag ina kewarie nedumunye ninye alo, nelo abaya enkipirakinoto e Yebus (aa taa Yerusalem). Neeta apa te nebo ninye isirkon oaare ooitobiraki pee ekedi, netii apa ina apiani te nebo ninye.

¹¹Ore ake pee etaaniki ninche Yebus, netinyikayie endama, nejoki olaisiaayiani olkitok lenye, “Wou taata maibelekenyakinoto iyiook ena anasa oo Lyebusi, pee kirrag ena kewarie.”

¹²Nejoki ilo kitok ninye, “Mikimbelekenya iyiook aajing atua enkanasa oo ltung'ana leeiking'a leme iltung'ana le Israel ninche; kake eikigiroo iyiook aapuo Gibea.”

¹³Neitoki ninye ajoki ilo sinka lenye, “Wou matataaniki iyiook nabo e kuna wuejitin pee kirrag ena kewarie Gibea aashu Rama.”

¹⁴Negiroo ninche nepuo aaibung enkoitoi enye; nedoyio enkolong etii ninche embata e Gibea, nara ninye ene Benchamen.

¹⁵Neibelekenya ninche teine, aapuo aairrag ina kewarie Gibea. Nepuo ninche aatoni te nkoitoi kitok e ina anasa; amu meetae oltung'ani otoriko ninche atua enkaji enye meirraga ina kewarie.

¹⁶Ore ina teipa nelotu apa olpayian kitok eing'uaa esiaai enye tiatua enkurma teipa; ore apa ilo tung'ani naa o leina kop oo ndoinyo e Efraim, neidurraka apa Gibea amany. Ore apa iltung'ana le ine wueji naa ile Benchamen.

¹⁷Neshumu ninye nkonyek enyena nedol ilo tung'ani elotu to losinko leina anasa, nejo ilo payian kitok, “Kaji iyie iloito? Naa kaji ing'uaa?”

¹⁸Nejoki ilo Lawi ilo payian kitok, “Kipuoito iyiook aagiroo Betlehem tiatua Yuda, aapuo nekua rishat naabayie e ina kop oo ndoinyo e Efraim, naa ninye aing'uaa nanu. Ashomo apa Betlehem tiatua Yuda, naloito taata enkang ai, nemetii hoo oltung'ani laatoriko nanu atua enkaji enye.

¹⁹Kiaata iyiook endaa o lkujita loo sirkon lang o mukateni o enaisho te nkaraki nanu o ena sinka ino o ele barnoti otii te nebo isinkan linono; eitu eng'oriki iyiook toki.”

²⁰Nejo ilo payian kitok, “Meeu eseriani enitii; kagolie nanu iyieunot inono pooki; kake mirrag ena kewarie to losinko.”

²¹Neaku etorikuo apa ninye atua enkaji enye, neisho lelo sirkon lenyena olkujita, neisuj ninche nkejek enye, nedaa ninche neokisho.

²²Ore apa ina kata eegira aashipa ninche too iltauja lenye, nepuonu iltung'ana arruok neng'adu ina aji aaman, neosh kutuk e nkaji nejoki ninche ilo payian kitok, ilo openy e nkaji, “Mpang'unye ilo tung'ani duo oewuo atua enkaji ino, pee kitum iyiook aatayiolo ninye.”

²³Ore ilo payian, olopeny ina aji, neipang'aki ninche nejoki ninche, “A'a, ilalashera laainei, emiaas intae ena torroni; itoduaa aajo eewuo ele tung'ani atua enkaji ai, emiaas intae ena bae suuji.

²⁴Ng'ura ajo etii ene entito selenkei neitu eyiolou olee o enkapiani enye; ntasho maipang'unye nanu ninche. Embung'a ninche nintaasiasa ninche anaa enidolidolo eishiaakino te intae; kake ore tialo ele tung'ani emintaas ena bae suuji.”

²⁵Kake eitu ening lelo tung'ana ninye. Neaku eibung'a apa ilo payian enkapiani enye neipung'ie ninye boo mewaita ninche; neyiolou ninche ninye, neinyal enkewarie pooki o mekenyu. Ore ake pee emanaa enkakenya neisho meshomo.

²⁶Ore pee ekenyu, nelotu ina kitok nebatata te kutuk aji e nkaji e ilo payian apa naa ninye etii olkitok lenye, neirrag o metawang'a.

²⁷Nedumunye olkitok lenye tadekenya; ore ake pee ebol kutuk aji e ina aji neipang alo, nedol enkapiani enye eirragita te kutuk aji e ina aji, eibung'ita too nkaik enyena ntaloishin e kutukaji.

²⁸Nejoki ninye, “Tudumunye maape.” Kake eitu ewalikini ninye. Nepik ilo tung'ani ninye enkoriong o sikiria lenye; nedumunye ilo lee nelo enkang enye.

²⁹Ore ake pee ejing ninye enkaji enye, neyau enkalem, neibung ina apiani enye neorrior ninye erubata o erubata aitaa irubat tomon o are, neirriwaa ninye nkuapi pooki e Israel.

³⁰Ore pooki ootoduaa ina nejo, “Eitu aekata easayu embae naaijo ena aashu edoli ebaiki enkolong apa naileputua iltung'ana le Israel aapuku te nkop e Misiri o metabaiki ena olong! Embirribirra enguanare niwaliwala.”