Read MAASAI REVISED PROTESTANT Ilarishak 2 Bible Online

Ilarishak 2 - MAASAI REVISED PROTESTANT bible

Ilarishak 2

¹Neilep olmalaika lo Laitoriani te Gilgal alo Bokim. Nejo ninye, “Ayaua apa nanu intae ailepunye te Misiri, nayau intae atua ina kop apa nainosa olmumai pee aisho loo papaai linyi. Atejo apa, ‘Magil ae kata olning'o lai o intae,

²nimintobiribiri sii intae olning'o o kulo oomanya ena kop; niaariara ilpereren lenye lo lasar’ kake eitu intae imbung'ubung'u enkitanapata ai. Kainyoo ena nitaasa intae?

³Neaku ajoki taata intae, maaraa ninche aipang'ie te dukuya intae; kake keaku ninche ilmang'ati te ntae, naa keaku inkaitin enye orreshet te intae.”

⁴Ore ake pee eiro ilo malaika lo Laitoriani kulo rorei too ltung'ana pooki le Israel, neyietu iltung'ana aaishir.

⁵Neisho ninche ine wueji enkarna aajo Bokim; neitaiki Olaitoriani olasar teine.

⁶Ore ake pee eisho Yoshua iltung'ana meshomo, nepuo lelo tung'ana le Israel oltung'ani ake enjung'ore enye, pee elo aya enkop.

⁷Neisiaai iltung'ana Olaitoriani inkolong'i pooki e Yoshua o nkolong'i pooki e lelo payiani apa ootii te siadi Yoshua, apa ootoduaa ina siaai pooki kitok nataasa Olaitoriani te nkaraki Israel.

⁸Neye Yoshua olayioni le Nuni, ilo sinka lo Laitoriani, aa oloo larin iip o tomon.

⁹Nenukaa ninche ninye to lpolosie le njung'ore enye te Timat-heres, tiatua ina kop oo ldoinyo e Efraim, te moikuape oldoinyo le Gaash.

¹⁰Ore apa ina ishoi pooki neishunye sii ninche aaye; neitoki ailepu ae ishoi te siadi ninche, apa nemeyiolo ninye Olaitoriani aashu esiaai apa nataasa ninye te nkaraki Israel.

¹¹Neas lelo tung'ana le Israel entorrono too nkonyek o Laitoriani neisiaai inkaitin e Baal.

¹²Neing'uaa ninche Olaitoriani Enkai oo loo menye apa naa ninye nayawua ninche aitung'uaa enkop e Misiri; nepuo ninche aasujaa kulie aitin, tiatua nena aitin oo loreren apa oomanita ninche, neirrugokino ninche; neitagor ninche Olaitoriani.

¹³Neing'uaa ninche Olaitoriani, neisiaai inkaitin e Baal o Ashtarot.

¹⁴Neaku eyupuyupo apa engoro o Laitoriani tialo Israel, neishooyo ninye ninche apik atua inkaik oo lmang'ati lenye nemiraki ninche engolon e lelo mang'ati oomanita ninche, o metaa meekure eidim aairisha ilmang'ati lenye.

¹⁵Kejo ake maape olarrabal, negilunore ninche enkaina o Laitoriani te ntorroni anaa apa enatejo Olaitoriani, o anaa sii enainosa Olaitoriani olmumai tialo ninche, neing'aing'ai ninche oleng.

¹⁶Neput Olaitoriani ilarishak, ooitajeu ninche aaitayu te ngolon e lelo apa ootaraitie ninche.

¹⁷Ore ake eyia, eitu ninche ening ilarishak lenye, amu eiborrie onyek esujaa kulie aitin neirrugokino ninche; eibelekenyate apa nabo kata aapong ina oitoi naa ninye apa eima loo menye, lelo apa oibung'a nkitanapat o Laitoriani, neitu ninche eas ina.

¹⁸Ore ake anaa te neput Olaitoriani ilarishak te nkaraki ninche, netii Olaitoriani te nebo ilo arishani, neitajeu ninye ninche aitung'uaa enkaina oo lmang'ati lenye too nkolong'i pooki e ilo arishani; amu eing'urrie apa Olaitoriani ninche te nkaraki osina lenye te nkaraki lelo apa ooisomita ninche neinosie osina.

¹⁹Kake ore apa te neye olarishani, neibelekenya ninche neas intorrok alang iloo menye, epuo aasujaa kulie aitin, neisiaai ninche neirrugokino ninche; eitu apa ninche epal ae nabo oo mbaa enye torrok aashu nena enye e ngolong'u.

²⁰Neaku eyupuyupo apa engoro o Laitoriani te nkaraki Israel; nejo ninye, “Ore te nkaraki natigila kulo tung'ana olning'o lai apa laitanapa nanu loo menye, neitu ening oltoilo lai,

²¹meekure nanu ebaiki taata aaraa aipang'ie te dukuya ninche hoo ninye olosho obo te lelo apa ootung'uayie Yoshua pee eye,

²²paa ore te ninche natum nanu atetema Israel, tenaa keshilaa aapuo te nkoitoi o Laitoriani, anaa apa enataasa iloomenye aashu eneitu.”

²³Neaku etapala apa Olaitoriani lelo oshon, eitu earaa ninche aipang'ie nabo kata, neitu ninye eishooyo ninche apik atua engolon e Yoshua.