Read MAASAI REVISED PROTESTANT Ilarishak 4 Bible Online

Ilarishak 4 - MAASAI REVISED PROTESTANT bible

Ilarishak 4

¹Neigil ake iltung'ana le Israel aas entorrono too nkonyek o Laitoriani, ina kata eidipa Ehudi atua.

²Nemir Olaitoriani ninche metijing'a atua enkaina e Yabin olaiguanani le Kanaan, apa laa ninye oitoreisho te Hasor. Ore apa olarikoni le njore enye naa Sisera, nemanya apa ninye Harosheta-goiim.

³Neitoki iltung'ana le Israel aaishiraki Olaitoriani metaretu; amu keeta apa Yabin ngarrin iip naaudo oo sekenke, neisomita apa iltung'ana le Israel te nkisikong'ata too larin tikitam.

⁴Ore apa Debora enkoiboni e Nkai, ina kitok e Lapidot, naa ninye apa narishita Israel teina kata.

⁵Neton apa ninye te ntonata o ltukai le Debora te rishata e Rama o Betel tiatua ina kop oo ndoinyo e Efraim. Neilepu iltung'ana le Israel aapuonu enetii ninye te rishare.

⁶Neirriwaa ninye olkilikuai aipotu Barak olayioni le Abinoam te Kedesh tiatua Naftali, nejoki ninye, “Kintanapa iyie Olaitoriani, Enkai e Israel, nejo, ‘Shomo nturrurro iltung'ana linono to ldoinyo le Tabor, iwa iltung'ana nkalifuni tomon lo losho le Naftali o lo losho le Sebulon.

⁷Naa kayietu nanu Sisera, ilo kitok le njore e Yabin, pee kilotu atumore te mbata o lkeju le Kishon te nebo ngarrin enyena o ltimito lenyena; naa kaishoru nanu ninye apik atua enkaina ino.’ ”

⁸Nejoki Barak ninye, “Ti nilo iyie te nebo nanu, nalo, kake te nimilo iyie te nebo nanu, nemalo nanu.”

⁹Nejo ninye, “Ore te sipata, kalo nanu te nebo iyie; ore eyia, ore ina oitoi niim iyie nemeyau enkisisa ino, amu kemir Olaitoriani Sisera apik atua enkaina e nkitok.” Nedumunye Debora alo te nebo Barak Kedesh.

¹⁰Neipotu Barak Sebulon o Naftali meetu Kedesh; neilep iltung'ana nkalifuni tomon aasujaa ninye, nelo sii Debora te nebo ninye.

¹¹Netoorote apa Heberi ilo le Keni o Lkeni, lelo le ishoi e Hobabu olaputani le Musa, nelo aunoki olng'obor lenye olchani onyaanyukie olng'aboli te Sa-ananim, apa nataaniki Kedesh.

¹²Ore ake pee elikini Sisera nchere eshomo Barak olayioni le Abinoam oldoinyo le Tabor,

¹³neipotu Sisera ngarrin enyena pooki, ngarrin iip naaudo oo sekenke, o lelo tung'ana pooki apa ootii te nebo ninye, ebaiki Haroshet-hagoiim o metabaiki olkeju le Kishon.

¹⁴Nejoki Debora Barak, “Tudumunye! Amu ena olong eishooyie Olaitoriani Sisera apik atua enkaina ino. Aime Olaitoriani olo te dukuya iyie?” Nedoiyio Barak to ldoinyo le Tabor tenebo iltung'ana inkalifuni tomon oosujita ninye.

¹⁵Nemir Olaitoriani Sisera o ngarrin enyena pooki o enjore enye pooki te dukuya Barak nepik enepi olalem; nedou Sisera te ngarri enye neisik alo too nkejek.

¹⁶Nesujaa Barak nena garrin o mbartan o enjore o meshomo Haroshet-hagoiim, ore ina jore pooki e Sisera nebatata te nepi olalem; eitu ninye eleku oltung'ani.

¹⁷Kake eisika apa Sisera too nkejek o meshomo olng'obor le Yael, enkitok e Heberi loo Lkeni, amu etii apa eseriani erishata e Yabin olaiguanani le Hasor o enkaji e Heberi ilo Keni.

¹⁸Neipang'u Yael alotu anang'are Sisera, nejoki ninye, “Wou, olkitok lai, wou enkaji ai, miureishoyu.” Neaku eibelekenyunye ninye ajing atua olng'obor lenye neimulumul ninye to lkarasha.

¹⁹Nejoki Sisera ninye, “Nchooki siaake enkiti are naok; amu kaata enkure.” Nebol ninye olbene lo lchoni le kule neisho ninye metooko neitoki aimulumul ninye.

²⁰Nejoki ninye, “Ntasho te kutuk aji o lng'obor, naa ore pooki tung'ani likilotu aikilikuan ajoki, ‘Ketii oltung'ani ene?’ Tejo, ‘Metii.’ ”

²¹Kake ewa apa Yael ina kitok e Heberi encheitoi o Lng'obor, neya enyuntu te nkaina enye, nelo ninye maakutiti, neoshoki encheitoi eseder enye nepudaki enkop, kaae neye ninye te nauri.

²²Naa ng'ura ore esujita Barak Sisera nelo Yael anang'are ninye, nejoki ninye, “Wou maaitoduaa ilo tung'ani ligira aing'oru.” Nelo ninye atua olng'obor lenye, neirrag Sisera teine etua, etii encheitoi o lng'obor olpura le nkomom enye.

²³Neaku ore apa ina olong etimira Enkai Yabin olaiguanani le Kanaan te dukuya iltung'ana le Israel.

²⁴Netum enkaina oo ltung'ana le Israel engolon oleng tialo Yabin ilo aiguanani le Kanaan, o metaba anaa neidaikie Yabin olaiguanani le Kanaan.