Read MAASAI REVISED PROTESTANT Ilarishak 5 Bible Online

Ilarishak 5 - MAASAI REVISED PROTESTANT bible

Ilarishak 5

¹Ore apa ina olong nerany Debora o Barak olayioni le Abinoam ele sinkolio:

²“Ore te nkaraki natijing'a ilkituaak dukuya te Israel, ore te nkaraki naitaituo iltung'ana ate te yieunoto, meisisi Olaitoriani!

³“Entoning intae Ilaiguanak, enchoru enkiok, lo kituaak; Olaitoriani nanu aranyaki, kaoshoki nanu olkerempe, Olaitoriani Enkai e Israel.

⁴“Olaitoriani, ore ishomo iyie aaing'uaa Seir, nilo iyie te nkop e Edom, neikirikira enkop, neitong'u shumata, ee, neitong'u inkatambo enkare.

⁵Neikirikira ildoinyo te dukuya Olaitoriani, lido doinyio le Sinai te dukuya Enkai e Israel.

⁶“Ore apa too nkolong'i e Shamgar, olayioni le Anat, ore apa too nkolong'i e Yael, eishunye ilapuayak, ore lelo oopuaya neim embata oo nkoitoi.

⁷Eishunye iloing'ok te Israel, eishunye ninche o metaba anaa nilotu iyie Debora alotu anaa ng'otonye e Israel.

⁸Te negeluni apa kulie aitin, neaku nchomito etii olarrabal. Amaa, ketumi apa elong'o anaa empere tiatua nkalifuni artam te Israel?

⁹Eipirta oltau lai ilarikok le njore e Israel, lelo apa ooitaituo ate te yieunoto tialo iltung'ana. Meisisi Olaitoriani.

¹⁰“Embalunye ninye, intae ilooked isirkon barrikon, intae ilootonie ilmukekani[1] oogol enkinyiang'a, o intae iloopuo te nkoitoi.

¹¹Ore too ltoiloishi loo laranyak, too wuejitin oo nkariak, ore teine nelikioo aaigil nkisulat o Laitoriani, enkisulata oo loing'ok lenye tiatua Israel. “Neruko aadoyio aaim nchomito iltung'ana lo Laitoriani.

¹²“Inyo, Inyo, Debora! Inyo, inyo taranya osinkolio! Tudumunye, Barak, toriko lelo litarayie, La ayioni le Abinoam.

¹³Nedoyio aapuo ilo pisiai loo lkituaak; neruko aadoyio iltung'ana lo Laitoriani, te nkaraki ninye, aapuo aarare lelo magil.

¹⁴Ore ebaiki Efraim nepuonu ninche aaipang'u nejing oerata, kisujita iyie Benchamen tenebo iltung'ana linono. Ore te Makir neruko ilkituaak aapuo, ore te Sebulon neruko aapuo lelo oonap esiare o larikoni.

¹⁵Eetuo ilkituaak le Isaakar te nebo Debora, o Isaakar oisiligayu te Barak; atua ilo erata ekuetikitia aasuj ninye. Ore tiatua ilgilat le Ruben netii apa eoro sapuk.

¹⁶Kainyoo iyie pee itotona too ntare ijo pee ining nkisulat oo ntare? Ore tiatua ilgilat le Ruben netii eoro sapuk eitu emut tenaa keidim aaetu.

¹⁷Etotona Gilead te lido kekun le Yordan; oo Dan, kainyoo pee etotona ninye too melin? Etotona Asheri aitirring'a to lomanaa le naiposha, neton abik te nedounyeki.

¹⁸Ore Sebulon naa olorere otipika enkishui batisho o metabaiki keeya neijia sii etiu Naftali, too neerupa ti ong'ata.

¹⁹“Eetuo ilaiguanak, neitayu olarrabal; nearare ilaiguanak le Kanaan, te Taanak, te mbata oo nkariak e Megido; neitu ninche etum iyarunot e nkosholai.

²⁰Ore te shumata keper etarate ilakir, ore epuoito ninche nearare Sisera.

²¹Ore ilo keju le Kishon onang'ari neya ninche, ina are naisarrisar, o lkeju le Kishon. Lo tau lai, shomo dukuya te ngolon.

²²“Neitayu oltoilo le ndarata nkejek oo mbartan, eng'orori, aang'orori mbartan o larrabal.

²³“Tediaa Meros, neijia ejo olmalaika lo Laitoriani, tediaa te nduaran lelo oomanya ninye, amu eitu ninche epuonu aaretu Olaitoriani, aapuonu aaretu Olaitoriani earare lelo magil.

²⁴“Kemayiana Yael aisul too nkituaak, ina kitok e Heber loo Lkeni, kemayiana aisul tiatua nena kituaak naamanya lng'oborri.

²⁵Eikilikuanua ninye enkare neisho ninye kule, eyaka ninye kule naaoto te mbakuli e nkitoo.

²⁶Etipika ninye enkaina enye encheitoi o lng'obor. Ore te enkaina enye e tatene neibung enyuntu o laisiaayiani, neosh ninye Sisera, nedany endukuya enye, neud eseder enye.

²⁷Eirruge ninye nebatata, neirrag ninye too nkejek e Yael; too nkejek enyena eirruge neirrag, ore ine neirrugore neirrag etua.

²⁸“Te lusie ninye eturumishe, neishir ng'otonye e Sisera erumisho te lusie. ‘Kainyoo pee eimutie engarri enye oo mbartan eitu elotu? Kainyoo pee eimutie oltoilo loo nkejek oo ngarrin enyena oo mbartan?’

²⁹Ore nena kituaak enyena ng'eni newaliki, A'a, etawalikia ninye kewan,

³⁰‘Aimetumito neorita nena naataarutua, neya ake oltung'ani entito nabo aashu are. Ore te Sisera naa inkilani oomuain kumok, inkilani naaikodo, mpukunot are oomuain naaikodo te murt ai anaa iyarunot?’

³¹“Meidaai aaiko neijia ilmang'ati linono Olaitoriani! Kake ore ilchoreta nchoo eilepu anaa enkolong eilepu te ngolon enye.” Netum apa enkop enkiyeng'iyeng ilarin artam.