Read MAASAI REVISED PROTESTANT Ilarishak 7 Bible Online

Ilarishak 7 - MAASAI REVISED PROTESTANT bible

Ilarishak 7

¹Neitoki Gideon (oji sii Yerubaal) o lelo tung'ana pooki apa ootii te nebo ninye aadumunye tadekenya nepuo aaitayu ilng'oborri te mbata enchorro e Harod; netii apa ilng'oborri le Midian moikuape enye, embata oldoinyo le More, tiatua oerata.

²Nejoki Olaitoriani Gideon, “Eikumok kulo tung'ana ootii te nebo iyie te nanu, te naishoru ile Midian apik atua inkaik enye, mewuasayu ake Israel tialo nanu, ejo, ‘Enkaina ai makewan naatokordua nanu.

³Ore naa taata mbalunye too nkiyiaa oo ltung'ana, tejo, ore pooki ng'ae otureishe neikirikira, nchoo ninye eshuko alo ang.’” Netem Gideon ninche, neshuko iltung'ana nkalifuni tikitam oaare, neleku iltung'ana inkalifuni tomon.

⁴Nejoki Olaitoriani Gideon, “Eton aa kumok kulo tung'ana oleng; toriko ninche metadoi aapuo enkare pee atem nanu ninche teine. Ore olaajoki nanu, ‘Kelo ele tung'ani te nebo iyie,’ nelo te nebo iyie, ore oloba anaa olaajoki, ‘Melo ele tung'ani te nebo iyie’, melo ninye.”

⁵Nerik ninye iltung'ana enkare; nejoki Olaitoriani Gideon, “Ore pooki oilab enkare to lng'ejep lenye, anaa enailab oldia, taaraki ninye enkalo nabo, neijia ake sii nkuna ilo ogil kung aok enkare.”

⁶Ore esiana e lelo ooilab enkare, epik nkaik enye nkutukie enye naa iltung'ana iip uni; kake ore ilkulikae tung'ana pooki negil kung aaok enkare.

⁷Neitoki Olaitoriani ajoki Gideon, “Ore te lelo tung'ana iip uni ooilab enkare naa kakordu nanu intae napik iltung'ana le Midian atua inkaik inyi; naa nchoo lelo kulikae tung'ana meshomo pooki tung'ani enkang enye.”

⁸Neya ninye iltooi le lelo tung'ana o sekekuani too nkaik enye, neisho ninye lelo kulikae pooki le Israel meshomo ake oltung'ani olng'obor lenye, kake eiboo lelo tung'ana apa iip uni; netii apa ilng'oborri loo ltung'ana le Midian abori ninye to erata.

⁹Ore apa ina kewarie nejoki Olaitoriani Gideon, “Tudumunye shomo tadoi taara enkang oo lng'oborri, amu aishorua nanu apik enkaina ino.

¹⁰Kake ti niure iyie ashomo, tadoi shomo ina ang oo lng'oborri te nebo Pura, osinka lino;

¹¹amu ilo iyie aning enejo ninche; ore te siadi ina nikigolu oshoke pee ilo arasaki lelo ng'oborri.” Nedoyio ninye alo te nebo Pura, ilo sinka lenye, nepuo enetii iltung'ana oobayie ooata imasaa o larrabal le lelo ng'oborri.

¹²Ore lelo tung'ana le Midian o le Maleki o ltung'ana pooki lo loo saen neirrag to erata eba anaa olmaati te nkumoi; ore ntamesin enye nemeikenayu, eba anaa osinyai le nkiyopata e naiposha te nkumoi.

¹³Ore ake pee elotu Gideon, nedol etii oltung'ani oinosaki ole ncholiek enye enkidetidet; nejoki, “Ng'ura aidetidetua nanu emukate natadoikio atua enkang oo lng'oborri oo le Midian, nelotu olng'obor obo, neosh neibelekeny airragie ti oriong, neaku te nkop eirrag ilo ng'obor.”

¹⁴Newaliki ilo oboitare ajoki, “Mme likae ele leme olalem le Gideon olayioni le Yoash, oltung'ani le Israel; atua enkaina enye etipika Enkai Midian o lorora lenye pooki.”

¹⁵Ore ake pee ening Gideon elimunoto e ina kidetidet o empukunoto enye, neserem; neshuko alo ilng'oborri le Israel, nejo, “Entudumunye, amu eishorua Olaitoriani ilo orora le Midian apik atua enkaina inyi.”

¹⁶Neor ninye lelo tung'ana iip uni aitaa ilturrurri okuni, nepik intarumpetani inkaik enye pooki o ltooi lemetii enkare, nepik ilkilang'ilang'eta tiatua nena tooi.

¹⁷Nejoki ninye ninche, “Eng'uraki nanu, niasiasa enaas; te nalotu nanu auluo e nkang oo lng'oborri entaas anaa enaas nanu.

¹⁸Te naosh nanu esekekua, nanu o lelo pooki ootii te nebo nanu, entoosh sii intae intarumpetani te pooki shoto e nkang oo lng'oborri, nibuakuku aajo, ‘Te nkaraki Olaitoriani o te nkaraki Gideon.’ ”

¹⁹Nelotu Gideon o lelo tung'ana iip apa ootii te nebo ninye auluo e nkang oo lng'oborri te mpolos e nkewarie, ina kata ake pee eibelekenya ilarripok, nekut ninche intarumpetani, nedany lelo tooi apa ootii inkaik enye.

²⁰Neosh lelo turrurri okuni intarumpetani nedany lelo tooi; neibung too nkaik enye e kedianye inkilang'ilang'eta. Ore too nkaik enye e tatene neibung'ita intarumpetani pee eosh; nebuaku ninche aajo, “Olalem lo Laitoriani o Gideon!”

²¹Neitashe ninche oltung'ani ake te wueji enye emanita ina ang oo lng'oborri, nekuet ina jore pooki, neyietu aaishir, neisik.

²²Ore ake pee eosh nena tarumpetani iip uni neiuloki Olaitoriani olalem ake lo ltung'ani olikae tung'ani o enjore pooki; neisik ina jore o meshomo Betshita enkalo e Serera, o metabaiki olpolosie le Abel-mehola, te mbata e Tabat.

²³Neipotuni iltung'ana le Israel te Naftali o te Asheri o te Manase pooki metusujai aamir iltung'ana le Midian.

²⁴Neirriwaki Gideon ilkiliku aibulunye ina kop pooki oo ldoinyo e Efraim, ejo, “Entadou wootu mataarare iltung'ana le Midian, nimbung'ubung'u nena ariak ebaiki Betbara o Yordan.” Neipotuni iltung'ana pooki le Efraim, neibung ninche nkariak ebaiki Betbara, o Yordan sii.

²⁵Neya ninche lelo kituaak pokira oaare le Midian, Oreb o Seeb; near ninche Oreb metua te ndapidapoi e Oreb, ore Seeb near metua te nkironyet oo sabibu e Seeb, ina kata esujita ninche iltung'ana le Midian; neyau ninche ilukuny e Oreb o Seeb enetii Gideon te lido kekun le Yordan.