Read MAASAI REVISED PROTESTANT Ilarishak 8 Bible Online

Ilarishak 8 - MAASAI REVISED PROTESTANT bible

Ilarishak 8

¹Nejoki iltung'ana le Efraim Gideon, “Kainyoo ena nintaasa iyie iyiook, eitu impot iyiook te nilo aarare Midian?” Neilepilepaki ninye oleng.

²Nejoki Gideon ninche, “Kaa nanu ataasa te naaitanyaanyukieki intae? Aimesidan ilekunot oo sabibu le Efraim alang enkikesare e Abisi?

³Eishorua Enkai apik atua inkaik inyi lelo kituaak le Midian, Oreb o Seeb: kaa nanu aaidim ataasa te naaitanyaanyukieki intae?” Neyagaa taa engoro enye apa natagorokinote apa ninye, ina kata pee ejo neijia.

⁴Nelotu Gideon Yordan nelang alo lido kekun le Yordan, ninye o lelo tung'ana iip uni apa ootii te nebo ninye, enaurate nesujita ake olmang'atinta.

⁵Neaku etiaaka apa ninye lelo tung'ana le Sukot, “Atoomono intae, enchoo sii ake endaa kulo tung'ana laasujita nanu, amu etaa keiterre, nasujita nanu Seba o Salmuna, lelo aiguanak le Midian.”

⁶Nejo lelo kituaak le Sukot, “Keidipa Seba o Salmuna aatijing atua enkaina ino metaa eji eikincho iyiook endaa enjore ino?”

⁷Nejo Gideon, “Ore te nkaraki ena, ore kenya te nelo nepik Olaitoriani Seba o Salmuna enkaina ai nayiet nanu iseseni linyi too ikiku lo lpurkel o te ntamejoi.”

⁸Nedumunye teine nelo Penuel, neirorie iltung'ana teine teina oitoi; newaliki iltung'ana le Penuel ninye anaa apa enatawalikitia iltung'ana le Sukot.

⁹Nejoki ninye iltung'ana le Penuel, “Ore te naitoki ashukunye te seriani nagil ele talet asulu.”

¹⁰Netii apa Seba o Salmuna Karkor te nebo enjore enye, iltung'ana oobaya nkalifuni tomon o imiet, lelo pooki apa ootelekuaki te njore pooki oo ltung'ana lo loosaen; amu etabatatate apa iltung'ana nkalifuni iip o tikitam ooata lalema.

¹¹Neilep apa Gideon aim enkoitoi naim intamesin to loosaen le Neba o Yogbeha nerasaki ina jore; amu merripo apa ina jore.

¹²Neisik Seba o Salmuna; nemir ninye ninche neibung lelo aiguanak pokira oaare le Midian, Seba o Salmuna, nepik ninye ina jore pooki olkirutoto.

¹³Neitoki Gideon olayioni le Yoash ashukunye to larrabal aimu embata e nkilepunoto e Heresi.

¹⁴Neibung olbarnoti le Sukot, neikilikuanishore ninye, neigeroki ilo barnoti ninye ilkituaak loo lpayiani le Sukot, iltung'ana ntomoni naapishana o opishana.

¹⁵Nelotu Gideon enetii iltung'ana le Sukot, nejoki, “Eng'ura Seba o Salmuna, laa ninche apa kitusurdaanyie nanu ijojo, ‘Keidipa Seba o Salmuna, aatijing atua enkaina ino pee kitum aaishoo endaa lelo tung'ana linono ooiterre?’ ”

¹⁶Neya Gideon ilpayiani le ina anasa neya ilkiku lo lpurkel o entamejoi neiteng'enie ninche iltung'ana le Sukot.

¹⁷Negil ninye asulu oltalet le Penuel, nesesekuan iltung'ana le ina anasa.

¹⁸Neitoki ninye ajoki Seba o Salmuna, “Koree apa iltung'ana litasesekuana te Tabor?” Newal ninche aajo, “Ore anaa eninkununo iyie, neijia apa eikununo ninche, oltung'ani ake te ninche; kenyaanyukie apa ninche ilayiok lo laiguanani.”

¹⁹Nejo Gideon, “Ilalashara laainei apa ninche, ilayiok le yieyio; ore anaa enaishu Olaitoriani, tenaa apa eitajeutuo ninche aaitopok, anaata nanu masesekuan intae.”

²⁰Nejoki ninye Yeter olkikau lenye, “Tudumunye tasesekuana ninche.” Kake eitu apa eshutu ilo barnoti olalem lenye; amu eturia, te nkaraki apa neton aa olbarnoti.

²¹Neitoki Seba o Salmuna aajo, “Tudumunye makewan tadoiki iyiook: amu ore anaa enatiu oltung'ani, naa neijia etiu engolon enye.” Nedumunye Gideon nesesekuan Seba o Salmuna, neya nena masaa apa naatii imurto o ntamesin enye.

²²Neitoki iltung'ana le Israel aajoki Gideon, “Ntoria iyiook, iyie o layioni o layioni lo layioni lino, amu itokordua iyiook aitayu te nkaina e Midian.”

²³Nejoki Gideon ninche, “Maitore nanu intae, nemeitore intae olayioni lai; Olaitoriani ninye oitore intae.”

²⁴Neitoki Gideon ajoki ninche, “Enchooki nanu matoomono intae entoki nabo; enchooki nanu pooki ng'ae te intae ilgiso loo nkiyiaa apa liwaita le lelo tung'ana litaara.” (Amu eeta apa ninche ilgiso loo nkiyaa le saabu, te nkaraki naa ile Ishmael.)

²⁵Newal ninche aajo, “Eikinchoru iyiook te nyorrata.” Neisalaash ninche olkila, nenang'aki ine pooki tung'ani lelo giso loo nkiyiaa apa ooyaua.

²⁶Ore enkiroishi e lelo giso loo nkiyiaa le saabu apa ootoomonuo naa shekeli e saabu enkalifu nabo o iip naapishana, te nebo imasaa o nkilani sinteti apa naaishopito lelo kituaak le Midian o lkataarri apa ootii imurto oo ntamesin enye.

²⁷Neitayunye Gideon enkila dorrop ina saabu nepik ninye enkanasa enye makewan, Ofra; neloloito Israel pooki te ninye, neaku orreshet te Gideon o to lmarei lenye.

²⁸Neaku etimira apa iltung'ana le Israel Midian, neitu aekata eigil aairish ninche. Netum apa enkop enkiyeng'iyeng ilarin artam too nkolong'i e Gideon.

²⁹Nelo apa Yerubaal olayioni le Yoash aton te nkaji enye.

³⁰Neeta apa Gideon ilayiok ntomoni naapishana, inot lenyena, amu keeta apa nkituaak kumok.

³¹Ore apa enkapiani enye natii Shekem neiu sii ninye olayioni, neji enkarna enye Abimelek.

³²Neye apa Gideon olayioni le Yoash etaa moruo oleng, nenukari ninye te nkurare e Yoash papaai lenye, te Ofra oo Labiesi.

³³Erisio ake etua Gideon, neibelekenya iltung'ana le Israel aaloloito aasujaa inkaitin e Baal, neitaa Baal-berit enkai enye.

³⁴Neitu eitoki iltung'ana le Israel aadamu Olaitoriani Enkai enye, laa ninye apa otokordua ninche aitayu te nkaina oo lmang'ati lenye pooki te pooki shoto.

³⁵Neitu ninche eitaas isidain olmarei le Gideon (oji sii Yerubaal) te nkaraki nena pooki sidain naaitaasa ninye Israel.