Read MAASAI REVISED PROTESTANT Ilarishak 9 Bible Online

Ilarishak 9 - MAASAI REVISED PROTESTANT bible

Ilarishak 9

¹Nelo apa Abimelek olayioni le Gideon Shekem, enetii ilalashera ng'otonye nejoki ninche o lgilata pooki lo lmarei le ng'otonye,

²“Entejo too nkiyiaa e kulo oomanya Shekem, ‘Kaa naikash te intae, te neitore intae ilayiok pokira ntomoni naapishana anaa te neitore intae obo?’ Entadamu sii aajo kara nanu oloito linyi o erubata inyi.”

³Neiro ilalashera ng'otonye kulo rorei pooki te rishata enye too inkiyiaa oo ltung'ana pooki te Shekem: neng'amaa iltauja lenye pee esujaa Abimelek, amu etejo ninche, “Olalashe lang ninye.”

⁴Neisho ninche ninye mpisai e nkosholai ntomoni naapishana naaing'uaa enkaji e Baalberit, naa ninche eigerie Abimelek iltung'ana le pesho arruok, apa ootusuja ninye.

⁵Nelo ninye enkaji e papaai lenye te Ofra nesesekuan ilalashera lenyena, lelo ayiok le Yerubaal, pokira ntomoni naapishana, te nchumata osoit obo; kake etelekuaki apa Yotam olayioni oti le Yerubaal, amu eisudoyie kewan.

⁶Neiturrurrunye lelo oomanya Shekem te nebo, o Bet-milo pooki, nepuo ninche neitaa Abimelek olaiguanani, te mbata o lchani onyaanyukie olng'aboli le ng'ape te Shekem.

⁷Ore ake pee elikini Yotam, nelo ninye aitashe te nchumata o ldoinyo le Gerisim, neyietu aishir nejoki ninche, “Entoning'oki nanu lo tung'ana le Shekem, pee etum Enkai atoning'o intae.

⁸Eshomo apa ilkeek aagelaki ate olaiguanani, nejoki ninche oloirien, ‘Ntoria iyiook.’

⁹Nejoki ilo oirien ninche, ‘Kaing'uaa nanu eilata ai naa ninye eyanyitieki inkaitin o ltung'ana, nalo alimana tiatua ilkeek?’

¹⁰Nejoki lelo keek olng'aboli, ‘Wou iyie ntoria iyiook.’

¹¹Nejoki ilo ng'aboli ninche, ‘Kalo nanu aing'uaa emeloni ai o lng'anayioi lai sidai nalo alimana too lkeek?’

¹²Nejoki lelo keek osabibu, ‘Wou iyie ntoria iyiook.’

¹³Nejoki ilo sabibu ninche,

¹⁴‘Kalo nanu aing'uaa enaisho ai oo sabibu naa ninye naitiship inkaitin o ltung'ana nalo alimana too lkeek?’ Nejoki ilkeek pooki olchani onyaanyukie olayakuji, ‘Wou iyie ntoria iyiook.’

¹⁵Nejoki ilo shani onyaanyukie olayakuji lelo keek, ‘Tinikibukokiki nanu eilata aaitaa olaiguanani maitoria intae, wootu naa entaseriana to loip lai; naa te neme neijia, nchoo meipang'u enkima te ilo shani loo lkiku nemut lelo tarakua le Lebanon.’

¹⁶“Ore naa taata, tenaa eitaasa apa intae te nkirukoto sidai o te nkanyit ina kata apa pee intaa intae Abimelek olaiguanani, naa tenintaasa apa intae esidai Gideon o enkaji enye, nintaasa intae ninye anaa enaishiaakino inkiasin enyena

¹⁷amu etarishe papa te nkaraki intae, nepik enkishui enye batisho, nekordu intae aitung'uaa enkaina e Midian;

¹⁸nitudumakinote intae enkaji e papa aarare ena olong, nitasesekuana intae ilayiok lenyena, iltung'ana ntomoni naapishana te nchumata osoit obo, nintaa Abimelek olayioni le nkapiani, olaiguanani oitore lelo oomanya Shekem, te nkaraki naa olalashe linyi.

¹⁹Tenaa eitaasa apa te nkirukoto sidai o te nkanyit o Yerubaal o enkaji enye ena olong, enting'idakinoto naa Abimelek, naa nchoo sii ninye eng'idakino intae,

²⁰kake te neme neijia, nchoo enkima epuku te Abimelek, nemut lelo oomanya Shekem o Bet-milo nemut Abimelek.”

²¹Nekuet Yotam aisik, nelo Beer-sheba nebik teine, te nkaraki naure Abimelek olalashe lenye.

²²Neitore Abimelek Israel ilarin okuni.

²³Neirriu Enkai oltau torrono erishata e Abimelek o lelo tung'ana le Shekem; ore lelo tung'ana le Shekem neitaas Abimelek intorrok;

²⁴nchere ore ina torroni apa naitaasaki lelo ayiok pokira ntomoni naapishana le Yerubaal naa kelotu osarge lenye shumata Abimelek olalashe lenye, laa ninye apa otasesekuana ninche, o shumata lelo tung'ana le Shekem laa ninche apa ooitagolo inkaik enyena metesesekuana ilalashera lenyena.

²⁵Nepik lelo tung'ana le Shekem iltung'ana olnukata pee ear Abimelek te nchumata o ldoinyo, neoru ninche ntokitin lelo pooki apa ootogiroitie ninche te nkoitoi, nelikini Abimelek.

²⁶Nelo apa Gaal olayioni le Ebed Shekem te nebo ilalashera lenyena, neisilig apa iltung'ana le Shekem ninye.

²⁷Neipang ninche aapuo nkurman, nesotu ninche isabibu te nena kurman enye oo sabibu, neirony ninche, nenya osirua, nepuo atua enkaji e nkai enye, nedaa neokisho nedek Abimelek.

²⁸Nejo Gaal olayioni le Ebed, “Kaing'ae Abimelek naa eikira iyiook nyoo ile Shekem, eji pee kisiaai ninye? Keitu eisiaai olayioni le Yerubaal o Sebul, olkitok lenye, iltung'ana le Hamori, menye le Shekem? Kainyoo naa pee kisiaai iyiook ninye?

²⁹Tenaa naaji kaabori enkaina ai etii ele orere anaata aiwuang'ie Abimelek. Anaata ajoki Abimelek, ‘Toponai enjore ino, nimpang'u alotu.’ ”

³⁰Ore ake pee ening Sebul ilo apa laa ninye oitore enkanasa irorei le Gaal olayioni le Ebed, neyupuyup engoro enye.

³¹Neirriwaa ninye ilkiliku enetii Abimelek te Aruma, ejo, “Ng'ura, ore Gaal olayioni le Ebed o lalashera lenyena eetuo Shekem, neing'oling'ola ninche enkanasa pee kiarare iyie.

³²Ore naa taata, shomo kewarie, iyie o lelo tung'ana ootii te nebo iyie nirragirraga aanyu ti ong'ata.

³³Ore te nkakenya, ore ake pee eng'oru enkolong iltiil, nidumunyenye aayooki nikuetikiki ina anasa. Ore ake pee kimpang'aki ninye o lelo tung'ana ootii te nebo ninye aapuonu aarare, entaasa ninche anaa enaishiaakino.”

³⁴Nedumunye Abimelek o lelo tung'ana apa ootii te nebo ninye kewarie, neirrag aanyisho pee earare Shekem too lturrurri oong'uan.

³⁵Neipang Gaal olayioni le Ebed alo aitashe te nejing'ieki kishomi e nkanasa; nedumunye Abimelek o lelo tung'ana apa ootii te nebo ninye to lnukata.

³⁶Ore ake pee edol Gaal lelo tung'ana nejoki Sebul, “Ng'ura, iltung'ana edou aapuonu too nchumat oo ldoinyo!” Nejoki Sebul ninye, “Iloipi loo ldoinyo idol, nijo iltung'ana.”

³⁷Neitoki Gaal airo nejo, “Ng'ura, iltung'ana edou aaing'uaa empolos e nkop, ore oltim obo nelotu aimu enkalo o lchani loo laitumusumusok onyaanyukie olng'aboli.”

³⁸Neitoki Sebul ajoki ninye, “Koree naa taata enkutuk ino, iyie apa otejo ‘Kainyoo ninye Abimelek eji metaa eikisiaai ninye?’ Aime kulo tung'ana apa itemena? Mpang'a taata shomo taarare ninche.”

³⁹Neipang Gaal alo ajing dukuya iltung'ana le Shekem nearare Abimelek.

⁴⁰Nemir Abimelek ninye, neisik ninye te dukuya Abimelek, nebatata ilkumok ootipikaki ilbaa, o metabaiki enejing'ieki kishomi.

⁴¹Nebik Abimelek te Aruma; nearaa Sebul Gaal o lalashera lenyena, pee meitoki ninche aatoni te Shekem.

⁴²Ore pee ekenyu neipang lelo tung'ana aapuo ong'ata. Nelikini Abimelek.

⁴³Nedung ninye iltung'ana lenyena metaa ilturrurri okuni, neirrag aanyisho ti ong'ata. Neing'orisho ninye nedol iltung'ana eipang'u aapuku te nkanasa, nedumunye ninye, aar ninche nesesekuan ninche.

⁴⁴Neisarrisar Abimelek o ilo tim apa otii te nebo ninye nepuo aaitashe te nejing'ieki kishomi e nkanasa, ina kata eisarisaraki lelo timito pokira oaare o lelo tung'ana pooki apa ootii ong'ata nesesekuan ninche.

⁴⁵Nearare Abimelek ina anasa ina olong pooki, neya ninye ina anasa near metuata lelo tung'ana apa ootii atua, nemut ina anasa nebukoki enkop emunyan.

⁴⁶Ore ake pee ening lelo tung'ana pooki apa ootii oltalet le Shekem ina, nejing ninche osempewuet le nkaji e Elberit.

⁴⁷Netolikioki apa Abimelek nchere eiturrurrote iltung'ana pooki to ltalet le Shekem te nebo.

⁴⁸Neilep Abimelek alo oldoinyo le Salmon, ninye o lelo tung'ana pooki apa ootii te nebo ninye. Nedumu Abimelek entolu te nkaina enye, nedung'u olng'osila lo lchani, nedumu aiteleiki oloililai lenye. Nejoki lelo tung'ana apa ootii te nebo ninye, “Ore ina nikitoduaa nanu aasita, esarisara entaas, anaa enataasa nanu.”

⁴⁹Neaku etudung'uo pooki ng'ae te lelo tung'ana olng'osila lenye nesuj Abimelek neirishakini ilo sempewuet, nepik ilo sempewuet enkima te shumata ninche, neaku etuata apa sii ninche iltung'ana pooki to ltalet le Shekem, iltung'ana oobaya enkalifu ilewa o nkituaak.

⁵⁰Neitoki Abimelek alo Tebes, nelo aitayu ilng'oborri aarare Tebes, neya ninye.

⁵¹Kake etii apa oltalet ogol atua ina anasa, ore iltung'ana pooki le nkanasa neisik aapuo ine, ilewa pooki o nkituaak, neikenoo ate tiatua ine; nepuo ninche enchumata o ltalet.

⁵²Nelotu Abimelek ilo talet, nearare ninye, nenyiku alotu enkutuk e ilo talet pee epejoo ninye te nkima.

⁵³Nenang'u enkitok nabo nenang'aki osoit le shumata oituutishoreki endukuya e Abimelek, nedany elukunya enye.

⁵⁴Neipotu nabo kata ilo barnoti apa onapaki ruparen, nejoki ninye, “Tushutu olalem lino taaraki nanu matua, mejo ake ilewa tialo nanu, ‘Enkitok natara ninye metua.’ ” Nerem ilo barnoti aipang'ie olalem, neye ninye.

⁵⁵Ore ake pee edol iltung'ana le Israel nchere etua Abimelek, nepuo ninche oltung'ani ake enkang enye.

⁵⁶Neijia eikuna Olaitoriani Enkai aitalaku entorroni e Abimelek apa nataasa tialo papaai lenye pee ear ilalashera lenyena pokira ntomoni naapishana.

⁵⁷Neisho sii Enkai entorroni pooki oo ltung'ana le Shekem metadoiki nchumat oo lukuny enye, nelotu shumata ninche ilo deket apa le Yotam olayioni le Yerubaal.