Read MAASAI REVISED PROTESTANT Embolunoto 1 Bible Online

Embolunoto 1 - MAASAI REVISED PROTESTANT bible

Embolunoto 1

¹Embolunoto e Yesu Kristo, naishoo Enkai ninye meitoduaa isinkan lenyena, imbaa nemeeta nchere pee meesayu aasioki. Neisho metayiolouni te nkirriwakinoto nairriwaka olmalaika osinka lenye Yohana,

²oishakenoko ororei le Nkai o shakenisho e Yesu Kristo, ebaiki nena pooki naatoduaa.

³Emayiana ilo oisum metoning'i irorei le naibon, nemayiana lelo ooning, neibung nena naaigero teine, amu etataana enkata.

⁴Nanu Yohana oigeroki isirito naapishana e Asia: Enoto empiris o eseriani eing'uaa ilo otii taata, netii apa, naa ninye kenya olotu, neing'uaa sii inkiyang'eta naapishana naatii dukuya olorika lenye le nkitoo,

⁵neing'uaa Yesu Kristo olchakeni osipa, olaa ninye olkikau loo lootuata, naa Olaitoriani loo laiguanak ootii enkop. Metaa ene ilo otonyorra iyiook nelaku iyiook too ng'ok ang to sarge lenye,

⁶neitaa iyiook enkitoria oo lapolosak le Enkai Menye lenye, metaa enenye enkisisa o enkitoo ntarasi o ntarasi. Eesai.

⁷Ng'ura elotu ninye too nkatampo, naa kedol pooki ong'u ninye, lelo pooki ootaremo ninye. Ore loshon pooki le nkop, neyietu neishir te nkaraki ninye. Neijia taa etiu. Eesai.

⁸“Kara nanu Alfa o Omega,” Olaitoriani Enkai ojo, Otii taata, netii apa, naa ninye olotu, Olaidimani.

⁹Nanu Yohana olalashe linyi ong'arie intae tiatua Yesu, osina o enkitoo o eng'iriata o enkisulata, atii apa olemankale[1] le naiposha oji Patmos te nkaraki ororei le Nkai o shakenisho e Yesu.

¹⁰Naainepu Enkiyang'et te nkolong o Laitoriani, naning oltoilo kitok te siadi nanu laaijo ole ntarumpeta,

¹¹ejo, “Ingero nena nidolita tiatua embuku nirriwaki nena sirito pokira naapishana, ene Efeso, o Smirna o Pergamam o Tiatira o Sardis o ene Filadelfia o Laodikea.”

¹²Naibelekenya ajo pee adol ilo toilo laairorie, ore ake pee aibelekenya nadol ilkilang'ilang'eta oopishana le saabu,

¹³naa ore te mpolos e lelo kilang'ilang'eta netii ilo obo laaijo Enkerai e Tung'ani, eishopokoki olkila oodo neenita enkeen e saabu to lgoo lenye.

¹⁴Ore endukuya enye o lpapit lenyena naa keibor anaa lpapit loo ntare, neibor anaa enturoto, netiu nkonyek enyena anaa olng'ejep le nkima,

¹⁵netiu inkejek enyena anaa isuyan oosika te nkima, netiu oltoilo lenye anaa iltoiloishi loo nkariak kumok;

¹⁶neeta te nkaina enye e tatene ilakir oopishana, nepuku te nkutuk enye olalem opi nkaloli pokira are, netiu enkomom enye anaa enkolong te nedalu te ngolon enye pooki.

¹⁷Ore peyie adol ninye nabatatakino nkejek enyena natiu anaa oltung'ani otua. Kake aaiteleikia enkaina enye e tatene, nejo, “Miureishoyu, kara nanu ole nkiterunoto o le nkiting'oto;

¹⁸nara ilo oishu, atua apa, naa ng'ura ajo kaishu taata o ntarasi, naa nanu oata imboleta e keeya o ewueji e nkima.

¹⁹Naa ngero taata nena nidol, enatii o enayooki aaku.

²⁰Ore enkisudoroto e lelo akir oopishana litoduaa te nkaina ai e tatene, o lelo kilang'ilang'eta oopishana le saabu naa nji etiu: ore ilakir oopishana naa ilmalaika loo sirito naapishana, ore ilkilang'ilang'eta naa sirito, pokira naapishana.