Read MAASAI REVISED PROTESTANT Embolunoto 13 Bible Online

Embolunoto 13 - MAASAI REVISED PROTESTANT bible

Embolunoto 13

¹Nadol nanu eng'ues eilepu aing'uaa atua enaiposha naata imowuarak tomon o lukuny naapishana neishopokino nkishiliaa tomon e nkitoo nena mowuarak enyena. Netii enkarna e morore nena lukuny enyena.

²Ore ina ng'ues natoduaa neikununo anaa olowuaru keri, netiu inkejek enyena anaa ino lng'arurumi, netiu enkutuk enye anaa eno lng'atuny. Neisho ilo asurai ina ng'ues engolon enye o lorika lenye le nkitoo, o enkidimata sapuk.

³Ore nabo oo lukuny enyena, naa ijo keeta olbae le keeya. Ore ilo bae lenye le keeya neishiwuo, nesuj enkop pooki ina ng'ues eing'asia.

⁴Neserem iltung'ana ilo asurai, amu eishoo ninye enkidimata enye ina ng'ues, neserem ninche ina ng'ues ejo “Ae ng'ae otiu anaa ina ng'ues, naa ae ng'ae oidima airisha?”

⁵Neishori ina ng'ues enkutuk nairorie imbaa naarupie kewan o roreii oomor Enkai, neishori meitoreisho too lapaitin artam o are.

⁶Nebol enkutuk enye emorisho, nemor Enkai, amor enkarna enye o emanyisho enye. Aa nchere lelo pooki oomanya keper.

⁷Neishori sii meitayunye olarrabal isinyat, nemir ninche. Neishori ninye enkitoria naitoreyie iloshon o ltung'ana, o lng'ejepa, o loreren.

⁸Ore lelo pooki ootii enkop neserem ninye, pooki ng'ae apa leitu eigeri enkarna enye apa eton eitu eitamanyuni enkop, ti atua embuku e mpuaan e ilo Kuoo le Ker apa otaraki.

⁹Te neetae oloata enkiok, nchoo ening.

¹⁰Ore ake pooki ng'ae oarari, nelo eyararoto; ore ake pooki ng'ae oarisho to lalem meeta nchere meari sii ninye to lalem. Ene taa etii enkipototo te nkaraki eng'iriata o enkirukoto oo sinyat.

¹¹Naitoki adol ae ng'ues natudumunye te nkop neeta mowuarak are anaa olkuoo le ker, neiro ninye anaa ilo asurai.

¹²Neitoreishore ninye enkidimata pooki e idia ng'ues e dukuya, teine netii ninye, nearaki enkop o pooki oomanya enkop meteserema ina ng'ues e dukuya, apa naishiwuo olbae lenye le keeya.

¹³Neas ilmonek sapuki o metaa ninye keitadou enkima eing'uaa keper meeu enkop edolita iltung'ana.

¹⁴Ore too lmonek ooishooki metaasa teine netii ina ng'ues neitapong'oo lelo ootii enkop. Neitanap lelo oomanya enkop meitobira ninche enkitanyaanyukoto e ina ng'ues naata endung'oto o lalem neton ake eishu.

¹⁵Neishori ninye meishoo enkiyang'et ina kitanyaanyukoto e ina ng'ues, pee etum ninye ina kitanyaanyukoto ataa keiro. Nejo metaari metuata lelo pooki lemeserem ina kitanyaanyukoto e ina ng'ues.

¹⁶Neisho sii pooki ng'ae, looti o lkituaak, ilkarsisi o laisinak, irrindiki o leme rrindiki, metipiki olmishire enkaina e tatene aashu enkomom,

¹⁷pee meitoki hoo obo ainyiang'isho aashu emirisho, meteleku ake te neeta ilo mishire, aa taa enkarna e ina ng'ues, aashu esiana e ina arna enye.

¹⁸Keyieu taa ena eng'eno nagut, nchoo ilo oata ening'unoto eikenisho atum esiana e ina ng'ues. Amu esiana e tung'ani. Ore esiana enye naa iip ile o ntomoni ile o ile.