Read MAASAI REVISED PROTESTANT Embolunoto 15 Bible Online

Embolunoto 15 - MAASAI REVISED PROTESTANT bible

Embolunoto 15

¹Naitoki adol entoki sapuk e nking'asia te shumata, kitok naa ene nking'asia, ilmalaika oopishana ooata ilmeita oopishana laa ninche oobayie, laa te ninche etimitunye engoro e Nkai.

²Naitoki adol entoki naikununo anaa enaiposha e kiook nashulare enkima. Ore lelo ootimira ina ng'ues o enkitanyaanyukoto enye o esiana e nkarna enye, neitashe te mbata e ina aiposha e kiook, neibung'ita nkinantani e Nkai too nkaik enye.

³Nerany osinkolio le Musa ilo sinka le Nkai osinkolio lo Lkuoo le ker, aajo, “Eikituaak naa ine nking'asia nkiaasin inono, iyie Olaitoriani Enkai Magilani, keitoriori nesipa inkoitoi inono, Olaiguanani loo lporori.

⁴Ae ng'ae lemeureisho neisis enkarna ino, Olaitoriani. Amu iyie ake openy osinyati. Eikipuonu nkuapi pooki aserem iyie, amu ore inkiguanat inono neidipaki aaibalunye.”

⁵Ore te siadi ena naing'orisho, ore enkaji e Nkai o lng'obor le shakenisho ti atua keper neboli.

⁶Neipang'u tiatua ina aji e Nkai lelo malaika oopishana ooata ilmeita oopishana, eishopito nkilani nemeiduruk naawang oleng neenita too lgooitie lenye nkeenta e saabu.

⁷Ore nabo e nena ng'uesi e ong'uan naaishu, neisho lelo malaika oopishana mbakulini naapishana e saabu naabore engoro e Nkai, naishu ntarasi o ntarasi.

⁸Neigany enkaji e Nkai empuruo eing'uaa enkitoo e Nkai neing'uaa engolon enye. Nemeetae hoo obo oidima atijing'a atua ina aji e Nkai o metaba anaa nelusoo lelo meita oopishana le lelo malaika oopishana.