Read MAASAI REVISED PROTESTANT Embolunoto 19 Bible Online

Embolunoto 19 - MAASAI REVISED PROTESTANT bible

Embolunoto 19

¹Ore te siadi ena naning entoki naaijo oltoilo kitok lo lorora kitok te keper ebuaku aajo, “Haleluya, ene Nkai ang enjeunoto o enkisisa o engolon.

²Amu ore nkiguanat enyena nesipa neitoriori; etudung'oko ninye enkiguana ina mulayoi yioloti apa naitapong'oyie enkop te loloito enye, neitalakua te ninye osarge loo sinkan lenyena.”

³Neitoki ake ninche aaigil aabuaku aajo, “Haleluya eijukujuk empuruo enye ailep alo shumata ntarasi o ntarasi.”

⁴Ore lelo payiani tikitam oong'uan o nena ng'uesi naaishu nebatata neserem Enkai etonita te ilo orika le nkitoo, ejoito, “Eesai Haleluya!”

⁵Nepuku oltoilo oing'uaa olorika le nkitoo obuaku ajo “Esisa Enkai ang intae isinkan lenyena pooki, intae ilooure ninye, ilooti o lkituaak.”

⁶Naitoki aning oltoilo laaijo olo lorora kitok oikununo anaa enkikurrukur oo nkariak kumok netiu sii anaa indarat oo nkikurrukurrot sapuki ebuaku aajo, “Haleluya! Amu Olaitoriani Enkai ang Magilani oitoreisho.

⁷Mating'idata nikiosh olkerempe, nikincho ninye enkitoo, amu etabawua enkiyama o Lkuoo le Ker, netukuso kewan ina nayami.

⁸Neishooki ninye meishopo ilkarash oopuyiapui ooibor newang,” nemetii olduruki. Amu ore lelo karash sidain naa iasat supati e lelo sinyat.

⁹Naajoki ilo malaika, “Ing'ero, ena; emayiana lelo ooitoomonoki to sirua le nkiyama o Lkuoo le Ker.” Naajoki ninye nanu, “Irorei oosipa le Nkai kulo.”

¹⁰Nabatata too nkejek enyena aserem ninye, kake aatiaaka ninye nanu, “Mintoki aiko neijia! Amu kara ake osinka oasisho te nebo iyie o lalashera linono ooibung'ita shakenisho e Yesu. Teserema Enkai!” Amu ore shakenisho e Yesu naa ninye enkiyang'et e naibon.

¹¹Naitoki adol keper etaboloki; nadol embarta naibor, ore ilo okedito ina naa keji, Oloisiligayu naa Asipani, naa too sipat eiguana neitayu olarrabal.

¹²Ore nkonyek enyena neikununo anaa olng'ejep le nkima neeta te lukunya enye nkaradan e nkitoria kumok, neeta enkarna nasirakino nemeyiolo likae tung'ani kake ninye ake oyiolo.

¹³Neishopito olkila oitadoikioki osarge neji enkarna naipotieki Ororei le Nkai.

¹⁴Nesujita ninye njorin e keper naaishopito nkilani sidain e kitani napuyiapui newang, nesujita ninye imbartan naaibor.

¹⁵Nepuku te nkutuk enye olalem opi laa ninye earie inkuapi, neitore ninche te ng'udi e sekenkei. Neituny ninye ewueji neironyieki enaisho e ngoro napi e Nkai Magilani.

¹⁶Ore to lkila lenye o te nkupes enye neeta enkarna naigerokino ajo, Olaiguanani loo laiguanak naa Olaitoriani loo laitoriak.

¹⁷Naitoki adol olmalaika eitashe tiatua enkolong. Nebuaku aipotisho to ltoilo sapuk aipot imotonyi pooki naapuoito te mpolos o loing'ang'e, nejoki, “Wootu enturrurrokinoto osirua kitok le Nkai,

¹⁸pee inyanya nkiri oo ilaiguanak o ilarikok loo njorin o nkiri oo ltung'ana magil, nkiri oo mbartan o noo lookedito ninche o nkiri oo ltung'ana pooki, loolakuno o rrindiki, ndung'ot pokira, ilooti o lkituaak.”

¹⁹Nadol nanu ina ng'ues o lelo aiguanak le nkop te nebo o njorin enye eiturrurrote pee earare ilo okedito ina barta nearare enjore enye.

²⁰Neibung'i ina ng'ues, te nebo ilo oiboni lenye le lejare, otaasa ilmonek te dukuya ninye naa ninche etelejie lelo ootang'amaitie olmishire le ina ng'ues o lelo ooteserema ina kitanyaanyukoto enye. Ore lelo pokira o are, nenang'akini eishu atua ilo balbal le nkima, oyupuyup te nkibiriti.

²¹Ore ilootelekutua neari to lalem le ilo okedito ina barta. Te ilo alem opuku ti tua enkutuk enye; ore imotonyi pooki nenya inkiri enye ometaraposhoto.