Read MAASAI REVISED PROTESTANT Embolunoto 20 Bible Online

Embolunoto 20 - MAASAI REVISED PROTESTANT bible

Embolunoto 20

¹Naitoki adol olmalaika odou aing'uaa keper, eibung'ita te nkaina enye olbolet le ina gumoto nemeeta eneiting'ie o lpisiai kitok.

²Neibung ninye ilo asurai, ilo asurai musana laa ninye Oloirirua naa Sheitani, neen ninye ilarin enkalifu nabo.

³Nenang'aki olmalaika ninye atua ina gumoto, neiken nemishiraa ninye teine pee meitoki ae kata alej iloreren, o metaba anaa neishunye lelo arin enkalifu nabo. Ore pee elusoo ina nemeeta nchere pee melakuni te nkiti rishata.

⁴Naitoki adol ilorikan le nkitoo, ore lelo oogira aatonie ninche naa ninche eishoro endung'okinoto e nkiguana. Naitoki sii adol iltauja le lelo ootudung'oyioki ilukuny enye te nkaraki shakenisho e Yesu o te nkaraki ororei le Nkai, naa lelo leitu eserem ina ng'ues aashu ina kitanyaanyukoto enye, neitu, eng'amu olmishire lenye too lpurai loo nkomomi enye aashu too nkaik enye. Nepiu ninche neitoreisho te nebo Kristo ilarin enkalifu nabo.

⁵Ore lelo kulikae ootuata neitu epiu o metaba anaa neishunye ilarin enkalifu nabo. Ena empiunoto e dukuya.

⁶Emayiana naa sinyati ilo ong'arieki empiunoto e dukuya. Ore te lelo, nemeeta keeya e are engolon. Kake keaku ninche ilapolosak le Nkai o le Kristo naa keitoreisho ninche te nebo ninye ilarin enkalifu nabo.

⁷Ore pee eishunye lelo arin enkalifu nabo, nelakuni Sheitani te jila enye.

⁸Naa kelotu alej inkuapi naatii ilubot pokira ong'uan e nkop, aa taa Gog o Magog, neiturrur ninche te nkaraki olarrabal, neba esiana enye anaa osinyai le naiposha.

⁹Neidondorra ninche aailepaki endapasho e nkop, neman ina ang oo ilng'oborri loo sinyat, o ina anasa kirotet kake etadowuo enkima eing'uaa keper neidaikie ninche.

¹⁰Ore oloirirua laa ninye apa oteleja ninche nenang'akini atua olbalbal le nkima o enkibiriti ine netii ina ng'ues o ilo oiboni le lejare, nepuoi aaitame ninche dama o kewarie intarasi o ntarasi.

¹¹Naitoki adol olorika le nkitoo oibor kitok o ilo otonita. Neilanyisho enkop o keper aaing'uaa ine netii ninye nelaii ewueji neishaa ninche.

¹²Nadol nanu lelo apa ootuata, ilkituaak o looti eitashe te dukuya olorika le nkitoo, neboli mbukui. Neitokini sii aabol ae buku naa ninye embuku e mpuaan. Nedung'okini lelo ootuata enkiguana anaa enasira tiatua nena bukui, te nena apa naataasa ninche.

¹³Neitayu enaiposha ilootuata ootii atua ninye. Neitayu keeya o ene meneng'a ninche neiguanareki ninche too naataasa.

¹⁴Nenang'akini keeya o enemeneng'a atua ilo balbal le nkima. Ena ninye keeya e are, ilo balbal le nkima.

¹⁵Naa ore pooki ng'ae leitu etumi enkarna enye eigero tiatua ina buku e mpuaan, nenang'akini ninye atua olbalbal le nkima.