Read MAASAI REVISED PROTESTANT Embolunoto 21 Bible Online

Embolunoto 21 - MAASAI REVISED PROTESTANT bible

Embolunoto 21

¹Naitoki adol keper ng'ejuk o enkop ng'ejuk. Amu ore keper e dukuya o enkop e dukuya neidipa aatulusoi, meekure eetae enaiposha.

²Nadol ina anasa Sinyati, Yerusalem ng'ejuk edou te keper eing'uaa Enkai, eitobiraki anaa esiankiki naikodokini olpayian lenye.

³Naning oltoilo kitok oing'uaa olorika le nkitoo ejo, “Ng'ura Etii emanyisho e Nkai te nebo iltung'ana. Keton ninye te nebo ninche neaku iltung'ana lenyena. Ore Enkai kewan neaku ketii te nebo ninche;

⁴naa kejut ninye pooki kiyioi too nkonyek enye, ore keeya nemeitokini aekata aata aashu eitokini aata olkiyioi, aashu enkishirata aashu emion aekata. Amu etulusoitie intokitin pooki e dukuya.”

⁵Ore ilo otonita to lorika le nkitoo nejo, “Ekaitaa intokitin pooki ng'ejuko.” Nejo sii, “Ngero ena, amu ore kulo rorei naa keisiligayu nesipa.”

⁶Naajoki ninye nanu. “Eidipe, Ara nanu Alfa o Omega, enkiterunoto o enkiting'oto. Ore oloata enkure naa kaisho nanu enkare metii enkinyiang'a eing'uaa enchorro e nkare e mpuaan.

⁷Ore ilo omirisho naa ketum ena jung'ore naa kaaku nanu Enkai enye neaku ninye enkerai ai.

⁸Kake ore ilkureti o lemeiruk o looikereek o larak o loololoito o lasakutok o looserem inkitanyaanyukot o lalejak pooki, ore ewueji enye naa keaku ilo balbal le nkima oyupuyup te nkima e nkibiriti. Naa ninye keeya e are.”

⁹Neitoki alotu olmalaika obo le lelo oopishana ooata ilbakulini oopishana oobore ilmeita oopishana oobayie naairorie naajoki, “Wou, kaaitodol ina siankiki, ina kitok o Lkuoo le Ker.”

¹⁰Naaya enkiyang'et o maaitabaiki oldoinyo kitok oodo, naaitodol ina anasa sinyati, Yerusalem, edou te shumata eing'uaa enetii Enkai te keper,

¹¹eeta enkitoo e Nkai, naikununo enkitiil anaa eno soit lemetumoyu aashu osoit oji yasper, owang anaa oltotoi.

¹²Neeta esuntai kitok naado, neeta inchomito tomon o aare, netii ilmalaika tomon o aare, nena shomito, nesira inkarn e lelo oshon tomon o aare loo layiok loo Siraeli te nena shomito.

¹³Netii enkalo e nkilepunoto e nkolong inchomito uni, netii kopikop inchomito uni, netii moikuape uni, netii endoyioroto e nkolong inchomito uni.

¹⁴Neeta ina suntai e ina anasa ilkitamanyunot tomon o aare, nesirakino ninche inkarn tomon o aare o lkipaareta lo Lkuoo le Ker.

¹⁵Ore ilo laairorie nanu neeta ninye entemet e ng'udi e saabu natemie ina anasa, o nchomito enyena o sunta.

¹⁶Ore ina anasa nerisio nkaloli pokira ong'uan, erisio enkadoro enye o endapasho enye, netem ninye ina ang teina ng'udi, neaku inkilomitani nkalifuni are o iip ong'uan. Erisio enkadoro o endapasho o enkadoro nailep.

¹⁷Netem sii esuntai enye naa ntemeta ntomoni ile te ntemata o ltung'ani aa taa enoo lmalaika.

¹⁸Ore ina suntai naa osoit oji yasper eshetare. Ore ina anasa naa ene saabu nasila, newang anaa kiook.

¹⁹Ore ilkitamanyunot le suntai e ina anasa neikodoki te pooki soit oata tipat; ore ole dukuya naa yasper, ore o liaare naa soito pusi ooji safi, ore o liokuni naa soito ooji agate, ore o lioong'uan naa soito oonyori ooji emerald,

²⁰ore ole mmiet naa osoit oji oniks ore ole ile naa osoit oji karnelian, ore ole oopishana naa osoit oji krisolite, ore ole isiet naa osoit oji beril, ore o liooudo naa osoit oji topas, ore ole tomon naa osoit oji krisopras, ore ole tomon o obo naa osoit oji yasinas, ore ole tomon o aare naa osoit oji ametist.

²¹Ore nena shomito tomon o aare naa ilului tomon o aare, ore ake enkishomi naa lulu nabo eitobirieki, ore enkoitoi e ina anasa naa saabu nasila newang anaa kiook.

²²Neitu adol enkaji e Nkai teina anasa amu ore enkaji enye naa Olaitoriani Enkai Magilani, o Lkuoo le Ker.

²³Ore ina anasa nemeetayie tipat enkolong aashu olapa oitawang ninye amu enkitoo e Nkai ewang'an enye naa ilo Kuoo le Ker Oltaa lenye.

²⁴Naa ina wang'an enye epuoyie iloreren ore ilaiguanak neyau enkitoo enye atua ninye.

²⁵Nemeikeni aekata inchomito enyena dama nemeetae enkewarie teine.

²⁶Naa keyau ninche atua ina anasa enkitoo o enkanyit oo loreren.

²⁷Kake mejing entoki hoo nabo naiduruk atua ninye aashu pooki ng'ae oas olminong aashu elejare, kake lelo ake ooigeroki inkarn enye tiatua embuku e mpuaan e ilo Kuoo le Ker.