Read MAASAI REVISED PROTESTANT Embolunoto 5 Bible Online

Embolunoto 5 - MAASAI REVISED PROTESTANT bible

Embolunoto 5

¹Nadol sii te nkaina e tatene e ilo otonita to lorika le nkitoo olpiyayati le mbuku naigero atua o oriong, netipikaki ilmishiren oopishana.

²Nadol sii olmalaika ogol elimu to ltoilo sapuk ajo, “Ai ng'ae eishiaakino nebol ele piyayati le mbuku nebol lelo mishiren lenyena.”

³Nemeetae hoo obo te keper aashu te nkop aashu tiabori enkop oidima atabolo ilo piyayati aashu aing'ura atua.

⁴Naishir oleng amu eitu etumi oltung'ani hoo obo oishiaakino pee edol ilo piyayati aashu eing'or atua.

⁵Naajoki nanu obo le lelo payiani lo losho le Yuda, mintoki aishir. Ng'ura, olng'ur le ntonai e Daudi etimirishe peyie etum atabolo ilo piyayati o lelo mishiren lenyena oopishana.

⁶Ore te rishata o lorika le nkitoo o ng'uesi ong'uan naaishu o tiatua ilpayiani, nadol olkuoo le ker eitashe, etiu anaa keteyiang'aki apa, neeta mowuarak naapishana o nkonyek naapishana, naa ninche nkiyang'eta naapishana e Nkai, naairriwayioki meshomo enkop pooki.

⁷Nelo ilo kuoo le ker nedumu ilo piyayati le mbuku te nkaina e tatene e ilo otonita to lorika le nkitoo.

⁸Ore ake pee edumu ilo piyayati le mbuku, nebatata nena ng'uesi naaishu ong'uan te dukuya ilo kuoo le ker, nemeetae ake enemeibung'ita enkawuo oo sinkolioitin, o mbakulini e saabu naabore empuruo narropil naa enkomono oo sinyat.

⁹Nerany osinkolio ng'ejuk aajo, “Kinchiaakino iyie pee idumu olpiyayati le mbuku, nibel ilmishiren lenyena. Amu kiteyieng'aki apa naa to sarge lino inyiang'aka Enkai iltung'ana aitung'uaa loshon pooki, o lng'ejepa, o ltung'ana o loreren.

¹⁰Nintaa ninche enkitoria o lapolosak le Nkai ang, naa keyooki ninche aaitoreisho te nkop.”

¹¹Naitoki nanu aing'orisho, naning emanita olorika le nkitoo o nena ng'uesi naaishu o lelo payiani oltoilo loo lmalaika kumok. Ore esiana enye naa iip nkuyu iip nkuyu o nkalifuni o nkalifuni.

¹²Nejo ninche to ltoilo sapuk, “Keishiakino ilo Kuoo le ker apa oteyiang'aki te neng'amu engolon o enkarsisisho o eng'eno nagut o enkidimata o enkanyit o enkitoo o emayianata.”

¹³Naning nena pooki naaiseuseu te keper o te nkop o tiabori enkop o naatii enaiposha, o nena pooki naatae ejo, “Metaa ene ilo otonita to lorika le nkitoo neaku eno lkuoo le ker, emayianata o enkanyit o enkisisa o enkidimata intarasi o ntarasi!”

¹⁴Nejo nena ng'uesi ong'uan naaishu, “Eesai.” Nebatata ilpayiani aaserem.