Read MAASAI REVISED PROTESTANT Embolunoto 8 Bible Online

Embolunoto 8 - MAASAI REVISED PROTESTANT bible

Embolunoto 8

¹Ore pee ebol Olkuoo le Ker olmishire li oopishana, negira keper te rishata naba anaa enusu e saa.

²Nadol nanu lelo malaika oopishana, ooitashe te dukuya Enkai, neishori ninche sekekuani naapishana.

³Nelotu likae malaika aitashe te mbata o lperere lo lasar, eeta emoti e saabu napejirishoreki, neishori enkorropil sapuk, meitushulaki enkomono e lelo sinyat pooki te nchumata o lperere lo lasar le saabu otii dukuya olorika le nkitoo.

⁴Neilep empuruo e nkorropil o lasar te nebo enkomono e lelo sinyat te nkaina o lmalaika otii dukuya Enkai.

⁵Nedumu olmalaika emoti neiput enkima naitayio to lperere lo lasar, neisuaaki enkop neaku kumok indarat sapuki o nkikurrukurrot naabuaku, o enkimerlel o nkiwuang'at, o enkikirikirata e nkop.

⁶Ore lelo malaika oopishana ooibung'ita sekekuani naapishana neitobir ejo pee eosh.

⁷Neosh ilo malaika le dukuya esekekua enye, neshau enchan oo soito o enkima, nashulare osarge; nedoiki enkop; nepejori ematua e uni e nkop, nepejori ematua e uni oo lkeek, nepejori nkujit pooki naanyori.

⁸Neosh olmalaika li aare esekekua enye. Ore enkito toki naaijo oldoinyo nayupuyup te nkima nenang'akini atua enaiposha.

⁹Neaku ematua e uni e naiposha osarge, neye ematua e uni oo ng'uesi naaishu naatii atua enaiposha, nemuti ematua e uni oo melin.

¹⁰Neosh olmalaika liokuni esekekua enye, nedou olakira sapuk oing'uaa shumata eyupuyup anaa olkilang'ilang'et, nedoiki ninye ematua e uni oo lkejek, o enoo nkonyek oo nkariak.

¹¹Neji enkarna e ilo akira Enduaran. Neitaduari ematua e uni e nkare, neye iltung'ana kumok teina are, amu eitaduaraki.

¹²Neosh olmalaika li oong'uan esekekua enye, ore ematua e uni e nkolong neari, o ematua e uni o lapa, o ematua e uni oo lakir, neaku eitomisimisoki ematua e uni e wang'an enye. Nemitikini ematua e uni e ndama ewang'u naa neijia etiu ematua e uni e nkewarie.

¹³Naitoki aing'orisho naning olkurragos oishirita to ltoilo sapuk eipirri te mpolos o loing'ang'e nejo, “Wooi, Wooi, Wooi, ninche lelo oomanya enkop, te nkaraki enkorui e nena tarumpetani netaa keosh ilmalaika okuni.”