Read MAASAI REVISED PROTESTANT Rusi 3 Bible Online

Rusi 3 - MAASAI REVISED PROTESTANT bible

Rusi 3

¹Neitoki Naomi enkaputani enye ajoki ninye, “Entito ai, aimaaing'uraki nanu iyie ang, pee itum aitirring'ayu?

²Amaa, Boas, aime olol lgilata lang, naa atua inkaisiaayiak enyena itii? Ng'ura eitobir ade shairi kewarie te wueji neidong'ishoreki.

³Intukuoyu naa niyela te ilata ninchop ilkilani sidain nidoyio alo ewueji neidong'ishoreki; kake mincho kidol ilo tung'ani o metaba anaa neidip ainosa endaa neokisho.

⁴Kake te nelo ninye airrag, tisipu ewueji neirragie ninye; nilo taa abolu inkejek enyena nirrag teine; naa eikiliki ninye enias.”

⁵Newal ninye ajo, “Ore pooki nijo kalo nanu aas.”

⁶Neaku eshomo Rusi ewueji neidong'ishoreki neas anaa enaitanapa enkaputani ninye.

⁷Ore eidipa Boas ainosa endaa neokisho netishipe oltau lenye nelo ninye airrag te bayie o sototi le nkurma. Nelotu Rusi akiti nebolu inkejek enyena, neirrag.

⁸Ore te mpolos e kewarie neipirriu ilo tung'ani, neibelekenya, naa ng'ura, eirragita enkitok too nkejek enyena!

⁹Nejo ninye, “Ira ng'ae?” Newal ninye ajo, “Kara nanu Rusi, enkaisiaayiani ino; isalaasha olkila lino intoipo enkaisiaayiani ino amu iyie olo lgilata lang otaana.”

¹⁰Nejoki ninye, “Mikitamayiana Olaitoriani, entito ai; inyaaka aitasapuk ena supatisho aitulusoo tene dukuya, nchere eitu iyie ilo asujaa ilbarnot, aa karsisi o aa aisinak.

¹¹Ore naa taata entito ai, miureishoyu, kaaitaas nanu nena pooki niomonu, amu eyiolo pooki ng'ae lena ang nchere ira enkitok e tipat.

¹²Naa kesipa inchere kara nanu olo lgilata linyi linyikare, ore ake eyia etii olo lgilata linyikare alang nanu.

¹³Totona ena kewarie, ore tadekenya, ti nikintaas ninye te rishata o ltung'ani lo lgilata, naa sidai; nchoo ninye eas ina. Kake te nemeyieu ninye neas ina rishata o ltung'ani lo lgilata te iyie, ore anaa enaishu Olaitoriani, nalo nanu aas erishata o ltung'ani lo lgilata te iyie. Irraga mekenyu.”

¹⁴Neaku eirraga ninye too nkejek enyena o mekenyu, kake etudumunye ninye enasirie; nejoki Boas, “Mincho ake eyiolouni aajo eewuo enkitok ewueji neidong'ishoreki.”

¹⁵Nejo ninye, “Iyau ilo karasha linchopito toluaa.” Neaku etoluaa ninye, nepik ninye imboreitin ile e shairi neitanap ninye; nelo ninye atua enkanasa.

¹⁶Ore pee elo ninye enetii enkaputani, nejoki ninye, “Kaji eikunari imbaa entito ai?” Neliki Rusi nena pooki naaitaasa ilo tung'ani,

¹⁷ejo, “Ore kuna boreitin ile e shairi ninye laaishoo, amu etejo ninye, ‘Milo too nkaik naarook enetii enkaputani ino.’ ”

¹⁸Newalu Naomi ajo, “Taanyisho entito ai o metaba anaa niyiolou enetiu ena bae, amu meitirring'a ilo tung'ani, kake kelo taata aitabaya ena bae.”