Read MAASAI REVISED PROTESTANT 1 Samuel 11 Bible Online

1 Samuel 11 - MAASAI REVISED PROTESTANT bible

1 Samuel 11

¹Neitoki Nahash, ilo Amoni, ailep alo neman Yabesh-gilead; nejoki iltung'ana pooki le Yabesh Nahash, “Ntaiki iyiook olning'o pee kisiaai iyie.”

²Kake etiaaka ninye Nahash, ilo Amoni, “Tena oitoi aitaiki intae olning'o inchere kakurtu nanu inkonyek inyi pooki e tatene, napik esulare Israel pooki.”

³Nejoki ilpayiani le Yabesh ninye, “Nchoo iyiook erishata oo nkolong'i naapishana pee kitum aairriwai ilkiliku enkop pooki e Israel. Ore ake pee metii hoo obo oitajeu iyiook, nikincho iyiook iyie ate.”

⁴Ore ake pee epuonu ilkiliku Gibea e Saul, nelikioo ninche olomoni too nkiyiaa oo ltung'ana; neishir iltung'ana pooki aayietu.

⁵Negira Saul alotu te nkurma te siadi ilmong'i; nejo Saul, “Kainyoo naishirie iltung'ana, pee eishirita?” Neliki ninche ilomon le lelo tung'ana le Yabesh.

⁶Nelotu Enkiyang'et e Nkai te ngolon shumata Saul pee eidip atoning'o kulo omon, neyupuyup oleng engoro enye.

⁷Neya ninye ilmong'i oaare ootii enchata emurt nabo, nedung'udung ninche aitaa indung'ot, neirriwaa nena dung'ot enkop pooki e Israel, too nkaik e lelo kiliku ejo, “Ore pooki ng'ae lemeipang'u asuj Saul o Samuel, neikoni neijia ilmong'i lenyena!” Nejing iltung'ana euriata o Laitoriani, neipang'u ninche anaa oltung'ani obo.

⁸Ore ake pee eiturrur aiken ninche te Besek, nera iltung'ana le Israel inkalifuni iip uni, ore iltung'ana le Yuda naa inkalifuni tomoni uni.

⁹Nejoki ninche lelo ooetuo ooata olkilikuai, “Entiaaki iltung'ana le Yabesh-gilead inji, ‘Ore taisere, te neirouaju enkolong, nitumutumu intae enkordunoto.’ ” Ore pee epuonu lelo lo ilkilikuai neliki iltung'ana le Yabesh, neng'idayu ninche.

¹⁰Neaku etejo iltung'ana le Yabesh, “Ore taisere naa aikipalari iyiook te ntae, naa indimidimi aaitaasa iyiook enaba anaa enidolitata aa sidai te ntae.”

¹¹Ore pee ekenyu nepik Saul lelo tung'ana ilturrurri okuni; nepuonu ninche atua empolos oo lng'oborri tadekenya enasirie, nedung lelo Amoni o meipira enkolong; ore lelo ooimishote neidapasha, o metaba anaa neaku meetae ninye oaare lenye ootoni te nebo.

¹²Nejoki iltung'ana Samuel, “Kaing'ae ilo apa otejo, ‘Eji keitore iyiook Saul?’ Entoriku lelo tung'ana pee kiar iyiook metuata.”

¹³Kake etejo Saul, “Meari ninye oltung'ani obo metua ena olong, amu ore taata neyaua Olaitoriani enkordunoto tiatua Israel.”

¹⁴Neitoki Samuel ajoki iltung'ana, “Wootu, maapeiti iyiook Gilgal paa teine kintang'ejuk enkitoria.”

¹⁵Neaku eshomo iltung'ana pooki Gilgal, ore teine neitaa ninche Saul olaiguanani te dukuya Olaitoriani te Gilgal. Ore teine nepolos ninche ilasarri le seriani te dukuya Olaitoriani; ore teine neshipa Saul o ltung'ana pooki le Israel oleng.