Read MAASAI REVISED PROTESTANT 1 Samuel 17 Bible Online

1 Samuel 17 - MAASAI REVISED PROTESTANT bible

1 Samuel 17

¹Neiturrur apa Ilfilisti ilororani lenye le njore te nkaraki olarrabal. Neiturrurrote apa ninche te Soko natii Yuda, nepik ilng'oborri erishata e Soko o Aseka, te Efes-damim.

²Ore Saul o iltung'ana le Israel neiturrurrote, nepik ilng'oborri oerata le Ela, neluaa too lkererin lo larrabal pee earare Ilfilisti.

³Neitashe Ilfilisti te nchumata oldoinyo te nkalo nabo, neitashe Isiraeli te nchumata oldoinyo te nkae shoto, etii oerata erishata ninche.

⁴Neipang'u apuku too lng'oborri loo Lfilisti oloing'oni oji Goliat, le Gas, laa ore enkadoro enye negiroo ntemat e nkaina ile,

⁵neeta apa ninye enkopiyia o suyai neishopito enkila o lgoo o suyai e shekeli inkalifuni imiet.

⁶Neeta apa inkitushureta o suyai too nkejek enyena. Ore eremet o suyai neika te rishata oo ronyi lenyena.

⁷Neba enchata e remet enye anaa enauner ore esipil e ina remet enye naa irratilini tomon o imiet; ore ilo onap elong'o enye nelo te dukuya ninye.

⁸Neitashe ninye nebuaaki enjore oo Siraeli ejo, “Kainyoo pee impang'utua intae aapuonu aataaniki olarrabal? Ae mara nanu Olfilisti, nirara intae isinkan le Saul? Entegelaki ate oltung'ani, ninchosho ninye edou alotu ene natii.

⁹Te naidim ninye ataarare nanu naar nanu matua, nikiaku iyiook isinkan linyi; kake te naisulu nanu te ninye naar ninye metua, niakuku intae isinkan lang, nisiaayiayia iyiook.”

¹⁰Nejo ilo Filisti, “Atamoro nanu iltimito le njore e Israel ena olong; enchooki nanu oltung'ani pee kitum aatarata te nebo.”

¹¹Ore ake pee ening Saul o Siraeli pooki kulo omon lo Lfilisti neing'aeng'ae ninche neirut oleng.

¹²Ore apa Daudi naa olayioni le Yese lo Lframiti le Betlehem te Yuda, neeta apa ilayiok isiet. Ore apa too nkolong'i e Saul netamorua ilo tung'ani oleng neaku oloo larin kumok.

¹³Ore lelo ayiok okuni botoro le Yese netusuja apa Saul aapuo enjore; ore inkarn e lelo ayiok lenyena ooshomo enjore naa Eliab ilo kikau, ore olosujita ninye naa Abinadab, ore oliokuni naa Shama.

¹⁴Daudi apa oloti te pooki; ore lelo okuni botoro netusuja Saul,

¹⁵kake eshomo apa, Daudi ailoiki enetii Saul o Betlehem alo airrita intare e menye.

¹⁶Too nkolong'i artam apa eewuo ilo Filisti dukuya neitashe te nkitashoto enye, tadekenya o teipa.

¹⁷Nejoki Yese Daudi olayioni lenye, “Iyaki ilalashera linono ena efa enkano napejo, o kuna mukateni tomon, ninap aitasiooyo aya ilng'oborri enetii ilalashera linono;

¹⁸niyaki sii kulo belat tomon le ng'orno naitoyioki olkitok le nkalifu enye. Toduaa eneikununo ilalashera linono, nishoru iyie entoki naitodolu ajo itoduaa ninche naa aisupati.”

¹⁹Ore apa Saul o ninche o ltung'ana pooki le Israel, netii atua oerata le Ela, eara o lelo Filisti.

²⁰Neinyototo Daudi ayooki tadekenya, neing'uaa inkerra te nebo olaing'urani, neya endaa, nelo anaa enaitanapa Yese ninye; nelotu lelo ng'oborri egira olorora alo dukuya too lkererin lo larrabal te wueji niarareki; ebuaku to lkiyioi lo larrabal.

²¹Ore Isiraeli o Lfilisti nenyikakino pee eara, enjore earare njore.

²²Neing'ueiki Daudi intokitin olaing'urani loo lolan, nekwet alo enetii iltimito, nelo neiroroki ilalashera lenyena.

²³Ore eirorie ninche, nedol ilo oing'oni ilo Filisti le Gas, oji Goliat neilepu apuku tiatua iltimito loo Lfilisti; neiro lelo rorei anaa apa. Nening Daudi ninye.

²⁴Ore iltung'ana pooki le Israel, pee edol ilo tung'ani, neisik aailany ninye, neirut ninche oleng.

²⁵Nejo iltung'ana le Israel, “Itoduaa iyie ele tung'ani oilepua? Kesipa eewuo ninye ailepu pee emor Israel; ore oltung'ani oar ninye metua, neitaa ninye olaiguanani karsis te nkarsisisho kitok, neisho ninye entito enye neitaa enkaji e papaai lenye metalakunoyu te Israel.”

²⁶Nejoki Daudi lelo tung'ana apa ooitashe te mbata enye, “Kaa eitaasi oltung'ani oar ele Filisti metua, neitayu emoroto te Israel? Amu kaing'ae ninye ele Filisti lememurata, metaa keidim atamoro injoreitin e Nkai naishu?”

²⁷Newaliki ninye iltung'ana neijia nchere, “Ina eitaasi oltung'ani oar ninye metua.”

²⁸Nening Eliab, ilo alashe lenye botor, eirorie iltung'ana; neyupuyup engoro e Eliab te nkaraki Daudi, nejo ninye, “Kainyoo iyie pee itadouo ene? Naa kaing'ae itung'ueikia nekua kuti kerra naatii ong'ata? Kayiolo nanu enkitokoos ino, o entorroni o ltau lino; amu iewuo adou aing'or olarrabal.”

²⁹Nejo Daudi, “Kaa taata ataasa? Aime ororei ake?”

³⁰Neibelekenya aing'uaa ninye alo enetii olikae, neiro teina oitoi; neitoki iltung'ana aawaliki ninye anaa duoo ake te dukuya.

³¹Ore ake pee ening'i lelo rorei ooiroro Daudi, neigil ninche aalimu te dukuya Saul; neirriwaa ninye olkilikuai aipotu ninye.

³²Nejoki Daudi Saul, “Emincho oltung'ani hoo obo epalari te nkaraki ninye; kelo osinka lino aarare ele Filisti.”

³³Nejoki Saul Daudi, “Mindim iyie ashomo ataarare ele Filisti; amu ira iyie olbarnoti ake, naa oltung'ani apa ninye lo larrabal ebaiki kitisho enye.”

³⁴Kake etiaaka Daudi Saul, “Keing'or apa osinka lino inkerra e papaai lenye; naa tenelotu olng'atuny aashu olng'arurumi, neya olkuoo tiatua eluaata,

³⁵nalo nanu asujaa naar ninye naitayu nanu olkuoo te nkutuk enye; naa te nelo naadumakino nanu, naibung olmunyei lenye naar metua.

³⁶Etaara osinka lino metuata ilng'atunyo o lng'arurum; ore ele Filisti lememurata naa ketiu anaa obo te ninche, amu etamoro injoreitin e Nkai naishu.”

³⁷Nejo Daudi, “Ore ilo Aitoriani laaitajeuo nanu too loisotok lo lng'atuny o te nkaina o lng'arurumi naa kaaitajeu te nkaina ele Filisti.” Nejoki Saul Daudi, “Shomo, neaku Olaitoriani te nebo iyie.”

³⁸Neishopoki Saul Daudi iruparen enyena e njore; nepik enkopiyia o suyai e ndukuya enye, neishopoki enkila o lgoo o larrabal.

³⁹Nerreten Daudi olalem lenye ti oriong enkila enye o larrabal, nejo “Maidim nanu ashomo te kuna; amu eitu nanu amoku ninche.” Neitayu Daudi ninche airragie.

⁴⁰Neya ninye eng'udi enye te nkaina, negelu isoito imiet oosipa to lkeju, nepik atua ilo bene lenye lo lairritani loo ntare, netii enkopito enye enkaina, nelo anyikaki ilo Filisti.

⁴¹Nelotu ilo Filisti anyikaki Daudi, etii ilo anapani le long'o enye dukuya ninye.

⁴²Ore ake pee eing'or ilo Filisti, nedol Daudi; nemenaa ninye, amu olbarnoti apa ninye onyokie neikishiaan te nking'urata.

⁴³Nejoki ilo Filisti Daudi, “Kara nanu oldia, pee ilotu enatii too ng'usidin?” Nedek ilo Filisti Daudi too nkaitin enyena.

⁴⁴Nejoki ilo Filisti Daudi, “Wou enatii, naa kaisho nanu inkiri o sesen lino imotonyi o loing'ang'e o ng'uesi e ong'ata.”

⁴⁵Neitoki Daudi ajoki ilo Filisti, “Ilotu iyie enatii to lalem o te mpere, o te nkae pere naado; kake alotu nanu enitii iyie te nkarna o Laitoriani loo lororani, ina Ai oo njoreitin e Israel, naa ninye iyie itamoro.

⁴⁶Ore ena olong aikipik iyie Olaitoriani atua enkaina ai, naar abatat, nadung'oo endukuya ino, naisho nanu impopoki oo lororani ootuata loo Lfilisti ena olong imotonyi o loing'ang'e o ilowuarak le ntim pee etum enkop pooki atayiolo nchere etii Enkai atua Israel,

⁴⁷neyiolou sii ele turrur pooki nchere keitajeu Olaitoriani neme to lalem o te remet; amu olo Laitoriani ele arrabal naa eikinchoru ninye apik iyie atua enkaina ang.”

⁴⁸Ore ake pee edumunye ilo Filisti nelotu pee enang'are Daudi, nekwet Daudi asiooyo alo ilo kereri lo larrabal anang'are ilo Filisti.

⁴⁹Nepik Daudi enkaina atua olbene lenye neitayu osoit, nepik enkopito, neyuk ninye, nenang ilo Filisti olpura le nkomom enye; neimis ilo soit tiatua olpura le nkomom enye, nebatata ninye te nkomom enye aosh enkop.

⁵⁰Neaku eisula Daudi ilo Filisti te nkopito o to soit, neosh ilo Filisti, near ninye metua; nemetii apa olalem enkaina e Daudi.

⁵¹Nekwet Daudi neitashe te nchumata e ilo Filisti, neya olalem lenye, neyietu ashurtu te nchashur enye, near ninye metua, nedung'orie endukuya enye. Ore ake pee edol Ilfilisti aajo etua oloing'oni lenye neisik.

⁵²Ore iltung'ana le Israel o Yuda nedumunye te mbuakunoto nesuj Ilfilisti o metabai Gas o nchomito e Ekron neaku ore lelo Filisti loo lbaa nebatata ebaiki She-ara-im o metabaiki Gas o Ekron.

⁵³Nepuonu Israeli aashukunye te mirata oo Lfilisti neya intokitin too lng'oborri lenye.

⁵⁴Neyau Daudi endukuya eilo Filisti Yerusalem, kake etipika imasaa enyena o larrabal atua olngobor lenye.

⁵⁵Ore ake pee edol Saul Daudi elo aarare ilo Filisti, nejoki ninye Abna, olkitok le njore, “Abna, kole ng'ae ele barnoti?” Nejo Abna, “Anaa enaishu oltau lino, olaiguanani, maaidim nanu atolimu.”

⁵⁶Nejo olaiguanani, “Inkilikuanu ajo kole ng'ae ele ayioni.”

⁵⁷Ore eshukunye Daudi aing'uaa enkirragata e ilo Filisti, neya Abna ninye, neyau ninye dukuya Saul eeta elukunya e ilo Filisti te nkaina enye.

⁵⁸Nejoki Saul ninye, “Ira iyie ole ng'ae, lo barnoti?” Newal Daudi ajo, “Kara nanu olo sinka lino Yese le Betlehem.”