Read MAASAI REVISED PROTESTANT 1 Samuel 19 Bible Online

1 Samuel 19 - MAASAI REVISED PROTESTANT bible

1 Samuel 19

¹Neirorie Saul Yonatan, olayioni lenye o lelo sinkan lenyena pooki, nchere pee ear ninche Daudi metua. Kake ore Yonatan, olayioni le Saul, kenyor apa Daudi oleng.

²Nejoki Yonatan Daudi, “Ore Saul, papaai lai, naa aiking'oru iyie aar tua; neaku tagolie kewan tadekenya, totona te wueji misil isudoi kewan;

³naa kalo nanu aipang aitashe atashare papaai lai teine wueji nitii, nairorie nanu papaai lai imbaa inono; naa te nayiolou nanu pooki toki naaliki iyie.”

⁴Neiro Yonatan imbaa sidain tialo Daudi te Saul, papaai lenye, nejoki ninye, “Mincho olaiguanani eas eng'oki tialo osinka lenye Daudi; amu eitu ninye eas eng'oki tialo iyie, amu ore inkiaasin enyena naa ine nkisiaayiare sidain apa te iyie;

⁵amu etipika ninye enkishui enye inkaik enyena nesesekuan ninye ilo Filisti, neyaki Olaitoriani Israel pooki emirata kitok. Itoduaa apa iyie, ning'idayu; kainyoo naa pee ias eng'oki to sarge lemeeta entioto aar Daudi metua meeta emporeet?”

⁶Nening Saul oltoilo le Yonatan; nenya Saul olmumai ajo, “Anaa enaishu Olaitoriani, meari ninye metua.”

⁷Neipotu Yonatan Daudi, neitodol Yonatan ninye kuna baa pooki. Neriku Yonatan Daudi enetii Saul, netii apa ninye ine netii ninye anaa apa te dukuya.

⁸Neitoki olarrabal apuku; neipang Daudi alo nearare Ilfilisti, neitayu esesekuanare sapuk tiatua ninche, neisik te dukuya ninye.

⁹Neitoki enkiyang'et torrono naing'uaa Olaitoriani alotu shumata Saul, etonita tiatua enkaji enye eeta empere enye te nkaina enye; neoshito Daudi enkawuo oo sinkolioitin.

¹⁰Nejo Saul apudaki Daudi esuntai te mpere; kake etapaashare Daudi Saul, neibitaki empere esuntai. Neisik Daudi, neimisho.

¹¹Ore ina kewarie neirriwaa Saul iltungana enkaji e Daudi metaleeno ninye, pee etum ataara ninye metua tadekenya. Kake etiaaka ninye Mikal, enkitok e Daudi, “Ti nimintajeu enkishui ino ena kewarie, ore taisere niye.”

¹²Neaku eitadoyie Mikal Daudi aimie elusie nelo ninye aisik neimisho.

¹³Neya Mikal enkitanyaanyukoto neirragie ninye te ndapash nepik entoki nairishunyeki endukuya oo lpapit loo ntare elukunya enye, neimulumul too nkarash.

¹⁴Ore ake pee eirriwaa Saul ilkiliku meshomo aaya Daudi, nejo ninye, “Kemuoi ninye.”

¹⁵Neirriwaa Saul ilkiliku meshomo aadol Daudi, ejo, “Eyakaki nanu tiatua endapash, pee atum nanu ataara ninye metua.”

¹⁶Ore ake pee ejing'u lelo kipaareta, nedol etii ina kitanyaanyukoto endapash, o ina toki nairishunyeki endukuya oo lpapit loo nkineji te ndukuya enye.

¹⁷Nejoki Saul Mikal “Kainyoo pee kiteleja aiko nji, nincho olmang'atinta lai meshomo neaku etajeuo ninye?” Newaliki Mikal Saul, “Aatiaaka ninye nanu, ‘Intasho mashomo; kainyoo pee aar nanu iyie tua?’ ”

¹⁸Neisik Daudi neimisho nelotu apa ninye enetii Samuel te Rama, neliki nena pooki naaitaasa Saul ninye. Ore ninye o Samuel nepuo aabik te Naios.

¹⁹Netiaakaki apa Saul, “Ng'ura, etii Daudi Naios te Rama.”

²⁰Neitoki Saul airriwaa ilkiliku meyau Daudi; ore ake pee edol ninche olturrur loo loibonok le Nkai eibonisho o Samuel aa olarikoni te shumata ninche, nelotu Enkiyang'et e Nkai shumata lelo kipaareta le Saul, neibonisho sii ninche.

²¹Ore ake pee elikini Saul, neirriwaa ninye kulikae kipaareta, neibonisho sii ninche. Neitoki Saul airriwaa ilkiliku te nkata e uni, neibonisho ake sii ninche.

²²Neitoki ninye makewan alo Rama, nelotu ilo shorro sapuk apa otii Seku; neikilikuanu ajo, “Kaji etii Samuel o Daudi?” Nejo obo, “Ng'ura, etii ninche Naios te Rama.”

²³Nelo ninye teine Naios te Rama; nelotu Enkiyang'et e Nkai shumata ninye, ore eloito neibonisho ninye, o metaba anaa nelotu ninye Naios e Rama.

²⁴Neshurtu sii ninye inkilani enyena, neibonisho sii ninye te dukuya Samuel, neirrag meeta enkila ina olong pooki o ina kewarie pooki. Neaku etejoki, “Ketii sii ninye Saul atua iloibonok le Nkai?”