Read MAASAI REVISED PROTESTANT 1 Samuel 22 Bible Online

1 Samuel 22 - MAASAI REVISED PROTESTANT bible

1 Samuel 22

¹Nedumunye Daudi teine neisik alo enkapune e Adulam; ore ake pee ening ilalashera lenyena o enkaji e papaai lenye pooki, nedoyio aapuo enetii ninye.

²Ore pooki ng'ae oata osina, o pooki ng'ae oata esile, o pooki ng'ae leton emonira neiturrurrukino ninye, neaku ninye olarikoni lenye. Netii apa te nebo ninye iltung'ana oobaya iip ong'uan.

³Nelo Daudi teine Mispe e Moab; nejoki ninye olaiguanani le Moab, “Aatoomono nchoo sii ake papaai o yieyio etoni te nebo o iyie, o metaba anaa nayiolou enaas Enkai te nanu.”

⁴Neing'uaa ninye ninche te nebo olaiguanani le Moab, netoni ninche te nebo ninye ina kata pooki etii Daudi enkapune.

⁵Nejoki oloiboni le Nkai Daudi, “Mintoki aton to lnukata, shomo enkop e Yuda.” Neaku etudumunye Daudi nelo atua entim e Heres.

⁶Nening apa Saul nchere enotoki Daudi, o lelo tung'ana apa ootii te nebo ninye. Netonita apa Saul te Gibea ti abori olchani oji olkuaju te wueji neika, eeta empere enye te nkaina enye neitashe isinkan lenyena pooki aaman ninye.

⁷Nejoki Saul lelo sinkan lenyena oomanita ninye, “Entoning taata, intae ile Benchamen; amaa keisho ole Yese pooki ng'ae te intae inkurman o nkurman oo sabibu, keitaa ninye intae pooki ilkituaak loo nkalifuni o ilkituaak lo maaip,

⁸pee kitarresho intae pooki nanu? Meetae hoo obo laaliki nanu enkata naibung'are olayioni lai olayioni le Yese, meetae obo te intae laaing'urrie nanu aashu aaliki nanu nchere eisisa olayioni lai osinka lai maataara nanu, maatarresho, anaa enatiu ena olong.”

⁹Newal Doeg le Edom, apa oitasho te mbata oo sinkan le Saul ejo, “Atoduaa nanu olayioni le Yese elotu Nob, enetii Ahimelek, olayioni le Ahitab,

¹⁰neikilikuanishore ninye Olaitoriani te nkaraki ninye, neisho ninye indaiki, neisho ninye olalem le Goliat ilo Filisti.”

¹¹Neitoki olaiguanani airriwaa olkilikuai aipotu Ahimelek olapolosani, olayioni le Ahitab, o enkaji e papaai lenye pooki, lelo apolosak apa ootii Nob; nepuonu ninche pooki enetii olaiguanani.

¹²Nejo Saul, “Toning'o taata, olayioni le Ahitab.” Newalu ninye, “Nele nanu, olkitok lai.”

¹³Nejoki Saul ninye, “Kainyoo pee kitarresho nanu, iyie o layioni le Yese, teina ninchoo ninye imukateni o olalem, ninkilikuanishore Enkai te nkaraki ninye, neaku aatudumakine ninye nanu naairrag arresh, anaa enatiu ena olong?”

¹⁴Newaliki Ahimelek olaiguanani ajo, “Naa kaing'ae tiatua isinkan linono pooki oisiligayu oleng alang Daudi, kaing'ae olaputani lo laiguanani, olkitok oitasheiki lelo likirrip iyie, neyanyiti tiatua enkaji ino?

¹⁵Ae taata enkata e dukuya naikilikuanishore nanu Enkai te nkaraki ninye? A'a! Mincho olaiguanani eomonu ae toki to sinka lenye aashu te nkaji pooki e papaai lai; amu eitu eyiolou osinka lino ae toki te kuna pooki, te sapuk aashu te nkiti.”

¹⁶Nejo olaiguanani, “Kesipa, iye ake, Ahimelek, iyie o enkaji e papaai lino.”

¹⁷Nejoki olaiguanani lelo arripok oomanita ninye, “Embelekenyata entaar ilapolosak lo Laitoriani metuata; amu etii sii enkaina enye te nebo Daudi, neyiolo apa aajo eisika ninye, neitu ninche aaliki nanu.” Kake ore isinkan lo laiguanani nemeidim aatudumu enkaina enye aaiteleiki lelo apolosak lo Laitoriani.

¹⁸Neitoki olaiguanani ajoki Doeg, “Imbelekenyayu iyie tusulakinoyu ilapolosak.” Neibelekenya Doeg le Edom nedoiki lelo apolosak, near ninye ina olong iltung'ana intomoni isiet o imiet ooishopito enkila dorrop sidai.

¹⁹Ore Nob ina ang oo lapolosak, near ninye to lalem; ilewa o nkituaak, nkera o naanakita, ilmong'i, isirkon o nkerra, near to lalem.

²⁰Kake ore obo loo layiok le Ahimelek ole Ahitab, oji Abiata, neisudori neisik asujaa Daudi.

²¹Neliki Abiata Daudi nchere etaara Saul ilapolosak lo Laitoriani metuata.

²²Nejoki Daudi Abiata, “Atayiolo apa teina olong, etii Doeg ilo Edometi ine, inchere esipa keliki ninye Saul. Ayaua nanu ina keeya oo ltung'ana pooki le nkaji e papaai lino.

²³Totona te nebo nanu, miureisho; amu ore ilo oing'oru enkishui ai neing'oru enkishui ino; ore te nebo nanu niton te wueji neserian.”